ഹൈദരാബാദ്: തെലങ്കാനയില് സ്കൂളിലേക്ക് നടക്കുന്നതിനിടെ പത്താം ക്ലാസ് വിദ്യാര്ത്ഥി ഹൃദയാഘാതം മൂലം മരിച്ചു. സ്കൂളിലേക്ക് പോകുന്നതിന് ഇടയില് തൊട്ടടുത്തുവെച്ച് നെഞ്ചുവേദന അനുഭവപ്പെട്ടതിനെ തുടര്ന്ന് കുഴഞ്ഞുവീഴുകയായിരുന്നുവെന്ന് അധികൃതര് പറഞ്ഞു. വ്യാഴാഴ്ച രാവിലെയായിരുന്നു സംഭവം. രാമറെഡ്ഡി മണ്ഡലത്തിലെ സിംഗരായപള്ളി ഗ്രാമത്തില് നിന്നുള്ള ശ്രീ നിധി (16) യാണ് മരിച്ചത്.
ഒരു സ്വകാര്യ സ്കൂളില് പഠിക്കുന്ന പെണ്കുട്ടി കാമറെഡ്ഡിയില് താമസിച്ചു വരികയായിരുന്നു. ശ്രീനിധി കുഴഞ്ഞുവീഴുന്നത് കണ്ട അദ്ധ്യാപിക ഉടന് തന്നെ ആശുപത്രിയില് എത്തിച്ചിരുന്നു. ഡോക്ടര്മാര് ഉടന് സിപിആര് ഉള്പ്പെടെയുള്ള പ്രാഥമിക ചികിത്സ നല്കിയെങ്കിലും പ്രതികരിക്കാത്ത സാഹചര്യത്തില് മറ്റൊരു ആശുപത്രിയിലേക്ക് റഫര് ചെയ്തു. രണ്ടാമത്തെ ആശുപത്രിയില് ഹൃദയാഘാതത്തെ തുടര്ന്ന് ശ്രീ നിധി മരിച്ചതായി സ്ഥിരീകരിച്ചു. സ്കൂളിലെ അധ്യാപകരും വിദ്യാര്ത്ഥികളും മരണത്തില് ദു:ഖം രേഖപ്പെടുത്തുകയും ശ്രീ നിധിയോളം പ്രായമുള്ള ഒരു പെണ്കുട്ടി ഹൃദയാഘാതം മൂലം മരിച്ചതില് തങ്ങളെ ഞെട്ടിച്ചതായും നിരവധി വിദ്യാര്ത്ഥികളും പറഞ്ഞു.
അവളുടെ മൃതദേഹം ജന്മനാട്ടിലേക്ക് കൊണ്ടുപോയി. അലിഗഢിലെ സിറൗലി ഗ്രാമത്തില് നിന്നുള്ള ആറാം ക്ലാസ് വിദ്യാര്ത്ഥി മോഹിത് ചൗധരിക്ക് ഹൃദയാഘാതം വന്ന് മാസങ്ങള്ക്ക് ശേഷമാണ് ശ്രീ നിധിയുടെ മരണം. വാര്ഷിക സ്പോര്ട്സ് ഡേ മത്സരത്തിന് തയ്യാറെടുക്കുമ്പോള് 14കാരന് പരിശീലന ഓട്ടത്തിനിടെ കുഴഞ്ഞു വീഴുകയായിരുന്നു. ഇതേ ജില്ലയില് നിന്നുള്ള മറ്റൊരു കുട്ടി, എട്ട് വയസ്സുകാരി ദീക്ഷ ദിവസങ്ങള്ക്ക് മുമ്പ് സുഹൃത്തുക്കളോടൊപ്പം കളിക്കുന്നതിനിടെ ഹൃദയാഘാതം മൂലം മരിച്ചിരുന്നു.
രണ്ട് വര്ഷത്തിനുള്ളില് ഹൃദയസ്തംഭനം മൂലമുള്ള മരണങ്ങള് 22% വര്ദ്ധിച്ചതായി അലിഗഡ് മുസ്ലീം സര്വകലാശാലയിലെ പ്രൊഫസര് എം റബ്ബാനി പറഞ്ഞു. 'ആരോഗ്യമുള്ള ആരെങ്കിലും ഒരു മണിക്കൂറിനുള്ളില് മരിക്കുകയാണെങ്കില്, അതിനെ സഡന് കാര്ഡിയാക് അറസ്റ്റ് എന്ന് വിളിക്കുന്നു. കഴിഞ്ഞ 20 വര്ഷത്തിനിടെ ഇത് 22 ശതമാനം വര്ദ്ധിച്ചു. ഒരു കുട്ടിക്ക് ശ്വാസതടസ്സവും നെഞ്ചുവേദനയും ഉണ്ടെന്ന് പരാതിപ്പെട്ടാല്, അവനെ ഉടന് പരിശോധിക്കണം,' പ്രൊഫസര് പറഞ്ഞു.
