കല്പ്പറ്റ: ആദിവാസി യുവാവിനെ സ്റ്റേഷനില് മരിച്ച നിലയില് കണ്ടെത്തിയ സംഭവത്തില് പോലീസ് ഉദ്യോഗസ്ഥര്ക്കെതിരെ നടപടി ഉണ്ടായേക്കും. വയനാട് എസ് പി തപോഷ് ബസുമതാരി ഡിജിപിക്ക് റിപ്പോര്ട്ട് നല്കിയിട്ടുണ്ട്. ഉത്തരവാദികള്ക്കെതിരെ റിപ്പോര്ട്ടില് നടപടി ആവശ്യപ്പെട്ടിട്ടുണ്ട്. ഇതിനിടെ പോലീസിനെതിരെ ആരോപണവുമായി ഗോകുലിന്റെ് ബന്ധുക്കള് രംഗത്ത് വന്നു. പോലീസ് പലതവണ വീട്ടില് വന്ന് ഭീഷണിപ്പെടുത്തിയെന്നാണ് ബന്ധുക്കള് പറയുന്നത്. ഗോകുലിനെ കൈയില് കിട്ടിയാല് വെറുതെ വിടില്ലെന്നാണ് ഭീഷണി മുഴക്കിയിരുന്നത്. ഗോകുലിനോടൊപ്പം ഉണ്ടായിരുന്ന മറ്റുള്ളവരുടെ ഫോണുകള് പോലീസ് പിടിച്ചെടുത്തെന്നും ബന്ധുക്കള് മാധ്യമങ്ങളോട് പറഞ്ഞു .
അതേസമയം ഗോകുലിന് പ്രായപൂര്ത്തിയായില്ലെന്ന് തെളിയിക്കുന്ന രേഖ റിപ്പോര്ട്ടറിന് ലഭിച്ചു. നിയമവിരുദ്ധമായാണ് പ്രായപൂര്ത്തിയാകാത്ത ഗോകുലിനെ സ്റ്റേഷനില് എത്തിച്ചത്. ആധാര് കാര്ഡില് 2007 മെയ് 30 ആണ് ഗോകുലിന്റെ ജനന തീയതിയായി രേഖപ്പെടുത്തിയിരിക്കുന്നത്. ഗോകുലിന് 17 വയസും 10 മാസവുമാണ് പ്രായം. എഫ്ഐആറില് പൊലീസ് രേഖപ്പെടുത്തിയത് ഗോകുലിന്റെ ജനനവര്ഷം മാത്രമാണ്. ജനനത്തീയതി തെളിയിക്കുന്ന രേഖകളെല്ലാം പൊലീസ് കസ്റ്റഡിയിലാണ്. 17 വയസുകാരനെ പ്രായപൂര്ത്തിയായതായി കാട്ടിയത് പോക്സോ കേസില് പ്രതിചേര്ക്കാനെന്നാണ് ഉയരുന്ന ആക്ഷേപം.
ചൊവ്വാഴ്ച രാവിലെ 7.45നാണ് കല്പ്പറ്റ പോലീസ് സ്റ്റേഷനിലെ ശുചിമുറിയില് ഗോകുലിനെ തൂങ്ങി മരിച്ച നിലയില് കണ്ടെത്തിയത്. പ്രായപൂര്ത്തിയാകാത്ത പെണ്കുട്ടിക്കൊപ്പം കാണാതായ അമ്പലവയല് സ്വദേശി ഗോകുല് പൊലീസ് കസ്റ്റഡിയില് ഇരിക്കെയാണ് ആത്മഹത്യ ചെയ്തത്. ഒപ്പം ഉണ്ടായിരുന്ന പെണ്കുട്ടിയെ സംരക്ഷണ കേന്ദ്രത്തിലേക്ക് പോലീസ് മാറ്റിയിരുന്നു. ഇക്കാഴിഞ്ഞ 26 മുതലാണ് പെണ്കുട്ടിയെ കാണാതായത്. ഇതില് അന്വേഷണം നടക്കുമ്പോള് കോഴിക്കോട് നിന്ന് പെണ്കുട്ടിയേയും യുവാവിനെയും പോലീസ് കണ്ടെത്തി. വയനാട്ടില് എത്തിച്ച പെണ്കുട്ടിയെ സംരക്ഷണ കേന്ദ്രത്തിലേക്ക് മാറ്റിയ പോലീസ് യുവാവിനോട് കല്പ്പറ്റ സ്റ്റേഷനില് തന്നെ തുടരാന് ആവശ്യപ്പെട്ടു. ഇന്നലെ രാവിലെ ഏഴേ മുക്കാലോടെ പോലീസ് സ്റ്റേഷനിലെ ശുചിമുറിയില് പോയ ഗോകുല് അവിടെ തൂങ്ങി മരിക്കുകയായിരുന്നു.
