തങ്ങളുടെ ജീവിതത്തിലെ വൈകാരിക നിമിഷങ്ങളും അതിജീവനത്തിന്റെ അനുഭവങ്ങളും പലരും സമൂഹ മാധ്യമങ്ങളിലൂടെ പങ്കുവയ്ക്കാറുണ്ട്. ഇപ്പോഴിതാ ഭര്‍ത്താവ് കൊല്ലാന്‍ ശ്രമിച്ചിട്ടും താനെങ്ങനെ ജീവിതത്തിലേക്ക് തിരികെ വന്നു എന്നുള്ള അതിവൈകാരികമായ അനുഭവം പങ്കുവയ്ക്കുകയാണ് തായ്‌ലന്‍ഡില്‍ നിന്നുള്ള ഒരു യുവതി. ഭര്‍ത്താവ് പാറക്കെട്ടില്‍ നിന്ന് തള്ളിയിട്ടതിനെ തുടര്‍ന്ന് വലിയ വേദനകളിലൂടെയും പരീക്ഷണങ്ങളിലൂടെയുമാണ് അവര്‍ കടന്നു പോയത്.
38 കാരിയായ വാങ് നാന്‍ എന്ന യുവതിയാണ് തന്റെ ജീവിത കഥ പങ്കുവച്ചിരിക്കുന്നത്. 2019 -ലെ ഒരു ഹോളിഡേ ആയിരുന്നു. വാങ് നാനിനെ സംബന്ധിച്ചിടത്തോളം ഒരു ദുഃസ്വപ്നം പോലെ കടന്നുപോയ ദിവസം. ഭര്‍ത്താവ് യു സിയാവോഡോംഗാണ് അവളുടെ ജീവനെടുക്കാന്‍ ശ്രമിച്ചത്. കാരണമോ? അവളുടെ സമ്പത്തെല്ലാം കൈക്കലാക്കണം, ചൂതാട്ടത്തിലൂടെ ഉണ്ടാക്കിയ കടങ്ങള്‍ വീട്ടണം. ആക്രമണത്തില്‍ വാങിന്റെ ശരീരത്തില്‍ 17 ഇടത്താണ് ഒടിവുകളുണ്ടായത്. ശരീരത്തില്‍ 100 -ലധികം സ്റ്റീല്‍ പിന്നുകള്‍ വയ്‌ക്കേണ്ടി വന്നു. അന്ന് ഗര്‍ഭിണി ആയിരുന്നു വാങ്. ആ വീഴ്ചയില്‍ അവള്‍ക്ക് ആ കുഞ്ഞിനെയും നഷ്ടപ്പെട്ടു. എന്നാല്‍, തന്റെ ജീവിതം ആ ദുരന്തത്തില്‍ അവസാനിപ്പിക്കാന്‍ അവള്‍ തയ്യാറായിരുന്നില്ല.
വീണ്ടും ഗര്‍ഭം ധരിക്കുക എന്നത് ഒരിക്കലുമിനി സാധ്യമാകില്ല എന്ന് ഡോക്ടര്‍മാര്‍ വാങ്ങിന് മുന്നറിയിപ്പ് നല്‍കി. എന്നാല്‍, വര്‍ഷങ്ങളോളം നീണ്ടുനിന്ന റീഹാബിലിറ്റേഷനും നിരവധി ശസ്ത്രക്രിയകള്‍ക്കും ശേഷം അവളുടെ ജീവിതത്തില്‍ പല മാറ്റങ്ങളുമുണ്ടായി. കഴിഞ്ഞ വര്‍ഷം സെപ്റ്റംബറില്‍, IVF വഴി അവള്‍ തനിക്കൊരു മകന്‍ ജനിച്ചതായി വെളിപ്പെടുത്തി. എന്നാല്‍, പരീക്ഷണം അവിടം കൊണ്ടും തീര്‍ന്നില്ല. ഹൃദയത്തില്‍ തകരാറുമായിട്ടാണ് കുഞ്ഞ് ജനിച്ചത്. നിരവധി ചികിത്സകള്‍. എന്നിരുന്നാലും താന്‍ തളരാന്‍ ഒരുക്കമല്ല എന്നാണ് വാങ് പറയുന്നത്.
വാങ്ങിനെ കൊല്ലാനുള്ള ശ്രമത്തെ തുടര്‍ന്ന് ഭര്‍ത്താവ് യു സിയാവോഡോംഗിനെ 33 കൊല്ലത്തേക്കാണ് ശിക്ഷിച്ചത്. എന്നാല്‍, അവരുടെ വിവാഹമോചനം നടന്നില്ല. യു ആവട്ടെ തന്റെ യുവത്വം മൊത്തം ജയിലിലാണ് എന്ന് കാണിച്ച് 35 കോടി വാങ്ങിനോട് നഷ്ടപരിഹാരം ആവശ്യപ്പെട്ടിരിക്കുകയാണ്. വാങ് എന്തായാലും തളരാന്‍ ഒരുക്കമല്ല. അവള്‍ക്ക് സോഷ്യല്‍ മീഡിയയില്‍ ഒരുപാട് ഫോളോവേഴ്‌സുണ്ട്. പാരന്റിഗിനെ കുറിച്ചും അതിജീവനത്തെ കുറിച്ചുമെല്ലാമാണ് അവള്‍ സംസാരിക്കുന്നത്.
Comments