കഴിഞ്ഞ ദിവസമാണ് യൂറോപ്പിനെ നടുക്കി 12 ടണ് കിറ്റ്കാറ്റ് മോഷണം പോയത്. ഇപ്പോഴിതാ ഇതുമായി ബന്ധപ്പെട്ട് സോഷ്യല് മീഡിയയില് രസകരമായ ചര്ച്ചകള്ക്ക് വഴിതുറന്നിരിക്കുകയാണ് കേരള ടൂറിസം. ഇറ്റലിയിലെ നിര്മ്മാണ കേന്ദ്രത്തില് നിന്നും പോളണ്ടിലേക്ക് പോവുകയായിരുന്ന ട്രക്ക് ലോഡ് ചോക്ലേറ്റാണ് വഴിമധ്യേ കാണാതായത്. 4,13,793 ബാറുകളടങ്ങിയ ഈ വന് ശേഖരം മോഷണം പോയ വാര്ത്ത അന്താരാഷ്ട്ര തലത്തില് ശ്രദ്ധിക്കപ്പെട്ടതോടെയാണ്, വിഷയത്തില് നര്മ്മം കലര്ന്ന പ്രതികരണവുമായി കേരള ടൂറിസം രംഗത്തെത്തിയത്.
കാണാതായ കിറ്റ്കാറ്റ് ഷിപ്പിംഗ് കണ്ടെയ്നറുകളെ കുറിച്ച് തങ്ങള് അന്വേഷിച്ചെന്നും എന്നാല് കേരളത്തില് എവിടെയും ഇത് എത്തിയിട്ടില്ലെന്നുമാണ് ടൂറിസം വകുപ്പ് ഔദ്യോഗിക പേജില് കുറിച്ചത്. കിറ്റ്കാറ്റിന്റെ പ്രശസ്തമായ 'Have a Break' എന്ന പരസ്യവാചകം കടമെടുത്തായിരുന്നു ഈ പോസ്റ്റ്. 'കാണാതായ കിറ്റ്കാറ്റ് ശേഖരത്തെക്കുറിച്ച് ഞങ്ങള്ക്കും വിവരം ലഭിച്ചു. ഞങ്ങളുടെ കായലുകളിലും മലയോരത്തും കടല്തീരങ്ങളിലും വിശദമായ പരിശോധന നടത്തി. അവയൊന്നും കേരളത്തില് എത്തിയിട്ടില്ലെന്ന് ഞങ്ങള്ക്ക് സ്ഥിരീകരിക്കാന് കഴിയും' എന്നായിരുന്നു കുറിപ്പ്.
ഈസ്റ്റര് ആഘോഷങ്ങള്ക്ക് തൊട്ടുമുമ്പ് നടന്ന ഈ 'കാന്ഡി കൊള്ള' യൂറോപ്പിലെ തന്നെ ഏറ്റവും വലിയ ചോക്ലേറ്റ് മോഷണമായാണ് കണക്കാക്കപ്പെടുന്നത്. വിതരണത്തിനായി വിവിധ രാജ്യങ്ങളിലേക്ക് പോകാനിരുന്ന ട്രക്ക് ഉള്പ്പെടെയാണ് മോഷ്ടാക്കള് തട്ടിയെടുത്തത്. ഗൗരവകരമായ ഈ വാര്ത്തയെ കേരളത്തിലെ വിനോദസഞ്ചാര കേന്ദ്രങ്ങളുമായി ബന്ധിപ്പിച്ച് ടൂറിസം വകുപ്പ് അവതരിപ്പിച്ചത് സോഷ്യല് മീഡിയ ഏറ്റെടുത്തു കഴിഞ്ഞു. നിരവധിപ്പേരാണ് ഈ ക്രിയാത്മകമായ പോസ്റ്റിന് താഴെ രസകരമായ കമന്റുകളുമായി എത്തുന്നത്.
