ഇന്ത്യയിലെത്തുന്ന വിദേശ വ്ളോഗര്മാര് തങ്ങളുടെ അനുഭവങ്ങള് സോഷ്യല് മീഡിയയിലൂടെ പങ്കുവയ്ക്കാറുണ്ട്. ഇപ്പോഴിതാ കര്ണാടകയിലെ കുടകിലെ മൃഗശാലയില് നിന്നും ഇറ്റാലിയന് കണ്ടന്റ് ക്രിയേറ്ററായ ഒരു യുവാവ് ഷെയര് ചെയ്ത പോസ്റ്റാണ് സോഷ്യല് മീഡിയയില് ശ്രദ്ധിക്കപ്പെടുന്നത്. ഇന്ത്യയിലെ ഈ മൃഗശാലയില് മൃഗങ്ങള്ക്ക് പകരം താനാണ് ആളുകളുടെ ശ്രദ്ധയാകര്ഷിച്ചത് എന്നാണ് യുവാവ് പറയുന്നത്. ലോറെന്സോ നോവ നോബിലിയോ എന്ന യുവാവാണ് ഇന്ത്യയിലെ തന്റെ യാത്രയ്ക്കിടെ മൃഗശാല സന്ദര്ശിച്ച ശേഷം ഇന്സ്റ്റാഗ്രാമില് വീഡിയോ ഷെയര് ചെയ്തിരിക്കുന്നത്.
'താന് ഇന്ത്യയിലെ ഒരു മൃഗശാലയില് പോയി' എന്ന വാചകത്തോടെയാണ് വീഡിയോ തുടങ്ങുന്നത്. യുവാവ് മൃഗശാലയിലേക്ക് നടക്കുന്നതും വീഡിയോയില് കാണാം. സംഗതി ഇതെല്ലാം സാധാരണ ട്രാവല് വ്ലോഗില് കാണുന്നത് പോലെ തന്നെയാണെങ്കിലും കുറച്ച് കഴിഞ്ഞപ്പോള് നാല് ഇന്ത്യന് യുവാക്കള് ലോറെന്സോയെ സമീപിക്കുകയായിരുന്നു. ലോറെന്സോയ്ക്കൊപ്പം ഫോട്ടോ പകര്ത്തണം എന്നതായിരുന്നു അവരുടെ ആവശ്യം. അങ്ങനെ മൃഗശാലയില് പോയി മൃഗങ്ങളുടെ ഫോട്ടോ എടുക്കുന്നതിന് പകരം അവര് ലോറെന്സോയ്ക്കൊപ്പം നിന്ന് ഫോട്ടോ എടുത്തു.
'എല്ലാവരും കാണാനെത്തിയ ആ അപൂര്വജീവി താനായി മാറി' എന്ന് പറഞ്ഞുകൊണ്ടാണ് ഈ രംഗം ലോറെന്സോ ഷെയര് ചെയ്തിരിക്കുന്നത്. ആദ്യം മുതലേ അവര് തന്റെ ഷോ കണ്ടതുകൊണ്ടാണ് ഇങ്ങനെ ഫോട്ടോയെടുക്കാനെത്തിയത് എന്നാണ് താന് കരുതുന്നത് എന്നാണ് ലോറെന്സോ പറയുന്നത്. ഒപ്പംതന്നെ കൂട്ടത്തില് ഒരു യുവാവ് ലോറെന്സോയുടെ കൈകള് മുറുക്കെ കോര്ത്ത് പിടിച്ചിട്ടുണ്ട്, അതേ കുറിച്ചും വീഡിയോയുടെ ക്യാപ്ഷനില് സൂചിപ്പിച്ചിരിക്കുന്നത് കാണാം. നിരവധിപ്പേരാണ് രസകരമായ വീഡിയോയ്ക്ക് കമന്റുകളുമായി എത്തിയത്.
