അമേരിക്കയിലെ ബാള്ട്ടിമോറില് 'മൂസ സ്റ്റീക്ക് ആന്ഡ് ഡോഗ്സ്' എന്ന ഫുഡ് ട്രക്ക് നടത്തുന്ന പ്രശസ്ത സോഷ്യല് മീഡിയ താരം മുഹ്സിന് സറാക്കിന് നേരിടേണ്ടി വന്ന ഒരു വിചിത്രമായ അനുഭവം ഇപ്പോള് സൈബര് ലോകത്ത് വലിയ ചര്ച്ചയാവുകയാണ്. തുര്ക്കി വംശജനായ ഇദ്ദേഹം കഴിഞ്ഞ മാര്ച്ച് 28ന് തന്റെ ബിസിനസ്സ് ലൈവ് സ്ട്രീം ചെയ്യുന്നതിനിടെയാണ് അപ്രതീക്ഷിതമായ ആ മോഷണം നടന്നത്. ഒരാള് പെട്ടെന്ന് കൗണ്ടറിലിരുന്ന ടിപ്പ് ജാറില് നിന്ന് പണം തട്ടിയെടുത്ത് ഓടുകയായിരുന്നു. ക്യാമറയില് ഈ ദൃശ്യങ്ങള് കൃത്യമായി പതിഞ്ഞെങ്കിലും, ദിവസങ്ങള്ക്ക് ശേഷം തന്നെ തേടിയെത്തിയ സന്ദര്ശകനെ കണ്ട് സറാക്ക് അക്ഷരാര്ത്ഥത്തില് ഞെട്ടിപ്പോയി.
തന്റെ സ്ഥാപനത്തില് നിന്നും പണം മോഷ്ടിച്ച യുവാവിന്റെ അമ്മയായിരുന്നു സറാക്കിനെ കാണാന് നേരിട്ടെത്തിയത്. മകന് എത്ര രൂപയാണ് മോഷ്ടിച്ചതെന്ന് ചോദിച്ചറിഞ്ഞ ആ അമ്മ, സറാക്കിന്റെ എതിര്പ്പുകള് അവഗണിച്ച് കൊണ്ട് ഏകദേശം 30 ഡോളറോളം (2,500 രൂപ) തിരികെ ടിപ്പ് ജാറില് തന്നെ നിക്ഷേപിച്ചു. ഒരാളുടെ പണം കവരാന് പഠിപ്പിച്ചല്ല താന് മകനെ വളര്ത്തിയതെന്ന് പറഞ്ഞ് വികാരാധീനയായ അവര് സറാക്കിനോട് ക്ഷമ ചോദിക്കുകയും ചെയ്തു. മകന് മദ്യലഹരിയില് എടുത്ത തെറ്റായ തീരുമാനമായിരുന്നു അതെന്നും ആ വ്യക്തി ഒരു മോശം മനുഷ്യനല്ലെന്നും അവര് ആശ്വസിച്ചു.
മുഹ്സിന് സറാക്ക് തന്റെ ഇന്സ്റ്റാഗ്രാം, യൂട്യൂബ് അക്കൗണ്ടുകളിലൂടെ ഈ വൈകാരികമായ വീഡിയോ പങ്കുവെച്ചതോടെയാണ് സംഭവം ലോകമറിഞ്ഞത്. 'നിങ്ങളുടെ പണം മോഷ്ടിക്കപ്പെടാന് പാടില്ലാത്തതാണ്, അതുകൊണ്ട് എനിക്ക് ഇത് തിരികെ നല്കണം' എന്ന് ആ അമ്മ പറയുന്ന ഭാഗം പ്രേക്ഷകരുടെ ഹൃദയം കീഴടക്കി. വീഡിയോയുടെ അവസാന നിമിഷങ്ങളില് വികാരാധീനനായ സറാക്ക് ആ അമ്മയെ കെട്ടിപ്പിടിക്കുന്നത് കാണുന്നവരുടെ കണ്ണുനിറയ്ക്കുന്ന കാഴ്ചയായിരുന്നു. നിമിഷങ്ങള്ക്കകം തന്നെ ഈ ദൃശ്യങ്ങള് സോഷ്യല് മീഡിയയില് തരംഗമായി മാറി.
ലോകത്ത് മാനവികതയും സത്യസന്ധതയും ഇനിയും നശിച്ചിട്ടില്ല എന്നതിന്റെ വലിയ തെളിവാണിതെന്ന് വീഡിയോയ്ക്ക് താഴെ വന്ന കമന്റുകള് വ്യക്തമാക്കുന്നു. മകന്റെ തെറ്റ് തിരുത്താന് കാണിച്ച ആ അമ്മയുടെ ആര്ജ്ജവത്തെയും ധീരതയെയും സമൂഹ മാധ്യമ ഉപയോക്താക്കള് ഒന്നടങ്കം അഭിനന്ദിക്കുകയാണ്. നിലവില് ലക്ഷക്കണക്കിന് ഫോളോവേഴ്സുള്ള സറാക്ക് തന്റെ ഫുഡ് ട്രക്ക് വിശേഷങ്ങളും ഗെയിമിംഗ് വീഡിയോകളും സ്ഥിരമായി പങ്കുവെക്കാറുണ്ടെങ്കിലും, ഈ അനുഭവം അദ്ദേഹത്തിന്റെ ജീവിതത്തിലെ ഏറ്റവും അവിസ്മരണീയമായ ഒന്നായി മാറി.
