തിരുവനന്തപുരം: സഭകളുടെ ശക്തമായ പ്രതിഷേധത്തിന്റെ കൂടി പശ്ചാത്തലത്തില് വിദേശ സംഭാവന നിയന്ത്രണ നിയമത്തില് (FCRA) കേന്ദ്ര സര്ക്കാര് കൊണ്ടുവന്ന പുതിയ ഭേദഗതികള് പിന്വലിക്കണമെന്ന് ആവശ്യപ്പെട്ട് പ്രധാനമന്ത്രിക്ക് മുഖ്യമന്ത്രിയുടെ കത്ത്. നടപടി രാജ്യത്തെ ന്യൂനപക്ഷ വിഭാഗങ്ങള്ക്കിടയിലും ജീവകാരുണ്യ മേഖലയിലും വലിയ അനിശ്ചിതത്വം സൃഷ്ടിക്കുമെന്ന് കത്തില് വ്യക്തമാക്കി.
ന്യൂനപക്ഷ വിഭാഗങ്ങളും വിവിധ മതസ്ഥാപനങ്ങളും ഉയര്ത്തുന്ന ആശങ്കകള് പരിഹരിക്കാതെ ബില്ലുമായി മുന്നോട്ട് പോകരുത് എന്ന് മുഖ്യമന്ത്രി കേന്ദ്രത്തോട് ആവശ്യപ്പെട്ടു. മുഖ്യമന്ത്രി തന്റെ ഫേസ്ബുക്ക് കുറിപ്പിലൂടെയും ഇക്കാര്യം പറഞ്ഞിട്ടുണ്ട്. രജിസ്ട്രേഷന് പുതുക്കുന്നതില് സാങ്കേതികമായ തടസ്സങ്ങളുണ്ടായാല് പോലും സ്ഥാപനങ്ങളുടെ വിദേശ ഫണ്ടുകളും ആസ്തികളും കേന്ദ്ര സര്ക്കാര് നിശ്ചയിക്കുന്ന അതോറിറ്റിയുടെ നിയന്ത്രണത്തിലാകുന്നത് ഗുരുതരമായ പ്രത്യാഘാതങ്ങള്ക്ക് കാരണമാകും.
അപേക്ഷ നല്കുന്നതിലെ വൈകലോ നിസ്സാരമായ പിഴവുകളോ കാരണം രജിസ്ട്രേഷന് റദ്ദാക്കപ്പെടുകയും സ്വത്തുക്കള് കണ്ടുകെട്ടുകയും ചെയ്യുന്ന സാഹചര്യം ജനാധിപത്യ വിരുദ്ധമാണ്. നിലവില് രാജ്യത്തിന്റെ വിവിധ ഭാഗങ്ങളില് മതന്യൂനപക്ഷങ്ങളുടെ ആരാധനാലയങ്ങള്ക്ക് നേരെ ആക്രമണങ്ങള് വര്ദ്ധിച്ചുവരുന്ന പശ്ചാത്തലത്തില്, പുതിയ നിയമം ഈ വിഭാഗങ്ങളെ കൂടുതല് വേട്ടയാടാന് ഉപകരിക്കുമെന്ന ഭയം യുക്തിസഹമാണ്.
പൊതുതാല്പ്പര്യത്തിന് വിരുദ്ധമായ പ്രവര്ത്തനങ്ങള് തടയാന് 2010-ലെ നിലവിലുള്ള നിയമം തന്നെ മതിയെന്നും പുതിയ കര്ശന വ്യവസ്ഥകള് അനാവശ്യമാണെന്നും മുഖ്യമന്ത്രി വ്യക്തമാക്കി. സാങ്കേതിക കാരണങ്ങളാല് ഒരു സ്ഥാപനത്തിന്റെ പ്രവര്ത്തനം തടസ്സപ്പെടുന്നതും ആസ്തികള് സര്ക്കാര് ഏറ്റെടുക്കുന്നതും സ്വതന്ത്രമായ പ്രവര്ത്തനങ്ങളെ ബാധിക്കുമെന്നും അദ്ദേഹം കൂട്ടിച്ചേര്ത്തു.
