മൂലമറ്റം: കുപ്രസിദ്ധ ഗുണ്ട സാജന് സാമുവലിനെ കൊലപ്പെടുത്തിയ കേസില് ഏഴു പ്രതികളെ പോലീസ് അറസ്റ്റ് ചെയ്തു. മൂലമറ്റം തേക്കിന്കൂപ്പിനു സമീപം മൃതദേഹം ചാക്കില്കെട്ടി ഉപേക്ഷിച്ച നിലയില് കണ്ടെത്തിയ മേലുകാവ് എരുമാപ്ര സ്വദേശി പാറശേരിയില് സാജന് സാമുവലി(47)നെ കൊലപ്പെടുത്തിയ കേസിലാണ് ഏഴു പ്രതികളെ കാഞ്ഞാര് പോലീസ് അറസ്റ്റ് ചെയ്തത്.
മൂലമറ്റം സ്വദേശികളായ പൊരിയത്തുപറമ്പില് അഖില് രാജു (29), വട്ടമലയില് വി.ജെ. രാഹുല്(26), പുത്തന്പുരയ്ക്കല് അശ്വിന് കണ്ണന് (23), ആതുപ്പള്ളിയില് ഷാരോണ് ബേബി (22), അരീപ്ലാക്കല് ഷിജു ജോണ്സണ് (29), കാവനാല് പുരയിടത്തില് പ്രിന്സ് രാജേഷ് (24), പുഴങ്കരയില് മനോജ് രമണന് (33) എന്നിവരെയാണ് അറസ്റ്റ് ചെയ്തത്. ആകെ എട്ടു പ്രതികളാണ് കേസിലുള്ളത്. ഒരു പ്രതിയായ അറക്കുളം സ്വദേശി വിഷ്ണു ജയനെ പോലീസ് അന്വേഷിച്ചുവരുന്നു. വിഷ്ണു ജയന് കാപ്പ ചുമത്തപ്പെട്ട ആളാണ്. പാലാ ഡിവൈ.എസ്.പിയുടെയും കാഞ്ഞാര് പോലീസിന്റെയും നേതൃത്വത്തില് മൂലമറ്റത്തും ഇരുമാപ്രയിലും പ്രതികളെ കൊണ്ടുപോയി തെളിവെടുപ്പ് നടത്തി.
അറസ്റ്റിലായ പ്രതികളുമായി സാജന് പല തവണ ഏറ്റുമുട്ടിയിട്ടുണ്ട്. സാജന് ജീവിച്ചിരുന്നാല് തങ്ങളുടെ ജീവനു ഭീഷണിയാണെന്നു പ്രതികള് കരുതിയിരുന്നു. ഒരു വൃഷണം മുറിച്ചുകളയുകയും അടുത്തതു ചവിട്ടി തകര്ക്കുകയും കൈ വെട്ടിയെടുക്കുകയും ചെയ്ത നിലയിലായിരുന്നു. വായില് തുണി തിരുകി കമ്പിക്കു തലയ്ക്കടിച്ചും ശരീരം മുഴുവന് പരുക്കേല്പ്പിച്ചുമാണ് കൊലപ്പെടുത്തിയതെന്നു പ്രതികള് പോലീസിനോടു പറഞ്ഞു. പ്രതികളെല്ലാം നിരവധി കഞ്ചാവ് കേസുകളിലും മോക്ഷണക്കേസുകളിലും പ്രതികളാണ്.
രാഷ്ട്രീയ കക്ഷികളുടെ പിന്ബലവും പ്രതികളുടെ വളര്ച്ചയ്ക്കു കാരണമായതായി സൂചനയുണ്ട്. കൊലക്കേസ് ഉള്പ്പെടെ അനവധി കേസുകളില് പ്രതിയാണ് സാജന്. എരുമാപ്ര സി.എസ്.ഐ. പള്ളിയുടെ പെയിന്റിങിനു പോയതുമായി ബന്ധപ്പെട്ടാണു സാജനും പ്രതികളും തമ്മില് ബന്ധം ഉണ്ടാകുന്നത്. പെയിന്റിങ് പണിക്കു ചെന്ന യുവാക്കള്ക്ക് അവിടെ താമസിക്കാന് ഷട്ടര് ഇട്ട ഒരു മുറി വാടകയ്ക്കു കൊടുത്തിരുന്നു.
അവിടെവച്ചു യുവാക്കളും സാജനുമായി വാക്കുതര്ക്കം ഉണ്ടാകുകയും സാജനെ വായില് തുണിതിരുകി കമ്പിവടിക്കു തലയ്ക്കടിച്ചു കൊല്ലുകയും പായില് പൊതിഞ്ഞു മുട്ടം സ്വദേശിയുടെ ഓട്ടോറിക്ഷയില് കയറ്റി മൂലമറ്റത്തു തേക്കുംകുപ്പില് ഉപേക്ഷിക്കുകയും ആയിരുന്നു. രാത്രി വൈകി മജിസ്ട്രേറ്റിനു മുന്നില് ഹാജരാക്കി പ്രതികളെ റിമാന്ഡ് ചെയ്തു.
