കഴിഞ്ഞ ഏതാനും നാളുകളായി ദില്ലിയിലെ വായുവിന്റെ മോശം ഗുണനിലവാരം ചര്ച്ചചെയ്യപ്പെട്ടുകൊണ്ടിരിക്കുകയാണ്. ആളുകള് ശുദ്ധവായു തേടി ദില്ലിയില് നിന്നും പുറത്ത് കടക്കാനുള്ള ശ്രമത്തിലാണ്. ശുദ്ധ വായു തേടി ദില്ലിയില് നിന്നുമെത്തുന്ന സഞ്ചാരികളുടെ വാഹനങ്ങള് മൂലം ഉത്തരാഖണ്ഡില് ഗതാഗതക്കുരുക്ക് അനുഭവപ്പെടുന്നെന്ന് റിപ്പോര്ട്ടുകള് പുറത്ത് വന്നിരുന്നു. ഇതിനിടെയാണ് ഒരു വിവാഹത്തിന് പങ്കെടുക്കാനെത്തി, ആഴ്ചകളോളം ദില്ലി എന്സിആറില് താമസിക്കേണ്ടിവന്നതിന് പിന്നാലെ ഗുരുതരമായ ആരോഗ്യ പ്രശ്നങ്ങള് തുടങ്ങിയെന്ന് ഒരു ബെംഗളൂരു സ്വദേശി കുറിച്ചത്.
ബെംഗളൂരുവിനെയും അവിടുത്തെ ഗുണനിലവാരമുള്ള വായുവിനെയും മിസ് ചെയ്യുന്നെന്ന തലക്കെട്ടോടെയാണ് യാവാവ് റെഡ്ഡിറ്റില് കുറിപ്പെഴുതിയത്. ഒരു വിവാഹത്തില് പങ്കെടുക്കാനായെത്തി ഏകദേശം 20 ദിവസമായി ദില്ലി എന്സിആറില് തമാസിക്കുകയാണെന്നും എത്തിയ ഉടന് തന്നെ ആരോഗ്യ പ്രശ്നങ്ങള് തുടങ്ങിയെന്നും യുവാവ് എഴുതി. 20 ദിവസത്തെ താമസത്തിനിടെ വായില് നിന്നും മൂക്കില് നിന്നും രക്തം വന്നെന്നും അന്ന് മുതല് തനിക്ക് ജലദോഷം പിടിപെട്ടെന്നും യുവാവ് എഴുതുന്നു.
എന്റെ മൂക്കില് നിന്നും ജീവിതത്തില് ഇതുവരെയായി ഇത്രയധികം രക്തം വന്നിട്ടില്ലെന്നും യുവാവ് തന്റെ റെഡ്ഡിറ്റ് കുറിപ്പില് പറയുന്നു. എന്സിആറില് പോകുന്നത് വാതകം ശ്വസിക്കുന്നത് പോലെയാണ്, എല്ലാം അവസാനിച്ചുവെന്ന് കരുതിയപ്പോഴാണ് രക്തം വരുന്ന മൂക്കുമായി വീട്ടിലേക്ക് കയറിയതെന്നും തനിക്ക് ബെംഗളൂരുവിലേക്ക് മടങ്ങാന് അതിയായ ആഗ്രഹമുണ്ടെന്നും യുവാവ് എഴുതുന്നു. ഒപ്പം താന് ഈ കുറിപ്പ് ദില്ലി ഫോറങ്ങളില് പങ്കുവച്ചാല് അത് നെഗറ്റീവ് കമന്റുകള്ക്ക് കാരണമാകുമെന്നും അതിനാല് ബെംഗളൂരുവിനെ പ്രശംസിക്കാനായി താനിത് പങ്കുവയ്ക്കുന്നെന്നും അദ്ദേഹം കുറിച്ചു.
കുറിപ്പ് വളരെ പെട്ടെന്ന് തന്നെ സമൂഹ മാധ്യമങ്ങളില് വലിയ ശ്രദ്ധനേടി. അതേസമയം ചിലര് ദില്ലി ബെംഗളൂരു വായു ഗുണനിലവാര താരതമ്യത്തില് സംശയം പ്രകടിപ്പിച്ചു. ദില്ലിയുടെ അത്രയും മേശമല്ലെങ്കിലും ബെംഗളൂരുവിലെ വായുവും ഗുണം കുറഞ്ഞതാണെന്നും പലര്ക്കും പുകമഞ്ഞ് കാരണം ചുമയും ആസ്മയുമുണ്ടെന്നും നിരവധി പേരെഴുതി. ഇന്ത്യയിലെ ഏതാണ്ടെല്ലാ നഗരങ്ങളിലെയും വായുവിന്റെ ഗുണനിലവാരം വളരെ താഴെയാണെന്ന് നിരവധി പേരാണ് സ്വന്തം അനുഭവങ്ങള് പങ്കുവച്ച് കൊണ്ടെഴുതിയത്.
