ഇന്തോനേഷ്യയില് നിന്നും പുറത്തുവരുന്ന ഒരു വിചിത്ര ദൃശ്യമാണ് ഇപ്പോള് സോഷ്യല് മീഡിയയില് വന് ചര്ച്ചയാകുന്നത്. സംഭവം എന്താണന്നല്ലേ? ഇന്തോനേഷ്യയിലെ ആഷെയിലുള്ള കുട്ടാക്കെയ്ന് ജയിലിന്റെ പ്രധാന വാതിലുകള് തകര്ത്ത് 53 തടവുകാര് രക്ഷപ്പെട്ടു. ഇവര് തടവു ചാടുന്നതിന്റെ വീഡിയോ ദൃശ്യങ്ങളാണ് പുറത്തുവന്നിരിക്കുന്നത്. മാര്ച്ച് 10 നാണ് സംഭവം. നഗരത്തിലൂടെ തലങ്ങും വിലങ്ങും ഓടിയ തടവുകാര്ക്ക് പിന്നാലെ പോലീസും പാഞ്ഞു.
വീഡിയോയില് കുറ്റവാളികള് ജയിലിന്റെ ചെറിയ ഗേറ്റ് ചാടിക്കടന്ന് റോഡിലൂടെ പരക്കം പായുന്നത് കാണാം. മിക്ക തടവുകാരും ത്രിഫോര്ത്തോ മറ്റെന്തെങ്കിലും നിറത്തിലുള്ള വസ്ത്രങ്ങളോ ആണ് ധരിച്ചിരിക്കുന്നത്. ചിലര് കെട്ടിടങ്ങളുടെ മുകളിലൂടെയും മറ്റ് ചിലര് തിരക്കേറിയ തെരുവിലൂടെയും ഓടുന്നത് വീഡിയോയില് കാണാം. ചില നാട്ടുകാര് തടവ് പുള്ളികളെ കാലിട്ട് വീഴ്ത്താനും പിടികൂടാനും ശ്രമിക്കുമ്പോള് അവരെ തട്ടി മാറ്റി തടവുപുള്ളികള് ഓടുന്നതും വീഡിയോയില് കാണാം.
റിപ്പോര്ട്ടുകള് പ്രകാരം തടവ് ചാടിയവരില് 21 പേര് കീഴടങ്ങുകയോ അറസ്റ്റ് ചെയ്യപ്പെടുകയോ ചെയ്തു. ബുധനാഴ്ച വരെ 32 തടവുകാരെ പിടികൂടാന് കഴിഞ്ഞിട്ടില്ലെന്നും റിപ്പോര്ട്ടുകള് പറയുന്നു. 'കഠിനമായ ശിക്ഷകള് നേരിടുന്നതിനേക്കാള് സ്വയം കീഴടങ്ങുന്നതാണ് നല്ലത്' എന്ന് ഉദ്യോഗസ്ഥര് മുന്നറിയിപ്പ് നല്കി. അതേസമയം ജയില് കലാപ ശ്രമങ്ങളൊന്നും റിപ്പോര്ട്ട് ചെയ്തിട്ടില്ല. പിന്നെ ഏങ്ങനെയാണ് ഇത്രയേറെ തടവ് പുള്ളികള് ജയില് ചാടിയതെന്ന അന്വേഷണം നടക്കുന്നു. ജയിലിലെ തടവുകാര് രാവിലത്തെ ഭക്ഷണം കഴിക്കാന് ക്യൂ നില്ക്കുന്നതിനിടെയാണ് സംഭവമെന്ന് ബിബിസി റിപ്പോര്ട്ട് ചെയ്തു.
