തിരുവനന്തപുരം: പകുതി വില തട്ടിപ്പ് കേസില് സായി ഗ്രാമം ഗ്ലോബല് ട്രസ്റ്റ് ചെയര്മാന് കെ എന് ആനന്ദകുമാര് മുന്കൂര് ജാമ്യം തേടി. തിരുവനന്തപുരം ജില്ലാ സെഷന്സ് കോടതിയിലാണ് ജാമ്യാപേക്ഷ നല്കിയത്. പലയിടങ്ങളിലായി പോലീസ് കേസ് റജിസ്റ്റര് ചെയ്ത സാഹചര്യത്തിലാണ് ആനന്ദകുമാര് മൂന്കൂര്ജാമ്യം തേടിയിരിക്കുന്നത്. കേസിലെ പ്രധാനപ്രതി അനന്തുവിന്റെ ജാമ്യാപേക്ഷ നാളെ പരിഗണിക്കും.
കണ്ണൂരിലും തൊടുപുഴയിലുമാണ് ആനന്ദകുമാറിനെതിരേ കേസെടുത്തിരിക്കുന്നത്. രണ്ടിടത്തും ഇയാള് പ്രധാനപ്രതിയാണ്. ആനന്ദകുമാറാണ് എന്ജിഒ കോണ്ഫഡറേഷന് ചെയര്മാനെന്ന് പകുതി വില തട്ടിപ്പ് കേസ് പ്രതി അനന്തു കൃഷ്ണന് പറഞ്ഞിരുന്നു. ഇയാള് ഉറപ്പ് നല്കിയ സിഎസ്ആര് ഫണ്ട് കിട്ടിയില്ലെന്നും പറഞ്ഞു. അനന്തുവിന്റെ ജാമ്യാപേക്ഷ നാളെ പരിഗണിക്കുമെന്ന് മൂവാറ്റുപുഴ ജുഡീഷ്യല് ഒന്നാം ക്ലാസ്സ് മജിസ്ട്രേറ്റ് കോടതി അറിയിച്ചു. അതിനിടെ ആനന്ദകുമാര് മുങ്ങിയോയെന്ന സംശയവും ഉയരുന്നുണ്ട്.
ആനന്ദകുമാറിന്റെ ശാസ്തമംഗലത്തെ വീട് പൂട്ടിയ നിലയലാണ്. അഞ്ചുജില്ലകളിലായി 34 കേസുകളാണ് പകുതിവില തട്ടിപ്പില് എടുത്തിരിക്കുന്നത്. കേസ് അന്വേഷണം ക്രൈം ബ്രാഞ്ചിന് കൈമാറാന് തീരുമാനമായിട്ടുണ്ട്. കണ്ണൂര്, എറണാകുളം, കോട്ടയം, ഇടുക്കി, ആലപ്പുഴ എന്നീ ജില്ലകളിലെ വിവിധ പൊലീസ് സ്റ്റേഷുകളില് രജിസ്റ്റര് ചെയ്ത കേസുകള് 37 കോടിയുടേതുവരും. മറ്റു ജില്ലകളിലുള്ള പരാതികളും രജിസ്റ്റര് ചെയ്യുന്ന മുറയ്ക്ക് ക്രൈം ബ്രാഞ്ചിന് കൈമാറാനാണ് തീരുമാനം. 15 ദിവസത്തിനകം പ്രാഥമികാന്വേഷണം പൂര്ത്തിയാക്കും.
നാഷണല് എന്ജിഒ കോണ്ഫെഡറേഷന് എന്ന പേരില് കൂട്ടായ്മ രൂപീകരിച്ചായിരുന്നു അനന്തു കൃഷ്ണന്റെ പകുതി വില തട്ടിപ്പ്. പ്രധാന കമ്പനികള് നിര്ബന്ധപൂര്വം ചെലവഴിക്കേണ്ട സാമൂഹ്യ പ്രതിബദ്ധതാ ഫണ്ട് (സിഎസ്ആര്) ഉപയോഗിച്ച് പകുതിവില സബ്സിഡി നല്കി ഇരുചക്രവാഹനം, ലാപ്ടോപ്പ്, തയ്യല് മെഷീന്, ഗൃഹോപകരണങ്ങള് എന്നിവ നല്കുമെന്നുമായിരുന്നു വാഗ്ദാനം.
