കൊച്ചി: കഴിഞ്ഞ കാലങ്ങളിലെ ദുരന്തഘട്ടങ്ങളിലെ സേവനത്തിനായി സൈന്യത്തിന് സംസ്ഥാന സര്ക്കാര് നല്കേണ്ട തുക മുണ്ടക്കൈ-ചൂരല്മല പുനരധിവാസത്തിനായി ഉപയോഗിക്കാമെന്ന് ഹൈക്കോടതി. സൈന്യം നല്കിയ ബില് തുകയായ 120 കോടി രൂപ പുനരധിവാസത്തിനായി ചെലവഴിക്കാനാണ് ഡിവിഷന് ബെഞ്ചിന്റെ അനുമതി. വയനാട് ദുരന്തത്തിന്റെ പശ്ചാത്തലത്തില് സ്വമേധയാ സ്വീകരിച്ച ഹര്ജി പരിഗണിക്കവെയാണ് ഹൈക്കോടതി ഇടക്കാല ഉത്തരവിലൂടെ സര്ക്കാരിന് അനുമതി നല്കിയത്.
മുണ്ടക്കൈ-ചൂരല്മല ദുരന്ത ബാധിതരുടെ ബാങ്ക് വായ്പ എഴുതിത്തള്ളുന്ന കാര്യം ആഭ്യന്തര-ധന മന്ത്രാലയങ്ങള് തമ്മില് ചര്ച്ച ചെയ്യുന്നുവെന്ന് കേന്ദ്ര സര്ക്കാര് ഹൈക്കോടതിയെ അറിയിച്ചു. രണ്ടാഴ്ചയ്ക്കുള്ളില് തീരുമാനമെടുക്കാന് സമ്മര്ദ്ദം ചെലുത്താമെന്ന് അഡീഷണല് സൊളിസിറ്റര് ജനറല് എആര്എല് സുന്ദരേശന് വിശദീകരിച്ചു.
