കെയ്റോ: ഒരു നൂറ്റാണ്ടിനുശേഷം ഈജിപ്തില് ഒരു ഫറവോയുടെ ശവകുടീരംകൂടി കണ്ടെത്തി. തുത്മോസ് രണ്ടാമന്റെ ശവകുടീരമാണു ബ്രിട്ടീഷ്- ഈജിപ്ഷ്യന് ഗവേഷണ സംഘം തിരിച്ചറിഞ്ഞത്. 1922 നവംബര് നാലിനാണു തുതന്ഖാമന്റെ ശവകുടീരം കണ്ടെത്തിയത്. അതിനുശേഷം ആദ്യം കണ്ടെത്തുന്ന ശവകുടീരമാണു തുത്മോസ് രണ്ടാമന്റേത്.
ലക്സര് നഗരത്തിനടുത്തുള്ള തേബാന് നെക്രോപോളിസിന്റെ പടിഞ്ഞാറന് താഴ്വരയിലാണു തുത്മോസ് രണ്ടാമന്റെ ശവകുടീരം കണ്ടെത്തിയത്. അദ്ദേഹത്തിന്റെ തലമുറയിലെ ഫറവോമാരുടെ ശവകുടീരങ്ങള് രാജാക്കന്മാരുടെ താഴ്വരയില്നിന്ന് രണ്ട് കിലോമീറ്ററിലധികം അകലെയാണെന്നാണു ഗവേഷകര് കരുതിയിരുന്നത്. രാജകുടുംബാംഗങ്ങളായ സ്ത്രീകളുടെ വിശ്രമസ്ഥലങ്ങളോട് ചേര്ന്നാണു തുത്മോസ് രണ്ടാമന്റെ ശവകുടീരം.
അലങ്കരിച്ച നിലയിലായിരുന്നു ശവകുടീരം. മേല്ക്കൂരയുടെ ഒരു ഭാഗം കേടുകൂടാതെയും കണ്ടെത്തി. മഞ്ഞ നക്ഷത്രങ്ങളുള്ള നീല നിറത്തിലുള്ള മേല്ക്കൂരകള് രാജാക്കന്മാരുടെ ശവകുടീരങ്ങളില് മാത്രമേ കാണപ്പെടുന്നുള്ളൂ. അതാണു ഫറവോയുടെ കുടീരത്തിലേക്കുള്ള സൂചന ഗവേഷകര്ക്കു നല്കിയതെന്നു മിഷന് ഡയറക്ടര് ഡോ. പിയേഴ്സ് ലിതര്ലാന്ഡ് പറഞ്ഞു. രണ്ട് നൂറ്റാണ്ടുകള്ക്ക് മുമ്പ് തുത്മോസ് രണ്ടാമന്റെ മമ്മിയുടെ അവശിഷ്ടങ്ങള് ഗവേഷകര് കണ്ടെത്തിയിരുന്നു. എങ്കിലും യഥാര്ത്ഥ ശ്മശാന സ്ഥലം കണ്ടെത്തിയിരുന്നില്ല. ഈജിപ്ത് ഭരിച്ച ചുരുക്കം വനിതാ ഫറവോമാരില് ഒരാളായും കണക്കാക്കപ്പെടുന്ന ഹത്ഷെപ്സുത് രാജ്ഞിയുടെ ഭര്ത്താവായാണ് തുത്മോസ് രണ്ടാമന്.
ശവകുടീരത്തിന്റെ 'വലിയ കോണിപ്പടിയും വളരെ വലിയ താഴേക്കുള്ള ഇടനാഴിയും' പ്രൗഢിയെ സൂചിപ്പിക്കുന്നുവെന്ന് ഡോ.ലിതര്ലാന്ഡ് പറഞ്ഞു. എങ്കിലും ശവകുടീരം ശൂന്യമായിത്തീര്ന്നു. തുത്മോസ് രണ്ടാമന് രാജാവിന്റെ ശവസംസ്കാരത്തിന് ഏതാനും വര്ഷങ്ങള്ക്ക് ശേഷം ശവകുടീരം വെള്ളപ്പൊക്കത്തില് മുങ്ങിയതായി ഗവേഷകര് കണ്ടെത്തി. അതുകൊണ്ടാകും മൃതദേഹം മറ്റൊരു സ്ഥലത്തേക്ക് മാറ്റിയത്.
ചേമ്പറിലെ ചുണ്ണാമ്പുകല്ലുകള് പരിശോധിച്ചപ്പോള് തുത്മോസ് രണ്ടാമന്, ഹത്ഷെപ്സുത് എന്നിവരുടെ പേരുകളുടെ ലിഖിതങ്ങളും കണ്ടെത്തി.
ലിതര്ലാന്ഡിന്റെ ന്യൂ കിങ്ഡം റിസര്ച്ച് ഫൗണ്ടേഷന്റെയും ഈജിപ്തിലെ ടൂറിസം ആന്ഡ് ആന്റിക്വിറ്റീസ് മന്ത്രാലയത്തിന്റെയും സംയുക്ത സംഘം 12 വര്ഷത്തിലേറെ നീണ്ട ഗവേഷണത്തിനൊടുവിലാണു ഫറവോയുടെ ശവകുടീരം കണ്ടെത്തിയത്.
