ചൂടുകൂടുകയും പരിസ്ഥിതി നശിക്കുകയും ചെയ്യുന്ന സാഹചര്യത്തില്, വിഷപ്പാമ്പുകളുമായുള്ള മനുഷ്യന്റെ സമ്പര്ക്കം വര്ധിക്കാനും പാമ്പുകടി മൂലമുള്ള മരണത്തിനും സാധ്യത കൂടുതലാണ്. വിസ്കോണ്സിന് സ്വദേശിയായ ടീം ഫ്രീഡ് ഈ അപകടം കുറയ്ക്കാന് സ്വയം പരീക്ഷണ വസ്തുവായി മാറിയിട്ടുള്ളയാളാണ്. എല്ലാത്തരം പാമ്പുവിഷങ്ങള്ക്കും എതിരേ ഫലപ്രദമായ ഒരു മരുന്നു വികസിപ്പിക്കാന് ഈ 58 കാരന് കഴിഞ്ഞ 20 വര്ഷമായി ലോകത്തിലെ ഏറ്റവും മാരകമായ പാമ്പുകളെക്കൊണ്ട് തന്നെത്തന്നെ കടിപ്പിച്ചത് 200 തവണയാണ്.
ഒരു യൂണിവേഴ്സല് ആന്റിവെനം വികസിപ്പിച്ചെടുക്കുന്നതിനായി തന്റെ ശരീരത്തില് പ്രതിരോധശേഷി വളര്ത്തിയെടുക്കുക എന്നതായിരുന്നു ലക്ഷ്യം. ശാസ്ത്രീയമായ മുന്പരിചയമൊന്നുമില്ലാത്ത, ജനല് വൃത്തിയാക്കുന്ന ജോലി ചെയ്തിരുന്ന ഫ്രീഡിന്റെ ഈ സാഹസികത അദ്ദേഹത്തെ പല തവണ മരണത്തിന്റെ വക്കില് എത്തിക്കുകയും വിരലുകളും കാലും നഷ്ടപ്പെടുന്ന അവസ്ഥയുണ്ടാക്കുകയും ചെയ്തു. ഒരു തവണ അദ്ദേഹം കോമയിലാവുക പോലും ചെയ്തിരുന്നു.
2001-ല് വളരെ ചെറിയ അളവില് പാമ്പ് വിഷം ശരീരത്തിലേക്ക് കുത്തിവെച്ചാണ് ഫ്രീഡ് തന്റെ പരീക്ഷണം തുടങ്ങിയത്. ഒരിക്കല് ഈജിപ്ഷ്യന് കോബ്രയുടെയും മോണോക്കിള്ഡ് കോബ്രയുടെയും കടിയേറ്റ് അദ്ദേഹം 15 മിനിറ്റിനുള്ളില് മരണത്തിന്റെ വക്കിലെത്തിയിരുന്നു. അയല്വാസി കണ്ടതുകൊണ്ട് മാത്രമാണ് അന്ന് അദ്ദേഹം രക്ഷപ്പെട്ടത്. ലോകത്തിലെ ഏറ്റവും വിഷമുള്ള ഇന്ലാന്ഡ് തായ്പാന് പാമ്പിനെതിരെ പ്രതിരോധശേഷി നേടിയത് തന്റെ വലിയ വിജയമായി അദ്ദേഹം കരുതുന്നു. 22 തവണയാണ് ഈ പാമ്പ് അദ്ദേഹത്തെ കടിച്ചത്.
പാമ്പുകടിയേല്ക്കുന്നതിന്റെ അനുഭവത്തെക്കുറിച്ച് ഫ്രീഡ് പറഞ്ഞത് തേനീച്ച കുത്തുന്നതിനേക്കാള് 1000 മടങ്ങ് വേദനയുള്ള കാര്യമെന്നായിരുന്നു. സാധാരണഗതിയില് വിവിധയിനം പാമ്പുകള്ക്ക് വെവ്വേറെ ആന്റിവെനങ്ങളാണ് ഉപയോഗിക്കുന്നത്. എന്നാല് ഫ്രീഡിന്റെ ശരീരത്തിലെ ആന്റിബോഡികള് ഉപയോഗിച്ച് ഒരു പൊതുവായ ആന്റിവെനം നിര്മ്മിക്കാനുള്ള ശ്രമത്തിലാണ് കാലിഫോര്ണിയയിലെ സെന്റിവാക്സ് എന്ന കമ്പനി. ഫ്രീഡിന്റെ ആന്റിബോഡികള്ക്ക് കോബ്ര, മാമ്പ, തായ്പാന് തുടങ്ങിയ മാരകമായ 19 തരം പാമ്പുകളുടെ വിഷത്തെ ചെറുക്കാന് കഴിയുമെന്ന് പഠനങ്ങള് തെളിയിക്കുന്നു. 2019 ല് കമ്പനി ഫ്രീഡിനെ ജോലിക്ക് എടുക്കുകയും അദ്ദേഹത്തിന്റെ രക്തം ആന്റിവെനം ഗവേഷണത്തിനായി ഉപയോഗിക്കാന് തുടങ്ങുകയും ചെയ്തു.
ലോകത്തിലെ ഏറ്റവും പാവപ്പെട്ട മനുഷ്യര്ക്ക് കുറഞ്ഞ ചിലവില് പാമ്പുകടി ചികിത്സ ലഭ്യമാക്കുക എന്നതാണ് തന്റെ ലക്ഷ്യമെന്നാണ് ഫ്രീഡ് പറഞ്ഞത്. ഫ്രീഡിന്റെ ഈ ത്യാഗം പാമ്പ് കടിയേറ്റ് ഓരോ വര്ഷവും മരിക്കുന്ന 1,38,000 പേര്ക്കും അംഗഭംഗം സംഭവിക്കുന്ന 4 ലക്ഷത്തോളം പേര്ക്കും തുണയായേക്കാം. ആഗോളതലത്തില് പ്രതിവര്ഷം 55 ലക്ഷത്തോളം പേര്ക്ക് പാമ്പ് കടിയേല്ക്കുന്നുണ്ട്. കാലാവസ്ഥാ വ്യതിയാനം മൂലം പാമ്പുകളും മനുഷ്യരും തമ്മിലുള്ള സമ്പര്ക്കം കൂടുന്നതിനാല് ഈ കണക്കുകള് ഇനിയും വര്ധിക്കാന് സാധ്യതയുണ്ട്.
