മലയാളികള്ക്ക് ഏറെ പ്രിയപ്പെട്ട ഗായകനാണ് ജി. വേണുഗോപാല്. ഇപ്പോള് വിവാഹവാര്ഷികദിനത്തില് സോഷ്യല് മീഡിയയില് കുറിപ്പ് പങ്കുവച്ചിരിക്കുകയാണ് ജി. വേണുഗോപാല്.
''വീണ്ടുമൊരു വിവാഹ വാര്ഷികം. അങ്ങനെ ഞങ്ങള്ക്ക് മുപ്പത്തിയാറ് വയസ്സ്, അതോ മുപ്പത്തിയഞ്ചോ?1990 ഏപ്രില് 8 ആയിരുന്നു വിവാഹം, ഗുരുവായൂര് സത്രം ഹാളില്. പ്രണയം, സ്നേഹം, പരസ്പര വിശ്വാസം, വിട്ടുവീഴ്ചകള്, ഒന്നിനെക്കുറിച്ചും ക്ലാസ് എടുക്കാന് ഞങ്ങളില്ലേ. കൂടുതല് സംസാരിച്ച് വെറുപ്പിക്കരുതെന്ന് രശ്മി പ്രത്യേകം ശട്ടം കെട്ടിയിരിക്കുന്നു. അവളേയും ഉള്പ്പെടുത്തി ഈ സോഷ്യല് മീഡിയയില് വരാനോ ഒരു ഫോട്ടോ എടുപ്പിക്കാനോ ഞാന് പെടുന്ന പാടോര്ക്കുമ്പോള് എനിക്കെന്റെ ക്ഷമയില് അഭിമാനം തോന്നിപ്പോകാറുണ്ട്. പക്ഷേ അതാണ് വിവാഹം, സൗഹൃദം, പ്രണയം, കൂട്ടുകെട്ട്, എല്ലാം. തികച്ചും വിഭിന്നരായ രണ്ടുപേര് ഒരു കുടക്കീഴില് സ്വയം അരഞ്ഞരഞ്ഞ് ചന്ദന ഗന്ധം അവശേഷിപ്പിക്കുന്നു. ഇനി ഞങ്ങളെ രണ്ടു പേരെയും പോലെ തീരെയല്ലാത്ത രണ്ടു മക്കളും അങ്ങനെയേ ആകാവൂ. എല്ലാവരും ഒരു പോലെയായാലുള്ള ഒരു തികഞ്ഞ ബോറടി ഒന്നാലോചിച്ചു നോക്കൂ. ഏഴു നിറങ്ങളുണ്ടെങ്കിലല്ലേ മഴവില്ലുള്ളൂ?
അങ്ങനെ ഭരണപക്ഷവും പ്രതിപക്ഷവും ഒരു പോലെ ചേര്ന്ന ഞങ്ങളുടെ കുടുംബം ഇതുവരെ ഒരു വാക്ക് ഔട്ട് പോലും നടത്താതെ അടുത്ത ഇലക്ഷന് മുന്പ് ചുറ്റും നിരീക്ഷിക്കട്ടെ. ചിരിയും, കൂട്ടുകെട്ടും, ഇടയ്ക്ക് വഴക്കും, സങ്കടവും, ദേഷ്യവും, വീണ്ടും ഒത്തുചേരലുമായ് അടുത്ത വര്ഷത്തേയ്ക്ക്.. ഈ സുദിനം കൂട്ടുകാരും വഴികാട്ടികളുമായ ചിറയ്ക്കാകോട് ഇളങ്ങല്ലൂര് സദാനന്ദന് നമ്പൂതിരിയോടും ജീവനോടുമൊപ്പം'', എന്നാണ് ജി. വേണുഗോപാല് ഫേസ്ബുക്കില് കുറിച്ചത്. ഭാര്യ രശ്മിയ്ക്കൊപ്പമുളള ചിത്രവും അദ്ദേഹം പങ്കുവച്ചിട്ടുണ്ട്.
അരവിന്ദ് വേണുഗോപാല്, അനുപല്ലവി എന്നിങ്ങനെ രണ്ട് മക്കളാണ് ഈ ദമ്പതികള്ക്കുളളത്. അച്ഛന്റെ പാത പിന്തുടര്ന്ന് അരവിന്ദും പിന്നണി ഗാനരംഗത്ത് സജീവമാണ്. ' ഹൃദയം' , ' ലൂക്ക' തുടങ്ങിയ സിനിമകളില് അരവിന്ദ് പാടിയിട്ടുണ്ട്. 2025 ഡിസംബറിലായിരുന്നു അരവിന്ദും നടിയും മോഡലുമായ സ്നേഹയുടെയും വിവാഹം നടന്നത്.
