കൊല്ലം: വാലന്റൈന് ദിനത്തില് കരുനാഗപ്പള്ളി അഴീക്കല് ബീച്ചില് സദാചാരഗുണ്ടകളുടെ അക്രമത്തിനിരയായ സംഭവത്തില് യുവാവിനൊപ്പം ഉണ്ടായിരുന്നെന്ന് കരുതുന്ന യുവതിയുടേതെന്ന രീതിയിലുള്ള കുറിപ്പ് സാമൂഹ്യമാധ്യമങ്ങളില് വൈറലാകുന്നു. സംഭവത്തില് അക്രമത്തിനിരയായ പാലക്കാട് അട്ടപ്പാടി കാരറ സ്വദേശി അനീഷിനെ കഴിഞ്ഞ ദിവസം തൂങ്ങിമരിച്ച നിലയില് കണ്ടെത്തിയിരുന്നു. ഇതിന് പിന്നാലെയാണ് അഴീക്കല് ബീച്ചില് അനീഷിനൊപ്പം ഉണ്ടായിരുന്ന സുഹൃത്തിന്റേത് എന്ന നിലയില് ഫേസ്ബുക്കില് കുറിപ്പ് പ്രചരിക്കുന്നത്.
യാതൊരു സ്ഥിരീകരണവുമില്ലെങ്കിലും കുറിപ്പ് വൈറലാകുകയാണ്. ഒരു ഭീരുവിനെപ്പോലെ മരിക്കാനില്ലെന്നും ഒളിച്ചോടിയാല് സമുഹത്തിന് മുന്നില് തെറ്റുകാരായി മാറുമെന്നും നാളെ ഒരാള്ക്കും ഈ വിധി ഉണ്ടാകാതിരിക്കാന് ജീവിച്ചേ മതിയാകൂ എന്നും കുറിപ്പില് പറയുന്നു. പലരും ഷെയറും ലൈക്കും കമന്റും ചെയ്ത കുറിപ്പ് ഇങ്ങിനെ പോകുന്നു.
എന്റെ പ്രിയപ്പെട്ട അനീഷിന്..
നീ എന്തിനാടാ എന്നെ ഒറ്റയ്ക്കാക്കി പോയത്. എന്റെ എല്ലാ പ്രതീക്ഷയും നിന്നിലായിരുന്നു. എന്നെ കൈപിടിച്ച് കൊണ്ട് പോകുമെന്ന സ്വപ്നം എനിയ്ക്കുണ്ടായിരു ന്നു. എല്ലാം ഒരു നിമിഷം കൊണ്ട്
ഞാനൊരു പെണ്കുട്ടിയാണ്. എന്നിട്ടും ഞാന് പിടിച്ചു നിന്നില്ലേ? സമൂഹം എന്നെ ഏത് കണ്ണുകൊണ്ടാണ് കാണുന്നതെന്നും എന്റെ കുടുംബത്തെ മൊത്തത്തില് എന്തൊക്കെയാണ് പറയുന്നതെന്നും നിനക്കറിയാമോ? അതിനു ശേഷം ഞാന് വീട്ടില് നിന്ന് പുറത്തിറങ്ങിയിട്ടില്ല.. ഒരു കോണിലിരുന്ന് അമ്മ തലതല്ലിക്കരഞ്ഞ് പിരാകുന്നുണ്ട്.. അച്ഛന് ജോലിയ്ക്ക് പോയിട്ടില്ല.. പല രാത്രികളിലും ഉറക്കമില്ലാതെ ആ പാവം ഉമ്മറത്തിരുന്നു കരയുന്നുണ്ട്.
പക്ഷെ എനിയ്ക്ക് നിന്നില് ഒരു പാട് പ്രതീക്ഷയുണ്ടായിരുന്നു. ആ പ്രതീക്ഷ മാത്രമാണ് എന്നെ ജീവിയ്ക്കാന് പ്രേരിപ്പിച്ചതും. ഈ ദുഷിച്ച സമൂഹത്തിനു മുന്നില് നമുക്ക് ജീവിച്ച് കാണിയ്ക്കണമായിരുന്നു. അന്ന് അഴീക്കല് ബീച്ചില് വച്ച് നമ്മള് എന്ത് തെറ്റാണ് ചെയ്തത്? അതിരുവിട്ട് നമ്മളെന്തെങ്കിലും ചെയ്തോ?പോലീസ് സ്റ്റേഷനിലും നീ സധൈര്യമായാണ് പെരുമാറിയത്. പക്ഷെ എവിടെയാണ് നിനക്ക് പിഴച്ചത്?
സോഷ്യല് മീഡിയ നമ്മോടൊപ്പമായിരുന്നില്ലേ . ഭരണകൂടം നമ്മോടൊപ്പമായിരുന്നില്ലേ.പിന്നെ നീ ആരെയാണ് ഭയപ്പെട്ടത്? ഞാന് ഇനി ആര്ക്കു വേണ്ടി ജീവിയ്ക്കണം?
ഞാന് ജീവിയ്ക്കും അനീഷ്. എനിയ്ക്ക് ജീവിയ്ക്കണം. ഒരു ഭീരുവിനെപ്പോലെ ഒളിച്ചോടാന് ഞാനില്ല. അങ്ങനെ ചെയ്താല് ഞാനും നീയും സമൂഹത്തിനു മുന്നില് തെറ്റുകാരാകും .നാളെ ഒരാള്ക്കും ഈ അവസ്ഥയുണ്ടാകാന് പാടില്ല. അതിന് ഞാന് ജീവിച്ചേ മതിയാകൂ.
നിന്നോട് സംസാരിച്ച് കൊതി തീര്ന്നിട്ടില്ല അനീഷ്. ജീവിയ്ക്കാനുള്ള ആഗ്രഹത്തിനും.. പൊരുതാനുറച്ച് തന്നെയാണ് ഞാന് ഇനി ജീവിയ്ക്കുക. എന്റെ കണ്ണ് ഇനി നിറയില്ല. എന്റെ ചെറിയൊരു വേദന പോലും നിനക്ക് സഹിയ്ക്കാന് കഴിയില്ല. എന്റെ മുന്നോട്ടുള്ള ജീവിതത്തിന് ഒരദൃശ്യ ശക്തിയായി നീയുണ്ടാകുമെന്നെനിയ്ക്കറിയാം. ആ ഒരു പ്രതീക്ഷയോടെ..
സ്വന്തം.
മോളൂട്ടി.
സംഭവത്തില് രണ്ടുപേര്ക്കെതിരേ പോലീസ് കേസെടുത്തിട്ടുണ്ട്. ധനീഷ്, രമേശ് എന്നിങ്ങനെ രണ്ടു പേരാണ് മരണകാരണമെന്ന് പ്രതിപാദിക്കുന്ന അനീഷിന്റെ കത്ത് കണ്ടെത്തിയതായും വിവരമുണ്ട്്. അക്രമത്തിന് ഇരയായതിന് പിന്നാലെ ഫേസ്ബുക്കിലൂടെ കുറ്റവാളികള് നടത്തിയ അപമാനമാണ് അനീഷിനെ മരണത്തിലേക്ക് നയിച്ചതെന്നാണ് പോലീസ് പറയുന്നത്. ഇവര്ക്കെതിരേ നരഹത്യയ്ക്ക് കേസെടുത്തിട്ടുണ്ട്. മനുഷ്യാവകാശകമ്മീഷന് സ്വമേധയാ കേസെടുത്തിട്ടുണ്ട്.
