അതിരാവിലെയുള്ള വെയില് അഥവാ പ്രഭാത സൂര്യപ്രകാശം നമ്മുടെ ആരോഗ്യത്തിന് നല്കുന്ന ഗുണങ്ങള് നിരവധിയാണ്. ഒരു പുതിയ ദിവസത്തിലേക്ക് ഉന്മേഷത്തോടെ ചുവടുവെക്കാന് ശരീരത്തെയും മനസ്സിനെയും സജ്ജമാക്കുന്ന പ്രകൃതിദത്തമായ ഒരു ഔഷധമാണിത്. ഹൃദ്രോഗ വിദഗ്ദ്ധനായ ഡോ. ജെറമി ലണ്ടന്റെ നിരീക്ഷണത്തില്, വെറുമൊരു ശീലമെന്നതിലുപരി ശരീരത്തിന്റെ ആന്തരിക പ്രവര്ത്തനങ്ങളെ ക്രമീകരിക്കുന്നതില് ഇതിന് വലിയ പങ്കുണ്ട്. നേരത്തെ എഴുന്നേല്ക്കുന്നത് ഒരു ആരോഗ്യകരമായ ശീലമായി പണ്ടുമുതലേ കണക്കാക്കപ്പെടുന്നു. ഇന്സ്റ്റാഗ്രാമില് പങ്കുവെച്ച വീഡിയോയില്, പ്രഭാത സൂര്യപ്രകാശത്തിലേക്ക് ഇറങ്ങുന്നതിന്റെ പ്രാധാന്യത്തെക്കുറിച്ച് ഡോക്ടര് സംസാരിച്ചു. മൊത്തത്തിലുള്ള ആരോഗ്യത്തെയും ക്ഷേമത്തെയും പിന്തുണയ്ക്കുന്നതിനുള്ള ഏറ്റവും ലളിതവും എന്നാല് ഫലപ്രദവുമായ ശീലങ്ങളില് ഒന്നാണിതെന്ന് അദ്ദേഹം വിശേഷിപ്പിച്ചു.
1. സിര്കാഡിയന് റിഥം (Circadian Rhythm) പുനഃക്രമീകരിക്കുന്നു - ഡോ. ലണ്ടന്റെ അഭിപ്രായത്തില്, പുലര്ച്ചെയുള്ള സൂര്യപ്രകാശം നമ്മുടെ ഉറക്കം-ഉണരല് ചക്രം (Sleep-wake cycle) പുനഃക്രമീകരിക്കുന്നതില് പ്രധാന പങ്ക് വഹിക്കുന്നു. ഇത് ഉണര്ന്നിരിക്കാനും ജാഗ്രത പാലിക്കാനുമുള്ള സമയമായെന്ന് തലച്ചോറിന് സൂചന നല്കുന്നു. ഈ വെളിച്ചം ശരീരത്തില് പലവിധ ശാരീരിക പ്രതിപ്രവര്ത്തനങ്ങള്ക്ക് കാരണമാകുന്നു. കൂടാതെ, ഇത് മെലാടോണിന് (Melatonin) ഉത്പാദനത്തെ നിയന്ത്രിക്കാന് സഹായിക്കുന്നു-ഇതിലൂടെ രാത്രിയില് സ്വാഭാവികമായി ഉറക്കം വരാന് ശരീരം സജ്ജമാകുന്നു.
''പുലര്ച്ചെയുള്ള സൂര്യപ്രകാശം നിങ്ങളുടെ സിര്കാഡിയന് റിഥം സജ്ജമാക്കാന് സഹായിക്കുന്നു. എപ്പോള് ഉണരണമെന്ന സിഗ്നലുകള് നല്കുക മാത്രമല്ല, രാത്രിയില് മെലാടോണിന് എപ്പോള് പുറത്തുവിടണം എന്ന് നിശ്ചയിക്കുന്നതിലൂടെ നിങ്ങള്ക്ക് സുഖമായി ഉറങ്ങാനും ഇത് സഹായിക്കുന്നു.''
2. മാനസികാരോഗ്യത്തെ പിന്തുണയ്ക്കുന്നു - മാനസികാരോഗ്യം, ഉന്മേഷം, ഉപാപചയ പ്രവര്ത്തനം (Metabolism) എന്നിവ മെച്ചപ്പെടുത്തുന്നതിന് പ്രഭാത വെയില് അത്യാവശ്യമാണെന്ന് ഡോ. ലണ്ടന് ഊന്നിപ്പറയുന്നു. സെറോടോണിന്, കോര്ട്ടിസോള് തുടങ്ങിയ പ്രധാന ഹോര്മോണുകളെ നിയന്ത്രിക്കാന് സഹായിക്കുന്നതിലൂടെ, ഇത് മാനസികാവസ്ഥ മെച്ചപ്പെടുത്തുകയും ദിവസം മുഴുവന് ഊര്ജ്ജസ്വലമായിരിക്കാന് സഹായിക്കുകയും ചെയ്യുന്നു.
അദ്ദേഹം പറയുന്നു: ''രാവിലെ പുറത്തിറങ്ങുന്നത് നിങ്ങളുടെ മാനസികാരോഗ്യം, ഉപാപചയം, മൂഡ് എന്നിവയ്ക്ക് ചെയ്യാവുന്ന ഏറ്റവും നല്ല കാര്യങ്ങളില് ഒന്നാണ്. ഇത് സെറോടോണിന് വര്ദ്ധിപ്പിക്കുകയും കോര്ട്ടിസോള് നിയന്ത്രിക്കുകയും ദിവസം മുഴുവന് ഊര്ജ്ജം നിലനിര്ത്തുകയും ചെയ്യുന്നു.''
3. ദിവസത്തിന്റെ സാവധാനത്തിലുള്ള തുടക്കം - ശാരീരികവും മാനസികവുമായ ഗുണങ്ങള്ക്കപ്പുറം, നേരത്തെ എഴുന്നേല്ക്കുന്നത് ദിവസത്തിന് സമാധാനപരമായ ഒരു തുടക്കം നല്കുന്നു. തിടുക്കത്തില് കാര്യങ്ങളിലേക്ക് കടക്കുന്നതിന് പകരം, പുറത്തിറങ്ങാനും പ്രകൃതിയെ ആസ്വദിക്കാനും ശാന്തമായി ശ്വസിക്കാനും ഒരു നിമിഷം ചെലവഴിക്കാന് ഇത് നിങ്ങളെ അനുവദിക്കുന്നു.
''ദിവസം ആരംഭിക്കാനുള്ള മികച്ച മാര്ഗമാണിത്. നിശബ്ദമായ സമയം. ലോകം ഉണരുന്നത് കേള്ക്കുക. ഇത് ബാക്കി ദിവസത്തെ പോസിറ്റീവായി നിലനിര്ത്തുന്നു. തിരക്കുള്ള ഷെഡ്യൂളുകള്ക്കിടയില് ഇത് ബുദ്ധിമുട്ടാണെന്ന് എനിക്കറിയാം, പക്ഷേ ആഴ്ചയില് കുറച്ചുതവണയെങ്കിലും ഇങ്ങനെ ചെയ്യുന്നത് വലിയ മാറ്റമുണ്ടാക്കും.'-ഡോ. ലണ്ടന് കുറിക്കുന്നു.
