ഇസ്ളാമാബാദ്: 231 മില്യണ് ഡോളറിന്റെ അല് ഖാദിര് ട്രസ്റ്റ് അഴിമതി കേസില് പാകിസ്ഥാന് മുന് പ്രധാനമന്ത്രി ഇമ്രാന് ഖാനെ 14 വര്ഷം തടവിന് ശിക്ഷിച്ചു. ഇമ്രാന്റെ ഭാര്യ ബുഷ്റ ബീബിയെയും കേസില് ഏഴ് വര്ഷം തടവിന് ശിക്ഷിച്ചു. ഖാനെ മാസങ്ങളായി തടവില് പാര്പ്പിച്ചിരിക്കുന്ന അദിയാല ജയിലിലെ ഒരു താല്ക്കാലിക കോടതി മുറിയില് ജഡ്ജി നാസിര് ജാവേദ് റാണ ശിക്ഷ വിധിച്ചതായി പാക് പത്രങ്ങള് പറയുന്നു.
തടവുശിക്ഷയ്ക്കൊപ്പം, ഇമ്രാന് ഖാനും ബുഷ്റ ബീബിയും യഥാക്രമം ഒരു മില്യണ് പികെആര് (3592.3 ഡോളര്), പികെആര് 500,000 (1796.1) എന്നിങ്ങനെ പിഴയടക്കാനും ഉത്തരവിട്ടിട്ടുണ്ട്. പിഴയടച്ചില്ലെങ്കില് ഖാന്റെ ശിക്ഷ ആറ് മാസത്തേക്ക് കൂടിയും ഭാര്യയുടേത് മൂന്ന് മാസത്തേക്കു കൂടിയും നീട്ടും. ശിക്ഷാവിധിക്ക് ശേഷം, ഖാന്, മാധ്യമങ്ങള്ക്ക് നല്കിയ പ്രസ്താവനയില്, അധികാരികളുമായി 'ഒരു കരാറും' ചെയ്യില്ലെന്ന് പ്രതിജ്ഞയെടുത്തു. ''ഞാന് ഒരു കരാറും ഉണ്ടാക്കുകയോ ആശ്വാസം തേടുകയോ ചെയ്യില്ല,'' അദ്ദേഹം പറഞ്ഞു.
പാകിസ്ഥാന് തെഹ്രീക്-ഇ-ഇന്സാഫ് (പിടിഐ) പാര്ട്ടിയുടെ സ്ഥാപകന്, കേസുകള് രാഷ്ട്രീയ പ്രേരിതമാണെന്നും അധികാരത്തില് തിരിച്ചെത്തുന്നതില് നിന്ന് തന്നെ തടഞ്ഞുനിര്ത്താനുള്ള ഒരു മാര്ഗമാണെന്നും വാദിക്കുന്നു. കേസുമായി യാതൊരു ബന്ധവുമില്ലാത്ത വീട്ടമ്മയാണ് ബുഷ്റ ബീബിയെന്നും തന്നെ വേദനിപ്പിക്കാനാണ് ശിക്ഷ ലഭിച്ചതെന്നും ഖാന് അവകാശപ്പെട്ടു.
കഴിഞ്ഞ ഒരു മാസത്തിനിടെ കേസിലെ ശിക്ഷാവിധി പലതവണ വൈകിയിരുന്നു. 190 മില്യണ് പൗണ്ട് നാഷണല് ക്രൈം ഏജന്സി എന്ന അല്-ഖാദിര് ട്രസ്റ്റ് കേസ് അഴിമതിയുടെയും അധികാര ദുര്വിനിയോഗത്തിന്റെയും ആരോപണങ്ങളെ ചുറ്റിപ്പറ്റിയാണ് കേസ്.
