സ്വാര്ത്ഥത നിറഞ്ഞ ലോകത്താണ് നാം ഇന്ന് ജീവിക്കുന്നത്. എവിടെ നോക്കിയാലും പരസ്പപരം സ്നേഹമില്ലായ്മയും വിദ്വേഷവും മാത്രമാണ് നാം കാണുന്നത്. എന്നാല് ഇതിനിടയിലും സഹജീവി സ്നേഹം നിലനിര്ത്തുന്ന നിരവധി ആളുകള് നമ്മുക്ക് ചുറ്റുമുണ്ട്. അത്തരത്തിലൊരു വീഡിയോയാണ് ഇപ്പോള് സോഷ്യല് മീഡിയയില് ശ്രദ്ധ നേടിക്കൊണ്ടിരിക്കുന്നത്.
@NepalInReels എന്ന ഇന്സ്റ്റാഗ്രാം അക്കൗണ്ടില് നിന്നാണ് വീഡിയോ സോഷ്യല് മീഡിയയില് പങ്കുവച്ചിരിക്കുന്നത്. ഇലക്ട്രിക്ക് വയറില് കുടുങ്ങിയ ഒരു പ്രാവിനെ രക്ഷിക്കാന് വേണ്ടി കുറച്ച് മനുഷ്യര് ഒത്തുചേര്ന്ന് ശ്രമിക്കുന്നതാണ് വീഡിയോയില് കാണാന് സാധിക്കുന്നത്. വീഡിയോ തുടങ്ങുമ്പോള് തന്നെ കാണുന്നത് ഒരു വാഹനം വന്ന് നിര്ത്തുന്നതാണ്. അതിന് പിന്നിലൂടെ ഒരു യുവാവ് വാഹനത്തിന്റെ മുകളില് കയറുന്നു. അയാള് ഇലക്ട്രിക് വയറില് കുടുങ്ങിയ പ്രാവിനെ രക്ഷിക്കാന് ശ്രമിക്കുന്നതാണ് കാണുന്നത്.
എന്നാല്, അത് ഉയരത്തിലായതിനാല് തന്നെ യുവാവിന് അതിനെ രക്ഷിക്കാന് സാധിക്കുന്നില്ല. പിന്നാലെ, മറ്റൊരാള് കൂടി അയാളുടെ സഹായത്തിന് വേണ്ടി വാഹനത്തിന് മുകളിലേക്ക് കയറുന്നത് കാണാം. അയാള്ക്കും പ്രാവിനെ രക്ഷിക്കാന് കഴിയുന്നില്ല. അതോടെ ഒരാളുടെ ചുമലില് മറ്റൊരാള് കയറുകയാണ്. ശേഷം പ്രാവിനെ കയ്യിലെടുക്കുന്നു. ചുമലില് നിന്നും ഇറങ്ങിയ ശേഷം വാഹനത്തിന് താഴെ നിന്ന ആളുകള്ക്ക് പ്രാവിനെ കൈമാറുന്നു. അവര് വയറില് നിന്നും പ്രാവിനെ സ്വതന്ത്രമാക്കാന് ശ്രമിക്കുന്നത് കാണാം.
അങ്ങനെ എല്ലാവരും കൂടി പ്രാവിനെ സ്വതന്ത്രമാക്കുന്നു. അത് ആശ്വാസത്തോടെ പറന്നു പോകുന്നതും വീഡിയോയില് കാണാം. വളരെ പെട്ടെന്നാണ് വീഡിയോ ആളുകളുടെ ഹൃദയം കവര്ന്നത്. ഒരുപാടുപേര് വീഡിയോയ്ക്ക് കമന്റുകളുമായും എത്തിയിട്ടുണ്ട്. നിങ്ങള് ശരിക്കും ഹീറോകളാണ് എന്നാണ് ഒരാള് കമന്റ് നല്കിയത്. ദൈവം നിങ്ങളെ രക്ഷിക്കട്ടെ എന്നായിരുന്നു മറ്റ് ചിലരുടെ കമന്റ്.
