വ്യയ്യാമം ചെയ്യുന്നതിനിടയില് ദേഹാസ്വാസ്ഥ്യം അനുഭവപ്പെട്ടപ്പോള് ആര്ട്ടിഫിഷ്യല് ഇന്റലിജന്സ് ചാറ്റ്ബോട്ട് ചാറ്റ് ജിപിടി അതിന്റെ കാരണം കണ്ടെത്തിയെന്നും ഡോക്ടര്മാര് രോഗം തിരിച്ചറിയുന്നതിന് മുമ്പ് തന്നെ ചാറ്റ്ബോട്ടിന് തന്റെ അസുഖം കണ്ടെത്താനായെന്നുമാണ് യുവാവിന്റെ സോഷ്യല് മീഡിയ പോസ്റ്റ്. തന്റെ അപൂര്വ്വ വൃക്കരോഗമാണ് ചാറ്റ്ജിപിടി കണ്ടെത്തി ജീവന് രക്ഷിച്ചതായി യുവാവ് വെളിപ്പെടുത്തുന്നത്. റെഡിറ്റില് പോസ്റ്റ് ചെയ്ത കുറിപ്പില് തന്റെ വൃക്കകളെ ഗുരുതരമായ ആഘാതത്തില് നിന്ന് ചാറ്റ് ജിപിടി രക്ഷിച്ചെന്നും ഇയാള് വ്യക്തമാക്കുന്നു.
ഒരാഴ്ച മുമ്പ് താന് വര്ക്കൗട്ട് ചെയ്തുകൊണ്ടിരുന്നപ്പോള് ശരീരം പെട്ടെന്ന് തളര്ന്നു പോവുകയും നിശ്ചലമായി പോവുകയും ചെയ്തു എന്നാണ് അദ്ദേഹം പറയുന്നത്. കൂടാതെ തനിക്ക് നിര്ജ്ജലീകരണം അനുഭവപ്പെട്ടതായും അദ്ദേഹം പറയുന്നു. തുടര്ന്ന് രണ്ടുദിവസം കൂടി തനിക്ക് ദേഹാസ്വാസ്ഥ്യം അനുഭവപ്പെട്ടു. അതോടെ തന്റെ രോഗത്തെക്കുറിച്ച് കൂടുതല് അറിയാന് ചാറ്റ് ജിപിടിയുടെ സഹായം തേടുകയായിരുന്നു എന്നുമാണ് ഇദ്ദേഹം പറയുന്നത്. രോഗലക്ഷണങ്ങള് മനസ്സിലാക്കി ചാറ്റ് ജിപിടി തന്റെ രോഗം കണ്ടെത്തിയെന്നും റാബ്ഡോമിയോലിസിസ് എന്ന രോഗാവസ്ഥയാണ് തനിക്കെന്ന് മനസ്സിലാക്കിത്തന്നു എന്നുമാണ് അദ്ദേഹം പറയുന്നത്.
കൂടാതെ ഉടന്തന്നെ വൈദ്യസഹായം തേടാന് നിര്ദ്ദേശം നല്കിയതായും അതുപ്രകാരം ആശുപത്രിയിലെത്തി പരിശോധനകള് നടത്തിയപ്പോള് രോഗം അതുതന്നെയാണെന്ന് സ്ഥിരീകരിക്കുകയായിരുന്നു എന്നുമാണ് പോസ്റ്റില് വ്യക്തമാക്കുന്നത്. പരിക്ക് അല്ലെങ്കില് അമിതമായ വ്യായാമം എന്നിവയുടെ ഫലമായി പേശികള് തകരുന്ന അപൂര്വ രോഗാവസ്ഥയാണ് റാബ്ഡോമിയോളിസിസ്. ആശുപത്രിയില് ചികിത്സ തേടി ഒരാഴ്ച കാലത്തോളം അവിടെ കഴിഞ്ഞു എന്നുമാണ് ഇദ്ദേഹം പറയുന്നത്.
പോസ്റ്റ് വളരെ വേഗത്തില് സോഷ്യല് മീഡിയയില് വൈറലായി. എന്നാല്, ഓര്ക്കുക യാതൊരു കാരണവശാലും ഇന്റര്നെറ്റിനെ ആശ്രയിച്ച് സ്വയം രോഗനിര്ണയം നടത്തി ചികിത്സ നടത്തരുത്. ഇത്തരം പ്രവൃത്തികള് ജീവന് നഷ്ടമാകുന്നതിന് വരെ കാരണമായേക്കാം എന്നാണ് വിദഗ്ദ്ധര് മുന്നറിയിപ്പു നല്കുന്നത്. അതിനാല്, ഇങ്ങനെ എന്തെങ്കിലും ലക്ഷണങ്ങള് കണ്ടാല് ഉടന് തന്നെ ആശുപത്രിയില് പോവുക.
