പാലക്കാട്: ദളിത് യുവതിയുടെ പീഡന പരാതിയില് കുടുങ്ങിയ പാലക്കാട് കൗണ്സിലര് പ്രശോഭ് വത്സനെ കോണ്ഗ്രസ് പാര്ട്ടിയില് നിന്നും പുറത്താക്കി. പീഡന പരാതിയില് നേരിട്ട് ഇടപെട്ട കെപിസിസിയുടേതാണ് നടപടി. ഡിസിസി പ്രസിഡന്റ് സസ്പെന്റ് ചെയ്തതിന് പിന്നാലെയാണ് കെപിസിസി നേതൃത്വം നേരിട്ട് ഇടപെട്ട് പുറത്താക്കിയത്. പാലക്കാട് 24 ാം വാര്ഡ് കൗണ്സിലറാണ് പ്രശാഭ് വത്സന്.
സംഭവത്തിന് പിന്നാലെ പോലീസും അന്വേഷണം ആരംഭിക്കാനൊരുങ്ങുകയാണ്്. പ്രശോഭ് വത്സന് തന്നെ പീഡനത്തിന് ഇരയാക്കിയെന്ന് ആരോപിച്ച് യുവതി രംഗത്ത് വരികയായിരുന്നു. പ്രശോഭ് സി വത്സന് നിലവില് ഒളിവിലാണെന്നാണ് പൊലീസ് അറിയിക്കുന്നത്. മുഖ്യമന്ത്രിയുടെ ഓഫീസ് മുഖേന പാലക്കാട് ജില്ലാ പൊലീസ് മേധാവിക്ക് ലഭിച്ച പരാതിയിലാണ് അന്വേഷണം. പരാതിക്കാരിയായ യുവതിയുടെ മൊഴി ഉടന് രേഖപ്പെടുത്തും. പരിചയപ്പെട്ടശേഷം ജോലി വാഗ്ദാനം ചെയ്ത് നിരവധി തവണ പീഡിപ്പിച്ചെന്നാണ് ആക്ഷേപം.
ജോലിയുടെ അഭിമുഖത്തിനായി പട്ടാമ്പിയിലെ വ്യാപാര സ്ഥാപനത്തിലേക്ക് കൊണ്ടുപോകാമെന്ന് പറഞ്ഞ് കാറില് കയറ്റി, ശേഷം പീഡിപ്പിച്ചു. പാലക്കാട് ജില്ലാ ആശുപത്രിക്ക് സമീപത്ത് വെച്ചായിരുന്നു രണ്ടാമത് പീഡനം. ഭീഷണിപ്പെടുത്തി ഹോട്ടല് മുറിയിലേക്ക് വിളിച്ച് വരുത്തി. ആക്രമണം ഭയന്ന് മൊബൈലില് ദൃശ്യങ്ങള് ശേഖരിച്ചെന്നും അതിജീവിത പറഞ്ഞു. ഗര്ഭിണിയാണെന്നറിയിച്ചപ്പോള് ഗര്ഭഛിദ്രത്തിനുള്ള മരുന്ന് കഴിക്കാന് നിര്ബന്ധിച്ചെന്നും അതിജീവിത പറഞ്ഞു. ഷാഫി പറമ്പില് എം പി തന്റെ ആശാനാണെന്നും എംഎല്എമാര് എംപിമാര് തുടങ്ങിയവരുമായി അടുത്ത ബന്ധമുണ്ടെന്ന് പറഞ്ഞ് ഭീഷണിപ്പെടുത്തിയെന്നും യുവതി ആരോപിച്ചിരുന്നു.
ഗര്ഭിണിയാണെന്നറിയിച്ചപ്പോള് അലസിപ്പിക്കാനുള്ള മരുന്ന് കഴിക്കാന് നിര്ബന്ധിപ്പിച്ചു. മരുന്ന് കഴിക്കാന് വിസമ്മതിച്ചു. തുടര്ന്ന് ഫോണില് ബന്ധപ്പെടാന് ശ്രമിച്ചെങ്കിലും ചതിക്കപ്പെട്ടെന്ന് മനസ്സിലായെന്നും യുവതി പറഞ്ഞു. ലൈംഗിക പീഡന പരാതികള്ക്കിടെ ഒളിവില് പോയ രാഹുല് മാങ്കൂട്ടത്തില് എംഎല്എ തദ്ദേശ തെരഞ്ഞെടുപ്പില് പ്രശോഭിന് വോട്ട് ചെയ്യാനാണ് പാലക്കാട് തിരിച്ചെത്തിയത്.
