തിരുവനന്തപുരം: കേരളത്തില് മികച്ച ശക്തിയാണെങ്കിലും അടുത്തകാലത്ത് കാര്യമായി അംഗസംഖ്യയുടെ കുറവ് നേരിടുന്ന കോണ്ഗ്രസിന്റെ വിദ്യാര്ത്ഥി യൂണിയന് കെ എസ് യു പുതിയതായി അവതരിപ്പിച്ച ഓണ്ലൈന് അംഗത്വം സംഘടനയ്ക്ക് ഭാരമാകുന്നു. അനേകം സജീവ പ്രവര്ത്തകര് ഓണ്ലൈന് പ്രതിസന്ധി മറികടന്ന് സംഘടനയില് അംഗമാകാന് കഴിയാതെ പോകുമ്പോള് ഒരാള് ഈസിയായി അംഗത്വം സംഘടിപ്പിച്ചു. മറ്റാരുമല്ല ഇന്ത്യന് സിനിമയില് അനേകം പ്രേക്ഷകരെ സമ്പാദിച്ച 'പുലിമുരുകന്'.
പത്തനംതിട്ട ജില്ലയില് നിന്നും ഓണ്ലൈന് അംഗത്വ വിതരത്തിലൂടെയാണ് പുലി മുരുകന് സംഘടനയില് അംഗമായത്. കെഎസ്യുവിന്റെ പുതിയ പരിപാടിയിലെ സങ്കീര്ണ്ണമായ നടപടിക്രമങ്ങള് മൂലം സജീവ പ്രവര്ത്തകര് പോലും അംഗത്വം നേടാനാകാതെ പാടുപെടുമ്പോഴാണ് മോഹന്ലാലിന്റെ സൂപ്പര്ഹിറ്റ് സിനിമയിലെ നായക കഥാപാത്രമായ പുലി മുരുകനെ ഏതോ വിരുതന് കെഎസ്യുവിലേക്ക് കയറ്റിയത്.
അടുത്ത കാലത്താണ് കെഎസ്യു ഓണ്ലൈന് അംഗത്വ വിതരണം ആരംഭിച്ചത്. ഓണ്ലൈനിലൂടെ അംഗത്വം നേടിയാല് 50 രൂപ ഫീസും നേരിട്ടാണെങ്കില് 100 രൂപയുമാണ് സംഘടന അംഗത്വ വിതരണത്തിന് ഈടാക്കുന്നത്.
നേരത്തെ വെറും മെമ്പര്ഷിപ്പ് മുറിച്ചു കൊടുത്ത് അംഗമായിരുന്ന പലര്ക്കും ഓണ്ലൈന് വന്നതോടെ കാര്യങ്ങള് ദുരിതമായിട്ടുണ്ട്. ഓണ്ലൈന് നിയന്ത്രിക്കുന്ന ഡല്ഹി ആസ്ഥാനമായി പ്രവര്ത്തിക്കുന്ന കമ്പനിയുടെ നമ്പരിലേക്ക് ആദ്യം മിസ്ഡ് കോള് അടിക്കണം. തുടര്ന്ന് കമ്പനി നല്കുന്ന വണ്ടൈം പാസ്വേഡ് ഉപയോഗിച്ച് ഫോട്ടോയും തിരിച്ചറിയല് കാര്ഡും ഫോണ് നമ്പറുമെല്ലാം അപ്ലോഡ് ചെയ്യണം.
പിന്നീട് ഈ വെബ്സൈറ്റില് കയറണമെങ്കില് ഓരോ തവണയും പ്രത്യേകം പാസ്വേഡ് നല്കണം. നടപടിക്രമങ്ങള് അനേകര്ക്ക് തലവേദനയായപ്പോഴാണ് മോഹന്ലാല് കഥാപാത്രമായ പുലിമുരുകന് ഈസിയായി ഇതെല്ലാം മറികടന്നത്. സംഗതി ശ്രദ്ധയില് പെട്ടതിനെ തുടര്ന്ന് നേതാക്കള് പിന്നീട് എടുത്തുമാറ്റുകയും ചെയ്തു.
