വിവാഹശേഷം ഭര്ത്താവിനൊപ്പം പുതിയ വീട്ടിലേക്ക് യാത്രയാകുന്ന വധുവിന്റെ സങ്കടം നാം പലപ്പോഴും കണ്ടിട്ടുണ്ടാകും. എന്നാല് ഉത്തരാഖണ്ഡിലെ ഡെറാഡൂണില് നിന്നുള്ള ഗൗരി സിംഗ് എന്ന വധുവിന്റെ വിടവാങ്ങല് ചടങ്ങാണ് ഇപ്പോള് സോഷ്യല് മീഡിയയില് കാണികളുടെ മനം കവര്ന്നിരിക്കുന്നത്. തന്നെ വിട്ടുപിരിയാന് സമ്മതിക്കാതെ ബാല്ക്കണിയില് നിന്ന് നോക്കുന്ന തന്റെ മൂന്ന് വളര്ത്തുനായ്ക്കള്ക്ക് അരികിലേക്ക് ഓടിയെത്തുന്ന ഗൗരി സിംഗിനെയാണ് വീഡിയോയില് കാണുന്നത്.
വിവാഹച്ചടങ്ങുകള്ക്ക് ശേഷം ഗൗരിയും ഭര്ത്താവും വീട്ടില് നിന്നും ഇറങ്ങുന്ന സമയത്ത് ബാല്ക്കണിയില് നിന്ന് നായ്ക്കള് നിര്ത്താതെ കുരച്ചുകൊണ്ട് തങ്ങളുടെ സങ്കടം പ്രകടിപ്പിക്കുകയായിരുന്നു. ഇത് കണ്ടതോടെ ഗൗരിക്ക് തന്റെ വികാരങ്ങള് നിയന്ത്രിക്കാനായില്ല. കലങ്ങിയ കണ്ണുകളുമായി ഗൗരി തിരികെ ബാല്ക്കണിയിലേക്ക് ഓടിച്ചെല്ലുകയും അവയെ ഓരോരുത്തരെയായി ചേര്ത്തുപിടിച്ച് ഉമ്മ നല്കുകയും ചെയ്തു. 'അമ്മ ഇവിടെത്തന്നെയുണ്ട്' എന്ന് പറഞ്ഞ് അവരെ ആശ്വസിപ്പിക്കാന് ശ്രമിക്കുന്ന ഗൗരിയുടെ സ്നേഹം വീഡിയോയില് വ്യക്തമാണ്.
'ഡോഗു സ്ക്വാഡ്' എന്ന ഇന്സ്റ്റാഗ്രാം പേജിലൂടെ പങ്കുവെച്ച ഈ വീഡിയോ ഇതിനോടകം 4.3 കോടിയിലധികം ആളുകള് കണ്ടുകഴിഞ്ഞു. ലക്ഷക്കണക്കിന് ലൈക്കുകളാണ് വീഡിയോയ്ക്ക് ലഭിക്കുന്നത്. 'യഥാര്ത്ഥ പെറ്റ് പേരെന്റ്സിന് മാത്രമേ ഈ വികാരം മനസ്സിലാക്കാന് സാധിക്കൂ' എന്നും 'മൃഗങ്ങള് മനുഷ്യരേക്കാള് വിശ്വസ്തരാണ്' എന്നും തുടങ്ങി നിരവധി ഹൃദയസ്പര്ശിയായ കമന്റുകളാണ് വീഡിയോയ്ക്ക് താഴെ വരുന്നത്. നായ്ക്കളെയും കൂടെ കൊണ്ടുപോകണമെന്ന് പോലും പലരും സ്നേഹത്തോടെ ആവശ്യപ്പെടുന്നുണ്ട്.
