തൃശൂര്: തൃശൂരില് സുരേഷ് ഗോപിയെ വിജയിപ്പിക്കാന് പ്രതാപന് രഹസ്യ ധാരണയുണ്ടാക്കിയെന്ന് ആരോപണം ഉന്നയിച്ച് കോണ്ഗ്രസ് നേതാവ്. ഇതിനായി എട്ടു കോടി രൂപ കൈപ്പറ്റിയെന്ന് ആരോപണവുമായി രംഗത്ത് വന്നിട്ടുള്ളത് നാട്ടിക ബ്ലോക്ക് പ്രസിഡന്റ് വി.എ. ഫിറോസ് ആണ്. സി.പി.ഐ.എം ജില്ലാ കമ്മിറ്റി ഓഫീസില് വെച്ച് നടത്തിയ വാര്ത്താ സമ്മേളനത്തിലാണ് ആരോപണം ഉന്നയിച്ചത്.
സുരേഷ് ഗോപിയുടെ വിജയത്തിനായി നാട്ടികയിലും മണലൂരിലും വിതരണം ചെയ്യാന് എട്ടു കോടി രൂപ ബിജെപിയില് നിന്ന് പ്രതാപന് വാങ്ങി. ഈ ഇടപാടിന് തന്റെ പക്കല് വ്യക്തമായ തെളിവുകളുണ്ടെന്നും ഫിറോസ് അവകാശപ്പെട്ടു. ബിജെപിയുടെ കിറ്റ് വിതരണത്തിനെതിരെ പ്രതാപന് നടത്തിയ പ്രതിഷേധം മുന്കൂട്ടി പ്ലാന് ചെയ്ത നാടകമായിരുന്നു. മുസ്ലിം, ക്രൈസ്തവ വോട്ടുകള് സമാഹരിക്കാനായി ബിജെപി നേതാക്കളുമായി ചേര്ന്ന് തയ്യാറാക്കിയ തിരക്കഥയാണിതെന്ന് ഫിറോസ് ആരോപിച്ചു. കഴിഞ്ഞ പാര്ലമെന്റ് തിരഞ്ഞെടുപ്പ് മുതല്ക്കേ പ്രതാപനും ബിജെപിയും തമ്മില് ഗൂഢമായ ബന്ധമുണ്ടെന്നും ഇതിന്റെ രേഖകള് കോണ്ഗ്രസ് പ്രവര്ത്തകരുടെ പക്കലുണ്ടെന്നും അദ്ദേഹം പറഞ്ഞു.
'കണ്ണുകൊണ്ട് കണ്ട കാര്യങ്ങളാണ് ഞാന് പറയുന്നത്. സുരേഷ് ഗോപിയെ ജയിപ്പിക്കാന് നടത്തിയ ഇടപെടലുകള് നിസ്സാരമല്ല,' എന്ന് വി.എ. ഫിറോസ് വാര്ത്താ സമ്മേളനത്തില് ആവര്ത്തിച്ചു. അതേസമയം, തൃശൂര് വാടാനപ്പള്ളിയിലെ വിവാദമായ കിറ്റ് വിതരണവുമായി ബന്ധപ്പെട്ട് നിയമനടപടികള് കടുക്കുകയാണ്. തിരഞ്ഞെടുപ്പ് കമ്മീഷന്റെ പരാതിയില് പോലീസിന് മജിസ്ട്രേറ്റിന്റെ അനുമതി ലഭിച്ചതോടെ ഉടന് കേസെടുക്കും. ഭാരതീയ ന്യായ സംഹിത, ജനപ്രാതിനിധ്യ നിയമം എന്നിവയിലെ വിവിധ വകുപ്പുകള് പ്രകാരമായിരിക്കും നടപടി. ഗോഡൗണ് ഉടമ പ്രവീണ്, കിറ്റുകള്ക്ക് ഓര്ഡര് നല്കിയ സതീഷ് എന്നിവരെ പോലീസ് നിലവില് ചോദ്യം ചെയ്തു വരികയാണ്.
