തിരുവനന്തപുരം : ആയിരക്കണക്കിനാളുകളെ വഞ്ചിച്ച പാതി വില തട്ടിപ്പിന്റെ സൂത്രധാരന് ആനന്ദ് കുമാറെന്ന് റിപ്പോര്ട്ട്. എന്ജിഒ കോണ്ഫെഡറേഷന് ഒരു കറക്കു കമ്പനി ആണെന്നും ട്രസ്റ്റിന്റെ പൂര്ണ അധികാരി ആനന്ദകുമാറെന്നും തെളിയിക്കുന്ന രേഖകള് മാധ്യമങ്ങള് പുറത്തുവിട്ടു. എന്ജിഒ കോണ്ഫെഡറേഷന്റെ ആജീവനാന്ത അംഗമാണ് ആനന്ദകുമാറെന്നും റിപ്പോര്ട്ടില് പറയുന്നു.
ആനന്ദകുമാറിനൊപ്പം അനന്തുകൃഷ്ണനും എന്ജിഒ കോണ്ഫെഡറേഷന് സ്ഥാപക അംഗമാണെന്നും രേഖകളില് നിന്നും വ്യക്തമാണ്. ഇവര്ക്ക് പുറമേ ഷീബ സുരേഷ്, ജയകുമാരന് നായര്, ബീന എന്നിവരാണ് മറ്റ് സ്ഥാപക അംഗങ്ങളെന്ന് രേഖയില് പറയുന്നു. തട്ടിപ്പിന് പിന്നില് അനന്തുകൃഷ്ണനാണെന്നും തനിക്ക് പങ്കില്ലെന്നുമുള്ള ആനന്ദകുമാറിന്റെ വാദം പൊളിക്കുന്നതാണ് വാര്ത്താചാനലുകള് പുറത്തുവിട്ടിട്ടുള്ള രേഖകള്.
ജസ്റ്റിസ് സിഎന്.രാമചന്ദ്രന് നായരായിരിക്കും ഉപദേശക സമിതിയുടെ ചെയര്മാനെന്ന കാര്യവും ട്രസ്റ്റ് ഡീഡില് തന്നെ വ്യക്തമാക്കിയിട്ടുണ്ട്. അനന്തു കൃഷ്ണന്റെ ഉടമസ്ഥതയിലുളള പ്രൊഫഷണല് സര്വീസസ് ഇന്നവേഷന് എന്ന സംഘടനയ്ക്കാവും പാതിവിലയ്ക്ക് സാധനങ്ങള് നല്കുന്നതിന്റെ ഉത്തരവാദിത്തമെന്നതും രേഖയിലുണ്ട്. അഞ്ച് പേര്ക്കും പിന്തുടര്ച്ചാവകാശമുണ്ടെന്നും രേഖകളില് പറയുന്നു.
കൂടുതല് അംഗങ്ങളെ നിര്ദ്ദേശിക്കാനുള്ള അധികാരവും ചെയര്മാനായ ആനന്ദകുമാറിനാണ്. ആജീവനാന്തന ചെയര്മാനാണെങ്കിലും ആനന്ദ് കുമാറിന് എപ്പോ വേണമെങ്കിലും രാജി വയ്ക്കാം. പുതിയ ആളെ നിര്ദ്ദേശിക്കാനുള്ള അധികാരവും ആനന്ദ് കുമാറിനാണ്. ആനന്ദകുമാറിന്റെ മുന്വാദങ്ങളുടെ മുനയൊടിക്കുന്ന രേഖയ്ക്ക് കേസ് അന്വേഷണത്തില് നിര്ണായക സ്ഥാനമുണ്ടെന്ന് ക്രൈംബ്രാഞ്ച് വിലയിരുത്തുന്നു.
ആനന്ദകുമാറിനൊപ്പം, കൊച്ചി ആസ്ഥാനമായി പ്രവര്ത്തിക്കുന്ന കള്ച്ചറല് അക്കാദമി ഫോര് പീസ് എന്ന സംഘടനയ്ക്ക് നേതൃത്വം നല്കുന്ന ബീനയുടെ പങ്കിനെക്കുറിച്ചും സമഗ്ര അന്വേഷണം നടത്തുന്നുണ്ട്. അനന്തുകൃഷ്ണന് രൂപീകരിച്ച എന്ജിഒ കോണ്ഫെഡറേഷന്റെ അധ്യക്ഷയായ ബീനയ്ക്ക് തട്ടിപ്പിനെ കുറിച്ച് നേരത്തെ തന്നെ സൂചന കിട്ടിയിരുന്നെന്നാണ് വിലയിരുത്തല്.
