ഡേറ്റിംഗ് ആപ്പുകള് വഴി പരിചയപ്പെടുന്നവരെ കെണിയില് വീഴ്ത്തി പണം തട്ടുന്ന സംഘങ്ങള് കഴിഞ്ഞ ഏതാനും നാളുകളായി നമ്മുടെ നാട്ടില് സജീവമായിക്കൊണ്ടിരിക്കുകയാണ്. കൊല്ക്കത്തയിലെ റാണികുത്തിയിലുള്ള 'കപ്പിള് കഫേ സോണ്' കേന്ദ്രീകരിച്ചാണ് ഒടുവിലത്തെ സംഭവം റിപ്പോര്ട്ട് ചെയ്തിരിക്കുന്നത്. ബംബിള് എന്ന ഡേറ്റിംഗ് ആപ്പ് വഴി പരിചയപ്പെട്ട യുവതിയുടെ ക്ഷണം സ്വീകരിച്ച് നേരിട്ട് കാണാനെത്തിയ യുവാവാണ് ഈ ആസൂത്രിത ചതിക്കുഴിയില് വീണത്. പ്രണയത്തിന്റെ മുഖംമൂടിയണിഞ്ഞ് എത്തുന്ന തട്ടിപ്പ് സംഘങ്ങളെക്കുറിച്ച് ഈ സംഭവം വലിയ രീതിയിലുള്ള ചര്ച്ചകള്ക്ക് വഴിതെളിച്ചിട്ടുണ്ട്.
ആദ്യ കൂടിക്കാഴ്ചയ്ക്കായി യുവതി തന്നെയായിരുന്നു ഈ കഫേ തിരഞ്ഞെടുത്തത്. അവിടെ വെച്ച് രണ്ട് കോഫിയും ഒരു ഹുക്കയും മാത്രമാണ് ഇവര് ഓര്ഡര് ചെയ്തത്. തുടക്കത്തില് സാധാരണ സംഭാഷണങ്ങളില് ഏര്പ്പെട്ട യുവാവിന് യാതൊരു അസ്വാഭാവികതയും തോന്നിയിരുന്നില്ല. എന്നാല് ഭക്ഷണത്തിന് ശേഷം ലഭിച്ച ബില്ല് കണ്ട് യുവാവ് ഞെട്ടിപ്പോയി. വെറും രണ്ട് ഐറ്റങ്ങള്ക്ക് മാത്രമായി 8500 രൂപയാണ് കഫേ അധികൃതര് ബില്ല് ചെയ്തത്. താന് ഓര്ഡര് ചെയ്യാത്ത പല സാധനങ്ങളും ബില്ലില് കൃത്രിമമായി ചേര്ത്തിട്ടുണ്ടെന്ന് യുവാവ് ആരോപിക്കുന്നു.
ബില്ലിലെ വലിയ തുക നല്കാന് യുവാവ് വിസമ്മതിച്ചതോടെ കഫേ ജീവനക്കാര് ക്രൂരമായ പെരുമാറ്റത്തിലേക്ക് കടന്നു. ജീവനക്കാര് കൂട്ടമായി വന്ന് യുവാവിനെ വളയുകയും ഭീഷണിപ്പെടുത്തി പണം ഈടാക്കാന് ശ്രമിക്കുകയും ചെയ്തു. ഈ സമയത്ത് സഹായത്തിനായി കൂടെയുണ്ടായിരുന്ന യുവതിയെ നോക്കിയെങ്കിലും, അവര് അപ്പോഴേക്കും കഫേയില് നിന്നും രക്ഷപ്പെട്ടിരുന്നു. പുറത്തേക്ക് ഇറങ്ങിപ്പോകുമ്പോള് യുവതി പരിഹാസത്തോടെ ചിരിച്ചതായും റിപ്പോര്ട്ടുകള് സൂചിപ്പിക്കുന്നു. ഒടുവില് മറ്റ് വഴികളില്ലാതെ യുവാവിന് വലിയ തുക നല്കി അവിടെ നിന്നും രക്ഷപ്പെടേണ്ടി വന്നു.
ഈ സംഭവം സോഷ്യല് മീഡിയയില് വൈറലായതോടെ വലിയ രീതിയിലുള്ള പ്രതിഷേധമാണ് ഉയരുന്നത്. കൊല്ക്കത്തയിലെ 'കപ്പിള് സോണ്' കഫേകള് കേന്ദ്രീകരിച്ച് ഇത്തരം സംഘടിത തട്ടിപ്പുകള് വര്ഷങ്ങളായി നടക്കുന്നുണ്ടെന്നും യുവാക്കളെ കെണിയില് വീഴ്ത്താന് പ്രൊഫഷണല് സംഘങ്ങള് തന്നെ പ്രവര്ത്തിക്കുന്നുണ്ടെന്നും പലരും ചൂണ്ടിക്കാട്ടുന്നു. ഓണ്ലൈന് വഴി പരിചയപ്പെടുന്നവരുമായി പുറത്ത് കാണാന് പോകുമ്പോള് സുരക്ഷിതമായ സ്ഥലങ്ങള് മാത്രം തിരഞ്ഞെടുക്കണമെന്നും അപരിചിതര് നിര്ദ്ദേശിക്കുന്ന ഇടങ്ങളില് പോകാതിരിക്കാന് ജാഗ്രത പാലിക്കണമെന്നും സോഷ്യല് മീഡിയ ഉപയോക്താക്കള് മുന്നറിയിപ്പ് നല്കുന്നു.
