കുറച്ച് ദിവസങ്ങള്ക്ക് മുന്പായിരുന്നു സീരിയല് താരം സിദ്ധാര്ത്ഥ് വേണുഗോപാലിന്റെ വിയോഗം. തൃശൂര് സ്വദേശിയായ സിദ്ധാര്ത്ഥ് ഏറെ കാലമായി കാന്സര് ബാധിച്ച് ചികിത്സയിലായിരുന്നു. നടി സീമ ജി നായരാണ് മരണവാര്ത്ത ഫേസ്ബുക്കില് പങ്കുവച്ച കുറിപ്പിലൂടെ അറിയിച്ചത്.
ഇപ്പോഴിതാ സിദ്ധാര്ത്ഥിനൊപ്പമുളള ചിത്രം പങ്കുവച്ച് വൈകാരികമായ കുറിപ്പ് പങ്കുവച്ചിരിക്കുകയാണ് സീമ ജി നായര്. '' പ്രിയപ്പെട്ട സിദ്ദു നീ പോയിട്ട് ..ഇന്നേക്ക് അഞ്ചുനാള് ..എത്രയോ ആഗ്രഹങ്ങളും സ്വപ്നങ്ങളും ബാക്കി വെച്ചാണ് നീ യാത്രയായത് ..അവസാന നിമിഷവും നീ ജീവിതത്തിലേക്ക് തിരിച്ചുവരാന് നീ ആഗ്രഹിച്ചു ..നിസ്സഹായരാകാന് മാത്രമേ ഞങ്ങള്ക്ക് കഴിഞ്ഞുള്ളു,ഇന്നലേ ഐവര്മഠത്തില് നിന്റെ അസ്ഥികള് എടുത്തു വെക്കാന് ചെന്നപ്പോള് ,നിന്നെ ദഹിപ്പിച്ചതിന്റെ തൊട്ടടുത്ത് മറ്റൊരു മൃതശരീരം ,ദഹിപ്പിക്കാന് കൊണ്ടുവന്നു മുപ്പതു വയസ്സുള്ള ഒരു പയ്യന്റെ ,അവന് ആത്മഹത്യ ചെയ്യുകയായിരുന്നു എന്നു പറഞ്ഞു കേട്ടു ,ഒരിടത്തു ജീവിക്കാന് അത്രയേറെ കൊതിച്ചിട്ടും മരണം പിടിച്ചു പറിച്ചു പോയ ജീവിതം ,തൊട്ടപ്പുറത്തു ജീവിതം ബാക്കി ഉണ്ടായിട്ടും സ്വയം അതു തീര്ത്തു കളയുന്നവരും .എന്താ അല്ലെ'', സീമ ജി നായര് കുറിച്ചു.
സിദ്ധാര്ത്ഥിന്റെ ആരോഗ്യകാര്യങ്ങള് നോക്കിയിരുന്നത് സീമയായിരുന്നു. കസ്തൂരിമാന്, ഭാഗ്യജാതകം തുടങ്ങി ഒട്ടേറെ സീരിയലുകളില് സിദ്ധാര്ത്ഥ് അഭിനയിച്ചിട്ടുണ്ട്.
