സീരിയലുകളിലൂടെ എത്തി കുടുംബപ്രേക്ഷകരുടെ മനസ്സ് കീഴടക്കിയ ഒരുപാട് താരങ്ങളുണ്ട്. അതില് ചിലരൊക്കെ സിനിമയിലും തിളങ്ങിയിട്ടുണ്ട്. അക്കൂട്ടത്തില് എടുത്തു പറയാവുന്ന സീരിയല്- സിനിമാ താരമാണ് ഗായത്രി അരുണ്. അഭിനയത്തില് മാത്രമല്ല അവതാരകയായും ഗായത്രി കൈയടി നേടിയിട്ടുണ്ട്. എഴുത്തുകാരി എന്ന നിലയിലും താരം ശ്രദ്ധിക്കപ്പെട്ടിട്ടുണ്ട്. സോഷ്യല് മീഡിയയിലും തിളങ്ങി നില്ക്കുന്ന താരമാണ് ഗായത്രി. എല്ലാ വിശേഷങ്ങളും ഫോട്ടോയുമൊക്കെ താരം അതിലൂടെ പങ്കിടാറുണ്ട്.
ഇപ്പോഴിതാ ബഹ്റിനില് അവധിക്കാലം ആഘോഷമാക്കുകയാണ് ഗായത്രി. ഇത്തവണത്തേത് സോളോ ട്രാവല് ആണെന്ന് ഗായത്രി ഇൻസ്റ്റഗ്രാമില് പങ്കുവെച്ച പോസ്റ്റില് പറയുന്നു. ‘‘പാസ്പോര്ട്ട് പേജുകള് സ്റ്റാംപ് ചെയ്ത് നിറയുന്നത് വലിയൊരു സന്തോഷമാണ്...’’ എന്ന ക്യാപ്ഷനൊപ്പമാണ് ഗായത്രി ചിത്രം പങ്കിട്ടിരിക്കുന്നത്. ഒറ്റയ്ക്കും സുഹൃത്തുക്കള്ക്കൊപ്പവും കുടുംബത്തോടൊപ്പവുമൊക്കെ ഒരുപാട് യാത്ര ചെയ്യുന്ന താരമാണ് ഗായത്രി.
യാത്ര പ്രമേയമാക്കി ഗായത്രി അരുണ് രചിച്ച ഡി.സി ബുക്സ് പ്രസാധനം ചെയ്ത ‘യാത്രയ്ക്കപ്പുറം’ എന്ന പുസ്തകം കഴിഞ്ഞ മാസം പ്രകാശനം ചെയ്തിരുന്നു. കുടുംബത്തോടൊപ്പവും സുഹൃത്തുക്കളോടൊപ്പവും ഒറ്റക്കും ഗായത്രി നടത്തിയ യാത്രാ ഓർമകളിലൂടെയുള്ള ഒരു സഞ്ചാരമാണ് 'യാത്രയ്ക്കപ്പുറം'.
സിനിമാ സീരിയല് അഭിനയത്തോടൊപ്പം അവതരണവും പുസ്തകമെഴുത്തും വ്ലോഗിങ്ങും ബിസിനസുമെല്ലാം ഒരുമിച്ച് കൊണ്ടുപോകുന്ന താരമാണ് ഗായത്രി അരുണ്. ഇതിനു മുൻപ് ‘അച്ചപ്പം കഥകള്’ എന്ന മറ്റൊരു പുസ്തകവും ഗായത്രി പുറത്തിറക്കിയിട്ടുണ്ട്. യൂട്യൂബ് ചാനലിലൂടെയും ഗായത്രി തന്റെ വിശേഷങ്ങള് ആരാധകരോട് പങ്കുവെക്കാറുണ്ട്.
പരസ്പരം സീരിയലിലെ ദീപ്തി ഐപിഎസ് എന്ന കഥാപാത്രത്തിലൂടെയാണ് ഗായത്രി അരുണ് കുടുംബപ്രേക്ഷകര്ക്ക് പരിചിതയായത്. പിന്നീട് താരം സിനിമകളിലും തിളങ്ങി. മകള്ക്കൊപ്പം ഉള്ള ഗായത്രിയുടെ യൂട്യൂബ് വീഡിയോസ് എല്ലാം വളരെ പെട്ടന്ന് ശ്രദ്ധ നേടാറുണ്ട്. അഭിനേത്രി, അവതാരക, എഴുത്തുകാരി എന്നതിലുപരി സ്വന്തമായി ഒരു നെയില് ആർട്ട് സ്റ്റുഡിയോയും താരം സ്വന്തം നാടായ ചേർത്തലയില് അടുത്തിടെ ആരംഭിച്ചിരുന്നു. ബിസിനസ് ഒരിക്കലും തനിക്ക് വഴങ്ങില്ല എന്നു കരുതിയിരുന്നതാണെന്നും വളരെ പെട്ടെന്നെടുത്ത ഒരു തീരുമാനമായിരുന്നു പുതിയ സംരംഭത്തിന് പിന്നിലെന്നും ഗായത്രി പറഞ്ഞിരുന്നു. ഗായത്രിയുടെ ഭർത്താവും ഒരു ബിസിനസ്മാനാണ്.
