കണ്ണൂര്: ആരോഗ്യമന്ത്രി വീണാ ജോര്ജ്ജിന് നേരെ കയ്യേറ്റം നടന്ന സംഭവത്തില് കെ.എസ്.യു. പ്രവര്ത്തകര്ക്കെതിരേ വധശ്രമത്തിന് കേസെടുത്തു. ആക്രമണത്തില് അഞ്ച് കെഎസ്യു പ്രവര്ത്തകരെ റിമാന്ഡ് ചെയ്തു. കെഎസ്യു ജില്ലാ പ്രസിഡന്റ് അടക്കം അഞ്ച് പേരെയാണ് റിമാന്ഡ് ചെയ്തത്. എം സി അതുല്, സി എച് മുബാസ്, മുഹമ്മദ് യാസീന്, അക്ഷയ് മാട്ടൂല്, ബിഥുല് എന്നിവരാണ് റിമാന്ഡിലായത്.
അഞ്ച് കെഎസ്യു പ്രവര്ത്തകര് സ്റ്റേഷനില് അതിക്രമിച്ചു കയറി കരിങ്കൊടി കാണിച്ച് മന്ത്രിക്കെതിരെ മുദ്രാവാക്യം വിളിച്ചും കൊല്ലെടാ എന്ന് ആക്രോശിച്ച് കൊണ്ടും എന്തോ ആയുധം ഉപയോഗിച്ച് മന്ത്രിക്ക് നേരെ ചാടി വീണ് കഴുത്തിന് ആക്രമിച്ചുവെന്നാണ് എഫ്ഐറില് പറയുന്നത്. തടയാന് ശ്രമിച്ച ഗണ്മാനെ കൈകൊണ്ട് അടിക്കുകയും തടഞ്ഞുവെയ്ക്കുകയും ചെയ്തുവെന്നും എഫ്ഐആറില് പറയുന്നു.
ഇന്നലെ രാത്രിയാണ് അഞ്ച് പേരെ പൊലീസ് അറസ്റ്റ് ചെയ്തത്. ഇന്നലെ വൈകീട്ട് മൂന്നരയോടെയാണ് കണ്ണൂര് റെയില്വെ സ്റ്റേഷനില്വെച്ച് ആരോഗ്യമന്ത്രിക്ക് നേരെ ആക്രമണമുണ്ടായത്. 'കൊല്ലെടാ' എന്ന് അക്രോശിച്ചാണ് പ്രവര്ത്തകര് എത്തിയതെന്നും മന്ത്രിക്ക് നേരെ ചാടി വീണ് കഴുത്തിന് അക്രമിക്കുകയായിരുന്നുവെന്നും എഫ്ഐആറില് പറയുന്നു.
മന്ത്രിയെ അക്രമിക്കുന്നത് തടയാന് ശ്രമിച്ച ഗണ്മാനെയും അക്രമിച്ചതായാണ് എഫ്ഐആര്. മന്ത്രിയുടെ ഗണ്മാന് എം എസ് അഭിലാഷ് നല്കിയ മൊഴിയുടെ അടിസ്ഥാനത്തിലാണ് പെലീസ് കേസെടുത്തത്. സംഭവത്തില് പ്രതിഷേധിച്ച് സംസ്ഥാന വ്യാപകമായി സിപിഐഎമ്മും ഇടത് വിദ്യാര്ത്ഥി സംഘടനകളും വ്യപകമായ പ്രതിഷേധ പ്രകടനങ്ങളാണ് സംഘടിപ്പിച്ചത്.
മന്ത്രി വീണാ ജോര്ജും പരാതിക്കാരനായ ഗണ്മാനും തിരുവനന്തപുരത്തേക്ക് വന്ദേഭാരത് എക്സ്പ്രസില് പോകുന്നതിനായി കണ്ണൂര് റെയില്വേ സ്റ്റേഷനിലെ ഒന്നാം നമ്പര് പ്ലാറ്റ്ഫോമിന്റെ എന്ട്രന്സിലെത്തിയപ്പോഴായിരുന്നു സംഭവം. ജില്ലാ ആശുപത്രിയിലേക്ക് മാറ്റിയ മന്ത്രിയെ പരിയാരത്തേക്ക് മാറ്റിയിരിക്കുകയാണ്. സംഭവത്തില് കെഎസ് യു സംസ്ഥാന ജനറല് സെക്രട്ടറി ഫര്ഹാന് മുണ്ടേരിക്ക് പരിക്കേറ്റു.
കണ്ണൂര് കൊടിയേരിയില് കോണ്ഗ്രസ് ഓഫീസിന് തീയിട്ടു. കോടിയേരി കല്ലില് താഴെയിലെ പാറാല് മണ്ഡലം കമ്മിറ്റി ഓഫീസിനാണ് തീയിട്ടത്. ഫയര്ഫോഴ്സ് എത്തി തീയണച്ചു. പിന്നില് സിപിഐഎം പ്രവര്ത്തകരാണ് എന്നാണ് കോണ്ഗ്രസ് ആരോപണം. അതേസമയം, ചികിത്സയില് കഴിയുന്ന ആരോഗ്യമന്ത്രി വീണാ ജോര്ജിന് കഴുത്തിന് ക്ഷതമേറ്റതായാണ് മെഡിക്കല് ബുള്ളറ്റിനില് പറയുന്നത്.
