അമേരിക്കയിലെ കാലിഫോര്ണിയയിലുള്ള ഒരു സൂപ്പര്മാര്ക്കറ്റില് വെച്ച് യുവതിക്ക് നേരെ നടന്ന മോശം പെരുമാറ്റത്തിന്റെ ദൃശ്യങ്ങളാണ് ഇപ്പോള് സമൂഹ മാധ്യമങ്ങളില് വൈറലാകുന്നത്. ലോസ് ഏഞ്ചല്സ് കൗണ്ടി ഷെരീഫ് ഡിപ്പാര്ട്ട്മെന്റ് പുറത്തുവിട്ട സിസിടിവി ദൃശ്യങ്ങളാണ് സമൂഹമാധ്യമങ്ങളില് വലിയ രീതിയിലുള്ള പ്രതിഷേധങ്ങള്ക്കും ചര്ച്ചകള്ക്കും വഴിതെളിച്ചിരിക്കുകയാണ്. സംഭവത്തിന്റെ ഗൗരവം കണക്കിലെടുത്ത് പ്രതിയെ തിരിച്ചറിയാന് ജനങ്ങളുടെ സഹായം തേടിയിരിക്കുകയാണ് പോലീസ്. വലന്സിയയിലെ ഹോള് ഫുഡ്സ് സൂപ്പര്മാര്ക്കറ്റില് സാധനങ്ങള് വാങ്ങാനെത്തിയ യുവതിക്ക് നേരെയാണ് അതിക്രമം നടന്നത്.
കടയിലെ റാക്കില് നിന്നും സാധനങ്ങള് തിരഞ്ഞെടുക്കുകയായിരുന്ന യുവതിയുടെ അടുത്തേക്ക് വന്ന നീല വസ്ത്രം ധരിച്ച യുവാവ്, അശ്ലീലകരമായ രീതിയില് പെരുമാറുകയായിരുന്നു. യുവതിയുടെ ശ്രദ്ധ മാറിയ സമയത്ത് തന്റെ ജനനേന്ദ്രിയം അവരുടെ ശരീരത്തില് സ്പര്ശിപ്പിക്കാന് ശ്രമിച്ച ഇയാള്, യുവതി ഞെട്ടിത്തിരിഞ്ഞപ്പോള് ഒന്നുമറിയാത്ത ഭാവത്തില് സാധനങ്ങള് തിരയുന്നതായി അഭിനയിച്ചു. കഴിഞ്ഞ മാര്ച്ച് 23ന് നടന്ന സംഭവത്തില് പരാതി ലഭിച്ചയുടന് പോലീസ് സ്ഥലത്തെത്തിയെങ്കിലും പ്രതി അതിനോടകം രക്ഷപ്പെട്ടിരുന്നു. ഏകദേശം 30 വയസ്സ് പ്രായം തോന്നിക്കുന്ന, 6 അടി 1 ഇഞ്ച് ഉയരവും 100 കിലോയോളം ഭാരവുമുള്ള ഒരാളാണ് പ്രതിയെന്ന് പോലീസ് തിരിച്ചറിഞ്ഞിട്ടുണ്ട്. കറുത്ത മുടിയും തവിട്ട് നിറമുള്ള കണ്ണുകളുമുള്ള ഇയാളെക്കുറിച്ച് എന്തെങ്കിലും വിവരം ലഭിക്കുന്നവര് ഉടന് അറിയിക്കണമെന്ന് ഷെരീഫ് ഡിപ്പാര്ട്ട്മെന്റ് പൊതുജനങ്ങളോട് അഭ്യര്ത്ഥിച്ചു.
സമൂഹമാധ്യമങ്ങളില് ഈ വീഡിയോ വൈറലായതോടെ വലിയ തോതിലുള്ള പ്രതിഷേധമാണ് ഉയരുന്നത്. എന്നാല് പ്രതിയെ തിരിച്ചറിയുന്നതിന് മുന്പേ ഇയാളുടെ വംശത്തെയും പൗരത്വത്തെയും ചൊല്ലിയുള്ള തര്ക്കങ്ങളും സോഷ്യല് മീഡിയയില് സജീവമായി. പ്രതി ഏഷ്യന് വംശജനാണെന്നും ഇന്ത്യക്കാരനോ പാകിസ്ഥാനിയോ ആണെന്നും ചിലര് ആരോപിക്കുമ്പോള്, കുടിയേറ്റക്കാര്ക്കെതിരെയുള്ള വംശീയമായ അധിക്ഷേപങ്ങളും ഇതിന്റെ പേരില് നടക്കുന്നുണ്ട്. പ്രതിയെ പിടികൂടാന് വൈകുന്ന സാഹചര്യത്തില് ദൃശ്യങ്ങള് വ്യാപകമായി പ്രചരിപ്പിക്കാനാണ് അധികൃതരുടെ തീരുമാനം.
