നമ്മുടെ ഒരു ദിവസത്തെ മുഴുവന് ഊര്ജ്ജവും മാനസികാവസ്ഥയും നിശ്ചയിക്കുന്നത് പ്രഭാതത്തിലെ ആദ്യത്തെ കുറച്ചു മണിക്കൂറുകളാണ്. എന്നാല്, നമ്മള് അറിയാതെ ചെയ്യുന്ന പല നിസ്സാര ശീലങ്ങളും ദീര്ഘകാലാടിസ്ഥാനത്തില് നമ്മുടെ ധമനികളെ (Arteries) കഠിനമാക്കുകയും ഹൃദയാരോഗ്യത്തെ അപകടത്തിലാക്കുകയും ചെയ്യുന്നുണ്ടെന്ന് വിദഗ്ധര് മുന്നറിയിപ്പ് നല്കുന്നു. പുണെ മണിപ്പാല് ഹോസ്പിറ്റലിലെ പ്രശസ്ത കാര്ഡിയോളജിസ്റ്റ് ഡോ. ആകാശ് മോത്ഗി പറയുന്നതനുസരിച്ച്, ഉറക്കമുണരുന്ന സമയത്ത് നമ്മുടെ ശരീരം വിശ്രമാവസ്ഥയില് നിന്ന് സജീവമായ അവസ്ഥയിലേക്ക് മാറുന്ന ഒരു നിര്ണ്ണായക ഘട്ടത്തിലൂടെയാണ് കടന്നുപോകുന്നത്. ഈ സമയത്ത് സ്വാഭാവികമായും രക്തസമ്മര്ദ്ദവും സ്ട്രെസ് ഹോര്മോണുകളും വര്ദ്ധിക്കും.
ഈ സ്വാഭാവിക മാറ്റങ്ങള്ക്കിടയില് നമ്മള് പിന്തുടരുന്ന തെറ്റായ ഭക്ഷണക്രമവും ജീവിതശൈലിയും ധമനികളില് പ്ലേക്ക് (Plaque) അടിഞ്ഞുകൂടാനും രക്തയോട്ടം തടസ്സപ്പെടാനും കാരണമാകുന്നു. നമ്മള് ആരോഗ്യകരമെന്ന് കരുതുന്നതോ അല്ലെങ്കില് ശ്രദ്ധിക്കാതെ വിടുന്നതോ ആയ 7 പ്രധാന പ്രഭാത ശീലങ്ങള് എങ്ങനെയാണ് ഹൃദയസ്തംഭനം പോലുള്ള ഗുരുതരമായ അവസ്ഥകളിലേക്ക് നയിക്കുന്നതെന്ന് അറിയാം....
ധമനികളെ ദോഷകരമായി ബാധിക്കുന്ന 7 പ്രഭാത ശീലങ്ങള് താഴെ പറയുന്നവയാണ്:
1. പ്രഭാതഭക്ഷണം ഒഴിവാക്കുക - പ്രഭാതഭക്ഷണം കഴിക്കാതിരിക്കുന്നത് ഉപാപചയ പ്രവര്ത്തനങ്ങളെ (Metabolism) ബാധിക്കും. ഇത് പകല്സമയത്ത് രക്തത്തിലെ പഞ്ചസാരയുടെ അളവ് പെട്ടെന്ന് കൂടാനും കൊളസ്ട്രോള് വര്ദ്ധിക്കാനും കാരണമാകുന്നു. ഈ ശീലം ധമനികളുടെ ഭിത്തികളില് സമ്മര്ദ്ദം ഉണ്ടാക്കും.
2. ഉപ്പും കൊഴുപ്പും കൂടിയ ഭക്ഷണം - രാവിലെ തന്നെ പാക്കറ്റ് ഭക്ഷണങ്ങളോ ഉപ്പ് കൂടിയ വിഭവങ്ങളോ കഴിക്കുന്നത് രക്തസമ്മര്ദ്ദം പെട്ടെന്ന് ഉയരാന് കാരണമാകും. ശരീരത്തില് വെള്ളം കെട്ടിക്കിടക്കുന്നതിനും രക്തക്കുഴലുകള്ക്ക് ആയാസം നല്കുന്നതിനും ഇത് വഴിവെക്കുന്നു.
3. വെറുംവയറ്റില് അമിതമായി കഫീന് ഉപയോഗിക്കുക - രാവിലെ എഴുന്നേറ്റ ഉടന് കടുപ്പമേറിയ ചായയോ കാപ്പിയോ വെറുംവയറ്റില് കുടിക്കുന്നത് ഹൃദയമിടിപ്പും രക്തസമ്മര്ദ്ദവും വര്ദ്ധിപ്പിക്കും. ഇത് ഹൃദയത്തിന് അമിത ജോലിഭാരം നല്കുന്നു.
4. ഉണര്ന്ന ഉടന് പുകവലിക്കുക - നിക്കോട്ടിന് രക്തക്കുഴലുകളെ ചുരുക്കുന്നു. രാവിലെ രക്തസമ്മര്ദ്ദം സ്വാഭാവികമായി കൂടിയിരിക്കുന്ന സമയത്ത് പുകവലിക്കുന്നത് ധമനികള്ക്ക് വേഗത്തില് പരിക്കേല്ക്കാന് (Vascular injury) കാരണമാകും.
5. ചലനമില്ലാത്ത പ്രഭാതം - ഉറക്കമുണര്ന്ന ശേഷം ദീര്ഘനേരം അനങ്ങാതെ ഇരിക്കുന്നത് രക്തചംക്രമണം സാവധാനത്തിലാക്കും. ഇത് ധമനികളുടെ ഇലാസ്തികത കുറയ്ക്കുകയും അവ കടുപ്പമുള്ളതാക്കുകയും (Arterial stiffness) ചെയ്യുന്നു. നേരിയ നടത്തമെങ്കിലും ശീലമാക്കുന്നത് നല്ലതാണ്.
6. വെള്ളം കുടിക്കാന് വൈകുന്നത് - രാത്രി ഉറക്കത്തില് ശരീരത്തില് നിന്ന് ധാരാളം ജലം നഷ്ടപ്പെടുന്നു. രാവിലെ എഴുന്നേറ്റ ഉടന് വെള്ളം കുടിച്ചില്ലെങ്കില് രക്തത്തിന്റെ സാന്ദ്രത (Viscosity) കൂടുകയും രക്തക്കുഴലുകളിലൂടെയുള്ള ഒഴുക്കിന് തടസ്സമുണ്ടാകുകയും ചെയ്യുന്നു.
7. മാനസിക സമ്മര്ദ്ദത്തോടെ ദിവസം തുടങ്ങുക - ഉണര്ന്ന ഉടന് തന്നെ ജോലി സംബന്ധമായ ഫോണ് കോളുകള് നോക്കുന്നതും തിരക്ക് കൂട്ടുന്നതും 'കോര്ട്ടിസോള്' എന്ന സമ്മര്ദ്ദ ഹോര്മോണ് വര്ദ്ധിപ്പിക്കും. ഇത് ദീര്ഘകാലാടിസ്ഥാനത്തില് രക്തസമ്മര്ദ്ദത്തെയും ഹൃദയാരോഗ്യത്തെയും ദോഷകരമായി ബാധിക്കും.
എന്തൊക്കെ കാര്യങ്ങള് ശ്രദ്ധിയ്ക്കാം :
* സമീകൃതമായ പ്രഭാതഭക്ഷണം ശീലമാക്കുക.
* ഉപ്പിന്റെ ഉപയോഗം കുറയ്ക്കുക.
* ധാരാളം വെള്ളം കുടിക്കുക.
* മാനസിക സമ്മര്ദ്ദം കുറയ്ക്കാന് ലഘുവായ വ്യായാമമോ ധ്യാനമോ ചെയ്യുക.
* ഉയര്ന്ന രക്തസമ്മര്ദ്ദമോ പ്രമേഹമോ ഉള്ളവര് കൃത്യമായ ഇടവേളകളില് പരിശോധനകള് നടത്തുക.
* ചെറിയ മാറ്റങ്ങളിലൂടെ ധമനികളുടെ ആരോഗ്യം സംരക്ഷിക്കാനും ഭാവിയില് ആന്ജിയോപ്ലാസ്റ്റി അല്ലെങ്കില് ബൈപാസ് സര്ജറി പോലുള്ള അവസ്ഥകള് ഒഴിവാക്കാനും സാധിക്കുമെന്ന് ഡോക്ടര് ഓര്മ്മിപ്പിക്കുന്നു.
