ഒഹിയോയില് അമേരിക്കന് കൗണ്ടിയിലെ സര്ക്കാര് സംവിധാനങ്ങളെയാകെ ഒരു കുസൃതിക്കാരന് അണ്ണാന് കുഴപ്പിച്ച വാര്ത്തയാണ് ഇപ്പോള് സോഷ്യല് മീഡിയയില് ശ്രദ്ധനേടുന്നത്. സര്ക്കാര് ഓഫീസുകളെ നിശ്ചലമാക്കിയ ഇന്റര്നെറ്റ് തടസ്സത്തിന് പിന്നിലെന്താണന്നുള്ള അന്വേഷണമാണ് കുഞ്ഞണ്ണാനിലേക്ക് എത്തിച്ചത്.
കഴിഞ്ഞ ഫെബ്രുവരി 20ന് പ്രോസിക്യൂട്ടര് ഓഫീസിലടക്കം ഫോണ്, ഇന്റര്നെറ്റ് സേവനങ്ങള് നിലച്ചപ്പോള് നിര്മ്മാണ പ്രവര്ത്തനങ്ങള്ക്കിടയില് കേബിള് മുറിഞ്ഞതാകുമെന്നാണ് അധികൃതര് ആദ്യം കരുതിയത്. എന്നാല്, ഭൂമിക്കടിയിലെ ഫൈബര് ശൃംഖലയ്ക്കുള്ളില് കൂടുണ്ടാക്കിയ ഒരു അണ്ണാന് കേബിളുകള് കരണ്ടു മുറിച്ചതാണ് യഥാര്ത്ഥ വില്ലനെന്ന് പിന്നീട് വ്യക്തമായി. ഇത്തരം സംഭവങ്ങള് ആവര്ത്തിക്കാതിരിക്കാന് ഇന്റര്നെറ്റ് സേവനദാതാക്കളുമായി ചേര്ന്ന് മുന്കരുതലുകള് എടുക്കുകയാണ് അധികൃതര് ഇപ്പോള്.
അമേരിക്കയിലുടനീളം വൈദ്യുതി മുടക്കാനും മറ്റും കാരണമാകാറുള്ള അണ്ണാന്മാരെ പ്രധാനമായും മൂന്ന് വിഭാഗങ്ങളായി തരംതിരിക്കാം: മരയണ്ണാന്, നിലയണ്ണാന്, പറക്കുന്ന അണ്ണാന്. ഇതില് ഏറ്റവും സുപരിചിതമായ കിഴക്കന് ചാര അണ്ണാന്മാര് മരംകയറ്റത്തില് അസാമാന്യ വൈദഗ്ധ്യമുള്ളവരാണ്. വനപ്രദേശങ്ങളില് മാത്രമല്ല, തിരക്കേറിയ നഗരങ്ങളിലും ഇവ യഥേഷ്ടം കാണപ്പെടുന്നു. അതേസമയം, ഫോക്സ് അണ്ണാന്മാര് വലുപ്പമേറിയവരും ചുവപ്പ് കലര്ന്ന തവിട്ടുനിറമുള്ളവരുമാണ്; ഇവര് പ്രധാനമായും കാടുകളിലും കൃഷിയിടങ്ങളിലുമാണ് വസിക്കുന്നത്.
അണ്ണാന് കുടുംബത്തിലെ മറ്റ് കൗതുകങ്ങളാണ് നിലയണ്ണാനുകളും പറക്കുന്ന അണ്ണാനുകളും. കലിഫോര്ണിയന് നിലയണ്ണാനെപ്പോലുള്ളവ ഭൂമിക്കടിയില് വലിയ മാളങ്ങള് ഉണ്ടാക്കി മണ്ണിന് വായുസഞ്ചാരം നല്കാന് സഹായിക്കുന്നു. എന്നാല് പറക്കുന്ന അണ്ണാന്മാരാകട്ടെ, തങ്ങളുടെ കൈകാലുകള്ക്കിടയിലുള്ള ചര്മ്മം ഉപയോഗിച്ച് മരങ്ങള്ക്കിടയിലൂടെ തെന്നിനീങ്ങാന് കഴിവുള്ളവരാണ്. രാത്രിയില് മാത്രം പുറത്തിറങ്ങുന്ന ശീലമുള്ളതിനാല് ഇവയെ മനുഷ്യര്ക്ക് കാണാന് പ്രയാസമാണ്.
