രാഷ്ട്രപതി ദ്രൗപതി മുര്മുവിനെ സന്ദര്ശിച്ച അനുഭവം പങ്കുവെച്ച് ഗായകന് ഹരിഹരന്. ഭാര്യ ലളിതയും അദ്ദേഹത്തിനൊപ്പമുണ്ടായിരുന്നു. രാഷ്ട്രപതിയ്ക്ക് ഒപ്പമുളള ചിത്രങ്ങളും അദ്ദേഹം ഫേസ്ബുക്കില് പങ്കുവച്ചു. തന്റെ ' ഉസ്താദ് -ഇ-ഗസല് എന്ന പുസ്തകം രാഷ്ട്രപതിയ്ക്ക് സമ്മാനിക്കാന് സാധിച്ചതിന്റെ സന്തോഷവും ഹരിഹരന് പങ്കുവച്ചു.
ഹരിഹരന്റെ കുറിപ്പ്:
'ബഹുമാനപ്പെട്ട രാഷ്ട്രപതി ശ്രീമതി ദ്രൗപതി മുര്മു ജിയെ സന്ദര്ശിച്ച, രാഷ്ട്രപതി ഭവനിലെ മറക്കാനാവാത്ത ഒരു ദിനം. എന്റെ 'ഉസ്താദ്-ഇ-ഗസല്' എന്ന പുസ്തകം അവര്ക്ക് സമ്മാനിക്കാന് സാധിച്ചതിലും കലയെയും സംസ്കാരത്തെയും ജീവിതത്തെയും കുറിച്ച് ഹൃദ്യമായ സംഭാഷണങ്ങളില് ഏര്പ്പെടാന് കഴിഞ്ഞതിലും ഞാന് അങ്ങേയറ്റം അഭിമാനിക്കുന്നു.
ലളിത എന്താണ് ചെയ്യുന്നത് എന്ന് അറിയാന് അവര്ക്ക് വലിയ താല്പര്യമായിരുന്നു. നീലഗിരിയില് അടുത്തിടെ ആരംഭിച്ച സിദ്ധിഗിരി സായ് ഹെല്ത്ത്കെയര് സെന്റര് ഉള്പ്പെടെ താന് ഏര്പ്പെട്ടിരിക്കുന്ന സാമൂഹിക പ്രവര്ത്തനങ്ങളെക്കുറിച്ച് ലളിത അവരുമായി പങ്കുവച്ചു.
ഏറ്റവും കൂടുതല് സ്പര്ശിച്ചത്, ഇത് ഞങ്ങളുടെ ആദ്യ കൂടിക്കാഴ്ചയാണെന്ന് തോന്നാത്ത വിധം വളരെ അനൗപചാരികവും ഊഷ്മളവുമായിരുന്നു ആ സന്ദര്ഭമെന്നതാണ്. അവരുടെ വിനയവും ദയയും ആഴത്തില് സ്വാധീനിച്ചു.അത്യന്തം അവിസ്മരണീയമായ ഒരു അനുഭവം''.
ഗസല് ഗാനരംഗത്തെ മികച്ച പ്രതിഭകളില് ഒരാളാണ് ഹരിഹരന്. സിനിമയിലും സജീവമാണ് അദ്ദേഹം. മലയാളം, തമിഴ്, ഹിന്ദി, കന്നഡ തുടങ്ങി നിരവധി ഭാഷകളില് അദ്ദേഹം പാടിയിട്ടുണ്ട്.
