മലപ്പുറം: നടുറോഡില് സ്കൂട്ടര് പൊടുന്നനെ നിര്ത്തിയതു ചോദ്യം ചെയ്ത ബൈക്ക് യാത്രക്കാരനായ യുവാവിനുനേരേ ആള്ക്കൂട്ട ആക്രമണം. കരുവാരകുണ്ട് സ്വദേശി ചേരിയത്ത് ഷംസുദ്ദീന്റെ(40) ഇടതു കണ്ണിന് ആക്രമണത്തില് ഗുരുതരമായി പരുക്കേറ്റു. കഴിഞ്ഞ 15 നു വൈകിട്ട് അഞ്ചിനാണ് സംഭവം.
മങ്കട വലമ്പൂരില്വച്ചാണ് തന്റെ മുന്നിലുണ്ടായിരുന്ന സ്കൂട്ടര് പെട്ടെന്നു ബ്രേക്കിട്ടതു ഷംസുദ്ദീന് ചോദ്യംചെയ്തത്. തുടര്ന്ന് ഇരുവരും തമ്മില് വാക്കേറ്റവും ഉന്തും തള്ളുമുണ്ടായി. ഫോണില് പകര്ത്തിയ സ്കൂട്ടറിന്റെ ചിത്രം ഡിലീറ്റ് ചെയ്യാന് ആവശ്യപ്പെട്ടെങ്കിലും ഷംസുദ്ദീന് വഴങ്ങിയില്ല.
ഇതോടെ സ്കൂട്ടര് ഉടമ ഫോണ് ബലമായി പിടിച്ചുവാങ്ങി ലോക്ക് തുറക്കാന് ഭീഷണിപ്പെടുത്തി. പ്രദേശവാസിയായ അയാള് കൂടുതല് ആളുകളെ വിളിച്ചുവരുത്തി. വടി, കമ്പിപ്പാര തുടങ്ങിയവ ഉപയോഗിച്ച് ഏഴോളം പേര് ഷംസുദ്ദീന്റെ തലയ്ക്കും കൈയിലും കണ്ണിലും മര്ദിച്ചു. നെഞ്ചില് ചവിട്ടി. പരുക്കേറ്റിട്ടും ആശുപത്രിയില് പോകാന് സമ്മതിക്കാതെ തടഞ്ഞുനിര്ത്തി.
ഷംസുദ്ദീന് ലഹരി ഉപയോഗിച്ച് പ്രശ്നമുണ്ടാക്കുന്നു എന്നായിരുന്നു സംഭവ സ്ഥലത്ത് എത്തിയവരോടു സംഘം പറഞ്ഞത്. ഷംസുദ്ദീന് വെള്ളം ചോദിച്ചെങ്കിലും ആരും കൊടുക്കാന് തയാറായില്ലെന്നു ബന്ധുക്കള് പറഞ്ഞു. പരുക്കേറ്റ് ഒന്നര മണിക്കൂറോളം വഴിയില് കിടന്ന ഷംസുദ്ദീന്, തന്നെ ആശുപത്രിയില് എത്തിക്കണമെന്ന് ആവശ്യപ്പെട്ട് സുഹൃത്തുക്കള്ക്കു ലൊക്കേഷന് അയച്ചുകൊടുത്തു.
ഇവരെത്തിയാണ് പെരിന്തല്മണ്ണയിലെ സ്വകാര്യ ആശുപത്രിയില് പ്രവേശിപ്പിച്ചത്. ഷംസുദ്ദീന്റെ ഇടത് കണ്പോളയ്ക്കു സമീപം 10 തുന്നലുണ്ട്. പ്രതികളെ തിരിച്ചറിഞ്ഞിട്ടുണ്ടെന്നും അവര് ഒളിവിലാണെന്നും മങ്കട പോലീസ് പറഞ്ഞു. പ്രവാസിയായ ഷംസുദ്ദീന് അവധിയില് വന്നതായിരുന്നു.
