പാടാന് മാത്രമല്ല അഭിനയവും തനിക്ക് വഴങ്ങുമെന്ന് തെളിയിച്ചിരിക്കുകയാണ് അഭയ ഹിരണ്മയി. ജോജു ജോര്ജ് സംവിധാനം ചെയ്ത പണിയിലൂടെയായിരുന്നു അഭയ അഭിനേത്രിയായത്. അവസരം ലഭിച്ചാല് അഭിനയിക്കാനും തയ്യാറാണെന്ന് നേരത്തെ തന്നെ അഭയ വ്യക്തമാക്കിയിരുന്നു. പാട്ടിനൊപ്പം തന്നെ ഫാഷനും മോഡലിംഗും ഡാന്സും ഇഷ്ടമാണെന്ന് ഗായിക പറഞ്ഞിരുന്നു.
വേദികളിലെല്ലാം അഭയയുടെ തകര്പ്പന് പ്രകടനം കാണാറുള്ളതുമാണ്. ജോജു ആദ്യമായി സംവിധായകനായപ്പോള് ആ ചിത്രത്തില് തനിക്കും വേഷം ലഭിച്ചതിന്റെ സന്തോഷം മുന്പ് അഭയ പങ്കുവെച്ചിരുന്നു. ചിത്രം കാണണമെന്നും, അഭിപ്രായം പറയണമെന്നും ഗായിക ആവശ്യപ്പെട്ടിരുന്നു. ഇപ്പോഴിതാ ചിത്രം ഒടിടിയിലും എത്തിയിരിക്കുകയാണ്.
ഈ ചിത്രത്തിലേക്ക് വിളിച്ചപ്പോള് അഭിനയം തനിക്ക് പറ്റുമോ എന്ന ആശങ്ക അഭയയെ അലട്ടിയിരുന്നു. വേണോ, വേണ്ടയോ എന്ന തരത്തിലുള്ള ആശയക്കുഴപ്പമുണ്ടായിരുന്നു. പിന്നീടാണ് എന്നാല് ഒന്ന് പരീക്ഷിച്ച് നോക്കാം എന്ന് തീരുമാനിച്ചത്. അഭിനയം ശരിയായില്ലെങ്കില് വഴക്ക് പറയരുതെന്ന് ജോജുവിനോട് പറഞ്ഞിരുന്നു. അഭിനേതാവ് കൂടിയായതിനാല് എന്താണ് വേണ്ടതെന്ന് കൃത്യമായി ജോജു പറഞ്ഞ് തരുമായിരുന്നു. ചില രംഗങ്ങള് ചെയ്യാന് കുറച്ച് ബുദ്ധിമുട്ടിയിരുന്നുവെന്നും അഭയ അഭിമുഖങ്ങളില് തുറന്നുപറഞ്ഞിരുന്നു.
മ്യൂസിക്കാണ് പ്രധാനമായും ഫോക്കസ് ചെയ്യുന്നത്. എന്നാല് അതിനെ ബാധിക്കാത്ത രീതിയില് അഭിനയവും കൊണ്ടുപോവാനാണ് ആഗ്രഹമെന്നും അഭയ വ്യക്തമാക്കിയിരുന്നു. കഴിഞ്ഞ ദിവസമായിരുന്നു 'പണി' ഒടിടിയില് റിലീസ് ചെയ്തത്. ചിത്രം കണ്ട് ഒത്തിരി പേര് മെസേജ് അയച്ചിരുന്നു. സിനിമയെക്കുറിച്ചുള്ള പ്രതികരണങ്ങള് കാണുമ്പോള് മനസ് നിറയുന്നു. മെസേജുകള്ക്കെല്ലാം മറുപടി തരാനാവുന്നില്ല, എല്ലാം ഞാന് കാണുന്നുണ്ട്. നിങ്ങളുടെ സ്നേഹം ഞാന് ശരിക്കും അറിയുന്നുണ്ട് എന്നും അഭയ പറയുന്നു.
വാനോളം പൊങ്ങുന്നുണ്ട് ഞാന് പക്ഷേ, എന്നും ഡൗണ് റ്റു എര്ത്തായിരിക്കണം എന്നാണ് ജീവിതം എനിക്ക് നല്കിയ പാഠം. സിനിമ മാജിക്കാണ്, 17 വര്ഷമായി ഞാനും സിനിമയുടെ ഭാഗമാണ്. ആളുകള് സിനിമയിലേക്ക് വരുന്നതും, അതില് തന്നെ മുഴുകി ജീവിക്കുന്നതും ഞാന് കാണുന്നുണ്ട്. മലയാള സിനിമയുടെ മാറ്റങ്ങളും ഞാന് അറിയുന്നുണ്ട്. കഴിവുള്ള എത്ര പേരാണ് സിനിമയിലുള്ളത്. ദൈവം എനിക്കും സിനിമയില് ഒരു മനോഹരമായ ഇടം തന്നു എന്നുമായിരുന്നു അഭയ കുറിച്ചത്. നിരവധി പേരാണ് അഭയയുടെ പോസ്റ്റിന് താഴെയായി സ്നേഹം അറിയിച്ചിട്ടുള്ളത്.
