പൊള്ളാച്ചി: വാല്പ്പാറ അപകടത്തില് മരിച്ച ഒമ്പത് പേരുടെയും മൃതദേഹങ്ങളുമായി ആംബുലന്സുകള് പൊള്ളാച്ചിയില് നിന്ന് പുറപ്പെട്ടു. ഒമ്പത് പേരുടേയും പോസ്റ്റുമാര്ട്ടം കഴിഞ്ഞ ശേഷം നാട്ടിലേക്ക് ഉടന് എത്തിക്കും. അമ്പലപ്പറമ്പ് സര്ക്കാര് ഹയര്സെക്കണ്ടറി സ്കൂളിലാണ് പൊതുദര്ശനം. ഒരു മണിക്കൂറോളം പൊതുദര്ശനത്തിന് വെച്ച ശേഷം 10 മണിയോടെ വീടുകളിലേക്ക് കൊണ്ടുപോകും.
പൊള്ളാച്ചി ആശുപത്രിയില് വെച്ച് ഒമ്പത് പേരുടെയും പോസ്റ്റ്മോര്ട്ടം പൂര്ത്തീകരിച്ചു. അര്ധരാത്രി 12 മണിയോടെ ആരംഭിച്ച പോസ്റ്റുമോര്ട്ടം പൂര്ത്തിയായത് പുലര്ച്ചെ 4 മണിയോടെയാണ്. ആംബുലന്സുകള് കേരളത്തിലേക്ക് പ്രവേശിച്ചു. പൊള്ളാച്ചി - വാല്പ്പാറ റോഡിലെ മദ്രസയില് മയ്യത്ത് നമസ്കാരം കഴിഞ്ഞാണ് മൃതദേഹങ്ങള് അടങ്ങുന്ന ആംബുലന്സ് കേരളത്തിലേക്ക് പുറപ്പെട്ടത്.
കേരള അതിര്ത്തിവരെ ആംബുലന്സുകള്ക്ക് തമിഴ്നാട് പൊലീസ് അകമ്പടിയുണ്ടായി. ഒരു മണിക്കൂര് പൊതുദര്ശനം നടക്കും. പ്രധാന അധ്യാപിക പുലാമന്തോള് സ്വദേശി അജിതയുടെ സംസ്കാരം ഷൊര്ണൂര് ശാന്തി തീരത്ത് നടക്കും. ആശയുടെ സംസ്കാരം വീട്ടുവളപ്പില് നടക്കും. മജീദ്, ഭാര്യ റുഖിയ എന്നിവരുടെ ഖബറടക്കം മാട്ടാത്ത് മഹല്ലിലും റംല, സാജിദ, ഷക്കീല എന്നിവരുടെ ഖബറടക്കം പാങ്ങ് ജുമാ മസ്ജിദിലും നടക്കും. സുഹറ, മകന് ഹിഷാം എന്നിവരുടെ ഖബറടക്കം ഈസ്റ്റ് പാങ്ങ് മസ്ജിദ് ഖബര് സ്ഥാനില് നടക്കും.
മലപ്പുറം ഡിഎംഒ നിര്ദേശിച്ച പ്രകാരം താഹസില്ധാര് ഉള്പ്പടെ അഞ്ച് പേരുടെ മെഡിക്കല് സംഘം കോയമ്പത്തൂര് മെഡിക്കല് കോളേജ് ആശുപത്രിയിലെത്തിയിരുന്നു. പരിക്കേറ്റ 11കാരി മസ്നീന് കോട്ടക്കല് ആശുപത്രിയിലും ചികിത്സയിലാണ്. കൊയമ്പത്തൂര് മെഡിക്കല് കോളേജില് ചികിത്സയില് ഉള്ള മൂന്ന് പേരും നീരീക്ഷണത്തില് തുടരുകയാണ്. സാജിതയുടെ മകന് ഷഹദിന് (11), ട്രാവലര് ഡ്രൈവര് മുഹമ്മദ് ഫായിസ് (22), സ്കൂള് ബസ് ഡ്രൈവര് നൗഷാദ് (39) എന്നിവരാണ് ചികിത്സയിലുള്ളത്. പരി മരിച്ചവരില് ഏഴു സ്ത്രീകളും ഒരു പുരുഷനും ഒരു കുട്ടിയുമുണ്ട്.
