തിയേറ്ററുകളില് വിജയകരമായി പ്രദര്ശനം തുടരുകയാണ് സവിന് സ സംവിധാനം ചെയ്ത ചിത്രം ' വാഴ 2'. സോഷ്യല് മീഡിയ താരങ്ങളായ ഹാഷിര്, അലന് ബിന് സിറാജ്, അജിന് ജോയ്, വിനായക് എന്നിവരാണ് ചിത്രത്തില് പ്രധാന വേഷങ്ങളിലെത്തുന്നത്. റിലീസ് ചെയ്ത് ഏഴു ദിവസംകൊണ്ട് ചിത്രം 100 കോടി ക്ലബ്ബിലും ഇടംനേടിയിരുന്നു.
ഇപ്പോഴിതാ, ചിത്രം കണ്ട ശേഷം താരങ്ങളെ നേരിട്ട് വിളിച്ച് അഭിനന്ദിച്ചിരിക്കുകയാണ് കോണ്ഗ്രസ് നേതാവ് കെ.സി വേണുഗോപാല്. ഹാഷിറിനോട് വീഡിയോ കോളില് നേരിട്ടു സംസാരിച്ചുകൊണ്ടയിരുന്നു കെ.സി അഭിനന്ദനം അറിയിച്ചത്. തങ്ങള് ആയിരം പ്രസംഗങ്ങള് നടത്തുന്നതിലും ഫലമാണ് ഈ ഒറ്റ സിനിമയെന്നും അദ്ദേഹം പറഞ്ഞു. താരങ്ങളും അണിയറപ്രവര്ത്തകരുമായി വീഡിയോ കോളില് സംസാരിക്കുന്നതിന്റെ ദൃശ്യങ്ങള് അദ്ദേഹം സോഷ്യല് മീഡിയയില് പങ്കുവച്ചിട്ടുണ്ട്.
"വാഴ 2 കുടുംബത്തോടൊപ്പം കണ്ടു. ഇൻസ്റ്റഗ്രാം റീൽ താരങ്ങളായ ഹാഷിറും ടീമും മറ്റു അഭിനേതാക്കളും എത്ര മനോഹരമായാണ് അവരുടെ കഥാപാത്രങ്ങളെ അവതരിപ്പിച്ചിരിക്കുന്നത്. സിനിമ കണ്ടതിനു പിന്നാലെ അഭിനേതാക്കളെ ഫോണിൽ വിളിച്ച് അഭിനന്ദിച്ചു. ഹാഷിർ, അലൻ, അജിൻ, വിനായക് എന്നിവർക്കും, സംവിധാനം നിർവഹിച്ച സവിൻ സായ്ക്കും രചന നിർവഹിച്ച വിപിൻ ദാസിനും അണിയറപ്രവർത്തകർക്കും അഭിനന്ദനങ്ങൾ", കെ.സി വേണുഗോപാൽ കുറിച്ചു.
സംവിധായകന് വിപിന് ദാസാണ് വാഴ പോലെ വാഴ 2 ഉം എഴുതിയിരിക്കുന്നത്. വിജയ് ബാബു, ബിജുക്കുട്ടന്, അല്ഫോന്സ് പുത്രന്, അജു വര്ഗീസ്, സുധീഷ്, അമീന്, നിഹാല് തുടങ്ങിയ താരങ്ങളും വാഴ 2ല് സുപ്രധാന വേഷങ്ങളില് എത്തിയിരുന്നു.
