ന്യൂഡല്‍ഹി: പെരുമ്പാവൂരിലെ നിയമവിദ്യാര്‍ത്ഥിയുടെ കൊലക്കേസില്‍ പ്രതിയായ അന്യസംസ്ഥാനക്കാരന്‍ അമീറുള്‍ ഇസ്‌ളാമിന് തന്നെ ജയിലില്‍ ആരെങ്കിലും അപായപ്പെടുത്തുമോ എന്ന് ആശങ്ക. ആത്മഹത്യാപ്രേരണയോ മറ്റൊന്നുമില്ലാത്ത ഇയാള്‍ക്ക് ഒറ്റയ്ക്ക് ജീവിക്കാന്‍ ഇഷ്ടം. 2017 മുതല്‍ തൃശൂര്‍ വിയ്യൂര്‍ സെന്‍ട്രല്‍ ജയിലില്‍ വധശിക്ഷ കാത്തു കഴിയുന്ന അമീറുള്‍ ഇസ്‌ളാമിനെ പരിശോധിച്ചതിന്റെ റിപ്പോര്‍ട്ട് തൃശൂര്‍ മെഡിക്കല്‍ കോളേജിലെ വിദഗ്ദ്ധ ഡോക്ടര്‍മാര്‍ തയ്യാറാക്കി സുപ്രീംകോടതിക്ക് സമര്‍പ്പിച്ചു.
അമീറുള്‍ ഇസ്‌ളാമിന്റെ മനോനിലയില്‍ പ്രശ്‌നമില്ലെന്നും ഡോക്ടര്‍മാര്‍ കണ്ടെത്തി. ഉത്ക്കണ്ഠയോ ആകുലതയോ ഭയമോ അമീറുളിനെ അലട്ടുന്നില്ല. ഞരമ്പു സംബന്ധമായ അസുഖങ്ങളുമില്ല. ആത്മഹത്യാപ്രവണതയോ ഇല്ല. എന്നിരുന്നാലും ആരൊക്കെയോ തന്നെ അപായപ്പെടുത്താന്‍ ശ്രമിച്ചേക്കുമെന്ന സംശയം ഇടയ്ക്കിടെ ഉണ്ടാകുന്നുണ്ട്. ഇക്കാര്യം അമീറുള്‍ ഇസ്‌ളാം പ്രകടിപ്പിച്ചിരുന്നതായും റിപ്പോര്‍ട്ടില്‍ പറയുന്നു.
തൃശൂര്‍ മെഡിക്കല്‍ കോളേജിലെ മനശ്ശാസ്ത്രജ്ഞര്‍, മനോരോഗ വിദഗ്ദ്ധര്‍, ന്യൂറോളജിസ്റ്റുകള്‍ എന്നിവര്‍ അടങ്ങിയ മെഡിക്കല്‍ ടീമാണ് പരിശോധന നടത്തിയത്. വിയ്യൂര്‍ സെന്‍ട്രല്‍ ജയിലിലെ സൂപ്രണ്ട് തയ്യാറാക്കിയ സ്വഭാവ സര്‍ട്ടിഫിക്കറ്റും കോടതിക്ക് സംസ്ഥാന സര്‍ക്കാര്‍ കൈമാറിയിട്ടുണ്ട്. ജയിലിലെ കുറ്റങ്ങള്‍ക്ക് ഇത് വരെയും ശിക്ഷിക്കപ്പെട്ടിട്ടില്ലെന്നും ജയില്‍ സൂപ്രണ്ട് റിപ്പോര്‍ട്ട് നല്‍കിയിട്ടുണ്ട്.
ജയിലില്‍ നിലവില്‍ പച്ചക്കറി തോട്ടത്തില്‍ ജോലി ചെയ്യുന്ന അമീറുള്‍ പ്രതിദിനം 127 രൂപ കൂലി വാങ്ങുന്നു. ആദ്യം പേപ്പര്‍ നിര്‍മ്മാണ യൂണിറ്റിലേക്കും പിന്നീട് ബാഗ് നിര്‍മ്മാണ യൂണിറ്റിലേക്കും മാറ്റിയിരുന്നു. ജോലി കൃത്യമായി ചെയ്യുന്നുണ്ടെന്നും ജയില്‍ സൂപ്രണ്ടിന്റെ റിപ്പോര്‍ട്ടില്‍ വ്യക്തമാക്കുന്നു. പെരുമ്പാവൂരിലെ നിയമവിദ്യാര്‍ഥിനയുടെ കൊലപാതകത്തില്‍ അമീറുള്‍ ഇസ്ലാമിന്റെ വധശിക്ഷ നേരത്തെ സുപ്രീം കോടതി സ്റ്റേ ചെയ്തിരുന്നു. തുടര്‍ന്ന് കോടതി നിര്‍ദേശിച്ചതിന്റെ അടിസ്ഥാനത്തിലാണ് ഇയാളുടെ മനശാസ്ത്ര, സ്വഭാവ സര്‍ട്ടിഫിക്കറ്റ് സുപ്രീം കോടതിക്ക് കൈമാറിയത്. ഈ റിപ്പോര്‍ട്ടുകള്‍ കൂടി പരിഗണിച്ചാകും വധശിക്ഷയ്ക്ക് എതിരേ അമീറുള്‍ ഇസ്ലാം നല്‍കിയ ഹര്‍ജി പരിഗണിക്കുക..
Comments