കൊച്ചി: ഹണി റോസിന്റെ പരാതിയില് ബോബി ചെമ്മണ്ണൂരിന് ജാമ്യം അനുവദിച്ച വിധിയില് രൂക്ഷപരാമര്ശവുമായി ഹൈക്കോടതി. ബോബി ചെമ്മണ്ണൂരിനെതിരെ പ്രഥമദൃഷ്ട്യാ കുറ്റം നിലനില്ക്കുമെന്ന് ജാമ്യം അനുവദിച്ചു കൊണ്ടുള്ള ഉത്തരവില് കോടതി വ്യക്തമാക്കി. ബോബി ചെമ്മണ്ണൂര് മറ്റുള്ളവരുടെ വക്കാലത്ത് ഏറ്റെടുക്കേണ്ടതില്ലെന്നും ശരീരത്തെ ആക്ഷേപിക്കുന്നത് അംഗീകരിക്കാനാകില്ലെന്നും ഹൈക്കോടതി ഉത്തരവില് പറഞ്ഞിട്ടുണ്ട്.
വേഷത്തിലൂടെയോ രൂപത്തിലൂടെയോ ഒരാള് സ്ത്രീയെ വിലയിരുത്തുമ്പോള് വിലയിരുത്തപ്പെടുന്നത് സ്ത്രീയല്ല സ്വയം അയാള് തന്നെയാണെന്നാണ് വിധിയില് ജസ്റ്റിസ് പി വി കുഞ്ഞികൃഷ്ണന് ചൂണ്ടിക്കാണിച്ചിരിക്കുന്നത്. സ്റ്റീവ് മര്ബോളിയെന്ന അമേരിക്കന് മോട്ടിവേഷന് സ്പീക്കറെ ഉദ്ധരിച്ചാണ് കോടതിയുടെ പരാമര്ശം. മറ്റുള്ളവരെക്കുറിച്ച് പരാമര്ശം നടത്തുമ്പോള് എല്ലാവരും ജാഗ്രത പുലര്ത്തണമെന്നും കോടതി ഉത്തരവില് വ്യക്തമാക്കിയിട്ടുണ്ട്. കേസ് നിലനില്ക്കില്ലെന്ന വാദം അംഗീകരിക്കാനാകില്ലെന്നും ഹൈക്കോടതി ചൂണ്ടിക്കാണിച്ചു. സ്ത്രീയാണെങ്കിലും പുരുഷനാണെങ്കിലും മറ്റുള്ളവരെ കുറിച്ച് അഭിപ്രായം പറയുമ്പോള് ജാഗ്രത പാലിക്കണമെന്നും ഉത്തരവില് പരാമര്ശമുണ്ട്. ബോബി ചെമ്മണ്ണൂരിന്റെ വാക് പ്രയോഗം ദ്വയാര്ത്ഥത്തില് തന്നെയാണെന്ന് കോടതി വ്യക്തമാക്കി. പ്രതിയുടേത് ദ്വയാര്ത്ഥ പ്രയോഗമാണെന്ന് ഏതൊരു മലയാളിക്കും ലളിതമായി മനസിലാകും.
ബോബി ചെമ്മണ്ണൂര് മറ്റുള്ളവരുടെ വക്കാലത്ത് ഏറ്റെടുക്കേണ്ടതില്ലെന്നും ഹൈക്കോടതി വ്യക്തമാക്കി.ബോബിയുടെ ജാമ്യഹര്ജിയെ സര്ക്കാര് കോടതിയില് എതിര്ത്തു. ബോബി ചെമ്മണ്ണൂരിനെ കസ്റ്റഡിയില് വിടുന്നതെന്തിനെന്ന് കോടതി ചോദിച്ചു. പ്രതി നടിയെ തുടര്ച്ചയായി അപമാനിച്ചെന്നും നിരന്തരം അശ്ലീലപരാമര്ശം നടത്തിയെന്നും സര്ക്കാര് അഭിഭാഷകന് മറുപടി നല്കി. ഈ സംഭവം സമൂഹത്തിന് ഒരു സന്ദേശമാകണമെന്നും പ്രോസിക്യൂഷന് പറഞ്ഞു. എന്നാല് പ്രതി റിമാന്ഡിലായപ്പോള് തന്നെ സമൂഹത്തിന് സന്ദേശം ലഭിച്ചുകഴിഞ്ഞെന്നാണ് കോടതി നല്കിയ മറുപടി.
