ജോലിത്തിരക്ക്, മാനസിക സമ്മര്ദ്ദം, ദൂരം എന്നിവ കാരണം മുതിര്ന്നവര്ക്കിടയിലെ സൗഹൃദങ്ങള് പഴയതുപോലെ എളുപ്പമല്ലാതായി മാറുകയാണ്. നിങ്ങളുടെ 20-കളുടെ അവസാനത്തിലോ 30-കളിലോ സൗഹൃദങ്ങള് നിലനിര്ത്താന് നിങ്ങള് പ്രയാസപ്പെടുന്നുണ്ടോ ? എങ്കില് നിങ്ങള് തനിച്ചല്ല. ജീവിതത്തിന്റെ ഓരോ ഘട്ടത്തിലും സൗഹൃദങ്ങള് വ്യത്യസ്തമാണ്. കുട്ടിക്കാലത്ത് അത് കളിയും ചിരിയും ഭക്ഷണവും പങ്കുവെക്കുന്നതിനെക്കുറിച്ചാണെങ്കില്, കൗമാരത്തില് അത് ചിന്തകളും വികാരങ്ങളും പങ്കുവെക്കുന്നതിലാണ് ശ്രദ്ധ കേന്ദ്രീകരിക്കുന്നത്. എന്നാല് പ്രായമാകുന്തോറും ഈ ബന്ധങ്ങള് മുന്നോട്ട് കൊണ്ടുപോകുന്നത് എത്രത്തോളം ബുദ്ധിമുട്ടാണെന്ന് ആരും പറഞ്ഞുതരാറില്ല. മുതിര്ന്നവര്ക്കിടയിലെ സൗഹൃദങ്ങള് കഠിനമാകുന്നത് ആളുകള്ക്ക് സ്നേഹമില്ലാത്തതുകൊണ്ടല്ല. മറിച്ച് ജീവിതം കൂടുതല് തിരക്കുള്ളതും ഉത്തരവാദിത്തങ്ങള് നിറഞ്ഞതുമായതു കൊണ്ടാണ്.
സൗഹൃദങ്ങള് പ്രയാസകരമാകാനുള്ള പ്രധാന കാരണങ്ങള് താഴെ പറയുന്നവയാണ്:
1. വ്യക്തതയും പക്വതയും (Clarity and Maturity) - റിലേഷന്ഷിപ്പ് കോച്ചായ സുമീര് നഗറിന്റെ അഭിപ്രായത്തില്, മുതിര്ന്നവര്ക്ക് തങ്ങളുടെ താല്പ്പര്യങ്ങളെക്കുറിച്ച് കൂടുതല് വ്യക്തത വരുന്നതിനാലാണ് സൗഹൃദങ്ങള് കടുപ്പമേറിയതാകുന്നത്. 20-കളില് ഒരേ ഓഫീസ്, ഒരേ കോളേജ് അല്ലെങ്കില് ഒരേ സാഹചര്യം എന്നിവ സൗഹൃദങ്ങളെ എളുപ്പമാക്കിയിരുന്നു. എന്നാല് പിന്നീട് കരിയര് സമ്മര്ദ്ദം, കുടുംബ ഉത്തരവാദിത്തങ്ങള്, സ്വയം തിരിച്ചറിവ് എന്നിവ വരുന്നു. എവിടെയാണ് നമ്മുടെ ഊര്ജ്ജം നഷ്ടപ്പെടുന്നത് എന്നും ഏതൊക്കെ ബന്ധങ്ങളാണ് വെറും അഭിനയം മാത്രമെന്നും നാം തിരിച്ചറിയാന് തുടങ്ങുന്നു. മുതിര്ന്നവര് പുതിയ ആളുകളെ ചേര്ക്കുന്നതിനേക്കാള് ഉള്ള ഊര്ജ്ജം സംരക്ഷിക്കാനാണ് താല്പ്പര്യപ്പെടുന്നത്.
2. സമയക്രമീകരണം (Time Management) - സമയമില്ലായ്മയാണ് മുതിര്ന്നവര്ക്കിടയിലെ സൗഹൃദങ്ങള് വെല്ലുവിളിയാകാനുള്ള മറ്റൊരു പ്രധാന കാരണം. ജോലി, യാത്ര, മറ്റ് ദൈനംദിന കടമകള് എന്നിവയ്ക്കിടയില് സുഹൃത്തുക്കള്ക്കായി മാറ്റിവെക്കാന് സമയം കുറവാണ്. പണ്ട് സ്കൂളിലോ കോളേജിലോ വെച്ച് സ്വാഭാവികമായി സൗഹൃദങ്ങള് വളര്ന്നിരുന്നുവെങ്കില്, ഇന്ന് അത് നിലനിര്ത്താന് ബോധപൂര്വ്വമായ ശ്രമം ആവശ്യമാണ്. എല്ലാവര്ക്കും സൗകര്യപ്രദമായ ഒരു സമയം കണ്ടെത്തുക എന്നത് വലിയൊരു കടമ്പയാണ്.
3. കുടുംബ ഉത്തരവാദിത്തങ്ങള്ക്കുള്ള മുന്ഗണന - പ്രായമാകുമ്പോള് പങ്കാളി, മക്കള്, മാതാപിതാക്കള് എന്നിവര്ക്കായി കൂടുതല് സമയം ചിലവഴിക്കേണ്ടി വരുന്നു. വാരാന്ത്യങ്ങള് പലപ്പോഴും വീട്ടുജോലികള്ക്കോ കുടുംബപരമായ കാര്യങ്ങള്ക്കോ വേണ്ടി മാറ്റിവെക്കപ്പെടുന്നു. ഇത് സുഹൃത്തുക്കളില് നിന്ന് നിങ്ങളെ അകറ്റിയേക്കാം. എന്നാല് ഇത് താല്പ്പര്യക്കുറവ് കൊണ്ടല്ല, മറിച്ച് മുന്ഗണനകള് മാറുന്നത് കൊണ്ടാണ്.
