ഡി4 ഡാൻസ് എന്ന റിയാലിറ്റി ഷോയിലൂടെ പ്രേക്ഷകര്ക്ക് മുന്നിലെത്തിയ താരം പിന്നീട് ‘ക്വീൻ’ എന്ന സിനിമയിലൂടെയാണ് അഭിനയ രംഗത്ത് അരങ്ങേറ്റം കുറിച്ചത്. അതിനു ശേഷം ഒരുപാട് സിനിമകളില് അഭിനയിച്ചെങ്കിലും ലൂസിഫറില് ചെയ്ത കഥാപാത്രമാണ് ഏറെ ശ്രദ്ധിക്കപ്പെട്ടത്. ഡാന്സ് റിയാലിറ്റി ഷോയിലൂടെയും സിനിമകളിലൂടെയും ഏറെ ശ്രദ്ധിക്കപ്പെട്ടിട്ടുള്ള താരം കൂടിയാണ് സാനിയ അയ്യപ്പന്. മലയാളത്തില് മാത്രമല്ല തമിഴിലും താരം തിളങ്ങിയിട്ടുണ്ട്. സോഷ്യല് മീഡിയയിലൂടെ റീല്സ് വീഡിയോയും ചിത്രങ്ങളും പങ്കിടുന്നതില് സാനിയ മുന്നിലാണ്. താരത്തിന്റെ ഹോട്ട് ലുക്കിലും ഗ്ലാമറായിട്ടുമുള്ള ചിത്രങ്ങള്ക്ക് വലിയ വിമര്ശനങ്ങളും നേരിടാറുണ്ട്.
ഇപ്പോഴിതാ സോഷ്യല് മീഡിയയിലെ ചില പേജുകള് നടിമാരുടെ ചിത്രങ്ങളും വീഡിയോകളും മറ്റും മോശമായ രീതിയില് അവതരിപ്പിക്കുന്നതിനെതിരെ തുറന്നടിക്കുകയാണ് സാനിയ. വര്ക്കൗട്ടിന്റെ വീഡിയോ ആണെങ്കില് പോലും മാറിടത്തിന്റെ ഭാഗം മാത്രം ഫോക്കസ് ചെയ്ത് സ്ലോ മോഷനാക്കി വീഡിയോകള് എഡിറ്റ് ചെയ്ത് ചില ആളുകള് പോസ്റ്റ് ചെയ്യുന്നത് കാണാറുണ്ടെന്ന് താരം പറയുന്നു. സാരിയുടുത്ത് ബീച്ചില് പോകാൻ കഴിയില്ലെന്നും, ബിക്കിനിയിടാൻ തനിക്ക് ഇഷ്ടമാണെന്നും, അതിന് ചേരുന്ന ബോഡി ഉണ്ടെന്നാണ് വിശ്വസിക്കുന്നതെന്നും സാനിയ പറഞ്ഞു. ക്യു സ്റ്റുഡിയോയ്ക്ക് നല്കിയ അഭിമുഖത്തിലാണ് താരം മനസുതുറന്നത്.
‘‘വര്ക്കൗട്ടിന്റെ വീഡിയോയോ അല്ലെങ്കില് നടക്കുന്നതിന്റെ വീഡിയോയോ സോഷ്യല് മീഡിയയില് പോസ്റ്റ് ചെയ്താല് അതില് നിന്ന് മാറിടത്തിന്റെ ഭാഗം മാത്രം ഫോക്കസ് ചെയ്ത് സ്ലോമോഷനാക്കി ആളുകള് എഡിറ്റ് ചെയ്യാറുണ്ട്. ഒരിക്കല് ഞാനൊരു വീഡിയോ ഇൻസ്റ്റാഗ്രാമില് സ്റ്റോറി ഇട്ടിരുന്നു. 20-25 മിനിറ്റ് പിന്നിടുമ്പോഴേക്കും എന്നെ ടാഗ് ചെയ്തു കൊണ്ട് ആ സ്ലോ മോഷൻ വീഡിയോ ആരോ പോസ്റ്റ് ചെയ്തു. അത്രത്തോളം ഡെസ്പറേറ്റ് ആയിട്ട് നോക്കിയിരിക്കുന്ന ആള്ക്കാരാണ് സോഷ്യല് മീഡിയയിള് ഉള്ളത്. ഇതുപോലെ കുറെ പേജുകള് ഉണ്ട്. ചിലതില് പല നടിമാരുടെയും തല ഉണ്ടാകും, ഉടല് മറ്റാരുടെയെങ്കിലും ബിക്കിനിയിട്ടുള്ള ഫോട്ടോ വെച്ച് എഡിറ്റ് ചെയ്തവയായിരിക്കും.
സാരിയുടുത്ത് ബീച്ചില് പോകാൻ കഴിയില്ലലോ. എനിക്ക് ബിക്കിനി ധരിക്കാൻ ഇഷ്ടമാണ്. അതിന് ചേരുന്ന ബോഡി തനിക്കുണ്ടെന്ന് വിശ്വസിക്കുന്നു. ഇനി അങ്ങനെ ഇല്ലെങ്കിലും എനിക്ക് ആത്മവിശ്വാസം ഉണ്ട്. ഞാൻ എന്ത് ധരിക്കണമെന്ന് തീരുമാനിക്കുന്നത് ഞാൻ ആണ്. എനിക്ക് സാരിയുടുത്ത് ബീച്ചില് പോകാൻ ഇഷ്ടമല്ലാത്തത് കൊണ്ട് ബിക്കിനി ഇട്ട് പോകുന്നു. എന്നാല് ബിക്കിനി ഇടാത്ത നടിമാരുടെ പോലും അത്തരത്തിലുള്ള എഡിറ്റ് ചെയ്ത ഫോട്ടോസ് ഞാൻ കണ്ടിട്ടുണ്ട്. ഇതില് നിന്ന് അവർക്ക് എന്ത് സംതൃപ്തിയാണ് ലഭിക്കുന്നതെന്ന് അറിയില്ല...’’ സാനിയ പറയുന്നു.
അഭിമുഖത്തില് ആദ്യ മാലദ്വീപ് യാത്രയുടെ സമയത്തുണ്ടായ ഒരു അനുഭവവും സാനിയ പങ്കുവെച്ചു. ‘‘പത്തിലോ പന്ത്രണ്ടിലോ പഠിക്കുന്ന ഒരു പയ്യൻ പോസ്റ്റിന് താഴെയിട്ട ഒരു കമന്റ് ഇങ്ങനെയായിരുന്നു. ‘ഇത്ര കഴപ്പാണെങ്കില് ഇവളെ ഡല്ഹി ബസില് കയറ്റി വിടാം...’ എന്ന്. 16 വയസുള്ള കുട്ടി ചിന്തിക്കുന്നത് ഇങ്ങനെയാണ്. ഇങ്ങനെ ഒരു തലമുറയിലാണ് നമ്മള് ജീവിക്കുന്നത്. ഇതിനോടെല്ലാം എങ്ങനെ പ്രതികരിക്കണം എന്ന് അറിയില്ല...’’ സാനിയ പറയുന്നു.
