ആരാധകര് ഏറെ ആകാംക്ഷയോടെ കാത്തിരിക്കുന്ന ചിത്രമാണ് മമ്മൂട്ടിയേയും മോഹന്ലാലിനേയും പ്രധാനകഥാപാത്രങ്ങളാക്കി മഹേഷ് നാരായണന് സംവിധാനംചെയ്യുന്ന ബിഗ് ബജറ്റ് ചിത്രം ‘പേട്രിയറ്റ്’. സിനിമയുടെ ഓരോ അപ്ഡേഷനും ആവേശത്തോടെയാണ് ആരാധകര് ഏറ്റെടുത്തത്. അടുത്തിടെ സിനിമയുടേതായി എത്തിയ പോസ്റ്ററും നിമിഷനേരം കൊണ്ട് തരംഗമായി മാറിയിരുന്നു.
വിവിധ രാജ്യങ്ങളിലായി പത്തിലധികം ഷെഡ്യൂളുകളിലായി ഒരുവർഷത്തിലധികം നീണ്ട ചിത്രീകരണത്തിനൊടുവിലാണ് ‘പേട്രിയറ്റ്’ ആരാധകര്ക്ക് മുന്നിലെത്തുന്നത്. എന്നാല് ഏപ്രില് 23 ന് റിലീസ് ചെയ്യാനിരുന്ന ചിത്രം പശ്ചിമേഷ്യൻ സംഘർഷം കടുത്ത വേളയില് റിലീസ് മാറ്റി വച്ചിരുന്നു. ഈ വാര്ത്ത അറിഞ്ഞതോടെ ആരാധകരും ഏറെ സങ്കടത്തിലായി.
ഇപ്പോഴിതാ മലയാള സിനിമ കാത്തിരിക്കുന്ന ബ്രഹ്മാണ്ഡ ചിത്രം ‘പേട്രിയറ്റ്’ മെയ് ഒന്നിന് ആഗോളതലത്തിൽ റിലീസ് ചെയ്യുമെന്ന സന്തോഷം പങ്കിടുകയാണ് മമ്മൂട്ടി. ‘‘2026 മെയ് 01 മുതൽ ലോകമെമ്പാടുമുള്ള സിനിമാശാലകളിൽ ‘പേട്രിയറ്റ്’ എത്തും...’ എന്നാണ് മമ്മൂട്ടി കുറിച്ചിരിക്കുന്നത്. മമ്മൂട്ടിക്കൊപ്പം മോഹന്ലാലും ഈ സന്തോഷം സോഷ്യല് മീഡിയയിലൂടെ പങ്കുവച്ചിട്ടുണ്ട്. മഹേഷ് നാരായണൻ സംവിധാനം ചെയ്യുന്ന ത്രില്ലർ ചിത്രത്തില് 18 വർഷത്തെ നീണ്ട ഇടവേളയ്ക്ക് ശേഷം മലയാളത്തിന്റെ മഹാനടന്മാർ സ്ക്രീനിൽ ഒന്നിക്കുന്നു എന്ന പ്രത്യേകത കൂടിയുണ്ടെന്നുള്ളതാണ് ആരാധകരെ ഏറെ ത്രില്ലടിപ്പിക്കുന്നത്.
ചൊവ്വാഴ്ചയായിരുന്നു ചിത്രത്തിന്റെ നിര്മാതാന് ആന്റോ ജോസഫ് റിലീസ് നീട്ടിയതായി അറിയിച്ചത്. നിനച്ചിരിക്കാതെ സംഭവിച്ച സാഹചര്യങ്ങളുടെ സമ്മര്ദ്ദം മൂലം ചിത്രത്തിന്റെ റിലീസ് നേരത്തെ നിശ്ചയിച്ചിരുന്ന ഏപ്രില് 23 ല് നിന്നും കുറച്ച് ദിവസങ്ങളിലേക്ക് മാറ്റുന്നു എന്നായിരുന്നു അറിയിപ്പ്. സോഷ്യല് മീഡിയ കുറിപ്പിലൂടെയാണ് റിലീസ് മാറ്റി വച്ച കാര്യം നിര്മാതാവ് അറിയിച്ചത്.
ശ്രീലങ്ക, അസർബൈജാൻ, ഡൽഹി, ഷാർജ, കൊച്ചി, ലഡാക്ക് എന്നിവിടങ്ങളിലായാണ് ചിത്രത്തിന്റെ മുൻ ഷെഡ്യൂളുകൾ പൂർത്തിയാക്കിയ ഈ ദൃശ്യവിസ്മയത്തില് ട്വന്റി-20ക്ക് ശേഷം മലയാളത്തിലെ പ്രമുഖ താരങ്ങളെല്ലാം അണിനിരക്കുന്നുണ്ട്. ഫഹദ് ഫാസിൽ, കുഞ്ചാക്കോ ബോബൻ, നയൻതാര, രാജീവ് മേനോൻ തുടങ്ങിയ വൻ താരനിര തന്നെയുണ്ട് ചിത്രത്തില്. മലയാളത്തിൽ ഇന്നേവരെയുള്ളതിൽ വച്ച് ഏറ്റവും വലിയ ബജറ്റിലാണ് ചിത്രം നിർമിച്ചിരിക്കുന്നത്.
