ഭര്‍ത്താവിനെ അക്രമിച്ച ചീങ്കണ്ണിയെ തക്കാളിച്ചെടികള്‍ക്ക് വച്ചിരുന്ന കുറ്റിയെടുത്ത് അടിച്ചോടിച്ച് സ്ത്രീ. സൗത്ത് കരോലിനയിലാണ് സംഭവം. പൂന്തോട്ടത്തില്‍ പണിയെടുത്തുകൊണ്ടിരിക്കവെയാണ് ഇവരുടെ ഭര്‍ത്താവിനെ എട്ടര അടി നീളമുള്ള ഒരു ചീങ്കണ്ണി ഉപദ്രവിക്കാനെത്തിയത്. ജോയും ഭാര്യ മരിയന്‍ റോസറും ഒരു റിട്ടയര്‍മെന്റ് ഹോമിലാണ് താമസിക്കുന്നത്. 70 -ലധികം പ്രായമുണ്ട് ഇരുവര്‍ക്കും. റിട്ടയര്‍മെന്റ് ഹോമിലാണ് ഈ ഞെട്ടിക്കുന്ന സംഭവം നടന്നത്. തീരെ പ്രതീക്ഷിക്കാതെയാണ് ജോയുടെ നേരെ ചീങ്കണ്ണിയുടെ ആക്രമണം ഉണ്ടായത്.
കുളത്തിന്റെ അടുത്ത് പണിയെടുത്തുകൊണ്ടിരിക്കെ അത് ജോയുടെ കാലില്‍ കടിച്ച് വലിക്കുകയായിരുന്നു. ആ സമയത്ത് മരിയന്‍ തൊട്ടടുത്തുണ്ടായിരുന്ന തക്കാളിച്ചെടികളെ താങ്ങി നിര്‍ത്തിയിരുന്ന മരക്കുറ്റി വലിച്ചൂരിയെടുത്ത് ചീങ്കണ്ണിക്ക് നേരെ തിരിയുകയായിരുന്നു. അവര്‍ ചീങ്കണ്ണിയുടെ കണ്ണുകള്‍ ലക്ഷ്യം വച്ച് വടി വീശി. 'തനിക്ക് തൊട്ടടുത്ത് എന്താണ് ഉള്ളതെന്ന് നോക്കുകയായിരുന്നു ഞാന്‍. അത് ഈ തക്കാളിച്ചെടിക്ക് വച്ചിരുന്ന മരക്കുറ്റി ആയിരുന്നു. അത് വലിച്ചെടുത്ത് താനതിന്റെ കണ്ണുകളിലും തലയിലും അടിച്ചു. തന്റെ ഭര്‍ത്താവിന്റെ ജീവന്‍ രക്ഷിക്കാനായി താനെന്തും ചെയ്യാന്‍ ഒരുക്കമായിരുന്നു' എന്നാണ് മരിയന്‍ പറഞ്ഞത്.
മരിയന്റെ ഈ പെട്ടെന്നുള്ള പ്രതികരണമാണ് ജോയുടെ ജീവന്‍ രക്ഷിച്ചത്. പോലീസും ചുറ്റുമുള്ളവരും എല്ലാം മരിയനെ അഭിനന്ദിക്കുകയാണ്. പോലീസ് തന്നെ അവളെ വിശേഷിപ്പിക്കുന്നത് ഹീറോ എന്നാണ്. ഷെരീഫ് ഓഫീസിലെ ലെഫ്റ്റനന്റ് ഡാനി അല്ലന്‍ പറഞ്ഞത്, അവരുടെ പെട്ടെന്നുള്ള ഈ പ്രതിരോധമാണ് ജോയുടെ ജീവന്‍ രക്ഷിച്ചത്, ശരിക്കും അവര്‍ ഒരു ഹീറോയാണ് എന്നാണ്. ജോയുടെ കാലില്‍ ചീങ്കണ്ണി കടിച്ചതിനെ തുടര്‍ന്ന് മുറിവേറ്റിട്ടുണ്ട്. അതുപോലെ, താഴെ വീണ് തലയിലും പരിക്കേറ്റിട്ടുണ്ട്. അദ്ദേഹത്തെ സമീപത്തെ ആശുപത്രിയില്‍ പ്രവേശിപ്പിച്ചു.
Comments