20-കളില് നാം പലപ്പോഴും ചര്മ്മസംരക്ഷണത്തില് പുതിയ പരീക്ഷണങ്ങള് നടത്താറുണ്ട്. എന്നാല് 30-കളിലേക്കും 40-കളിലേക്കും കടക്കുമ്പോള് ഈ സമീപനത്തില് മാറ്റം വരുന്നു. ഇന്ന് പലരും ലളിതവും എന്നാല് കൃത്യവുമായ (Minimalist) രീതികളിലേക്കാണ് മാറുന്നത്. ഇതിന് കാരണം ഈ പ്രായത്തില് ചര്മ്മത്തിന് അമിതമായ കെമിക്കലുകളോ പരീക്ഷണങ്ങളോ താങ്ങാന് കഴിയില്ല എന്നതാണ്. അമിതമായ പ്രൊഡക്റ്റുകളുടെ ഉപയോഗം ഗുണത്തേക്കാളേറെ ദോഷം ചെയ്യും. 'കൂടുതല് കാര്യങ്ങള് ചെയ്യുക' എന്നതിലുപരി 'ഫലപ്രദമായ കാര്യങ്ങള് മാത്രം ചെയ്യുക' എന്നതിലാണ് ഈ പ്രായത്തില് ശ്രദ്ധിക്കേണ്ടത്.
30-കളിലും 40-കളിലും ചര്മ്മത്തിന് എന്ത് മാറ്റമാണ് സംഭവിക്കുന്നത്?
ഈ പ്രായത്തില് ശരീരത്തിലെ കൊളാജന് (Collagen) ഉല്പാദനം കുറയുകയും ചര്മ്മത്തിലെ ഈര്പ്പം (Hydration) നഷ്ടപ്പെടുകയും ചെയ്യുന്നു. 'സൂര്യപ്രകാശം, മലിനീകരണം, മാനസിക സമ്മര്ദ്ദം, ജീവിതശൈലി എന്നിവ ഈ മാറ്റങ്ങളെ കൂടുതല് വേഗത്തിലാക്കുന്നു,' എന്ന് മാക്സിലോഫേഷ്യല് സര്ജന് ഡോ. തന്യ മിശ്ര ദീക്ഷിത് പറയുന്നു. അതുകൊണ്ട് തന്നെ ഈ പ്രായത്തില് ചര്മ്മത്തെ നിരന്തരം തിരുത്തുന്നതിന് (Correcting) പകരം അതിനെ സംരക്ഷിക്കുന്നതിനും (Restorative) നിലനിര്ത്തുന്നതിനുമാണ് മുന്ഗണന നല്കേണ്ടത്.
ലളിതമായ ശീലങ്ങള് കൂടുതല് ഫലപ്രദമാകുന്നത് എന്തുകൊണ്ട്?
പത്തു ഘട്ടങ്ങളുള്ള സങ്കീര്ണ്ണമായ ചര്മ്മസംരക്ഷണ രീതികളില് നിന്ന് ആളുകള് ഇപ്പോള് മാറിത്തുടങ്ങിയിരിക്കുന്നു. 'നല്ലൊരു ക്ലെന്സര് (Cleanser), കൃത്യമായ ഒരു ട്രീറ്റ്മെന്റ് സെറം, മോയ്സ്ചറൈസര്, സണ്സ്ക്രീന് എന്നിവ കൃത്യമായി ഉപയോഗിക്കുന്നത് സങ്കീര്ണ്ണമായ രീതികളേക്കാള് മികച്ച ഫലം നല്കും,' എന്ന് ഡോക്ടര് വ്യക്തമാക്കുന്നു. ചര്മ്മത്തിന് ആവശ്യമില്ലാത്തവ ഒഴിവാക്കി അത്യാവശ്യമായവ മാത്രം നല്കുക എന്നതാണ് 'സ്കിന് മിനിമലിസം' (Skin Minimalism) കൊണ്ട് അര്ത്ഥമാക്കുന്നത്.
ചര്മ്മത്തിന്റെ സംരക്ഷണ കവചം (Skin Barrier) എങ്ങനെ വീണ്ടെടുക്കാം?
ചര്മ്മത്തിന്റെ പുറംകവചത്തിന് കേടുപാടുകള് സംഭവിക്കുമ്പോഴാണ് മുഖക്കുരു, മങ്ങല്, അമിതമായ സെന്സിറ്റിവിറ്റി എന്നിവ ഉണ്ടാകുന്നത്. സെറാമൈഡുകള് (Ceramides), പെപ്റ്റൈഡുകള് (Peptides), ഫാറ്റി ആസിഡുകള് എന്നിവയടങ്ങിയ ഉല്പ്പന്നങ്ങള് ചര്മ്മത്തെ ശക്തിപ്പെടുത്താന് സഹായിക്കും. മൃദുവായ ക്ലെന്സറിലേക്കോ മികച്ച മോയ്സ്ചറൈസറിലേക്കോ മാറുന്നത് വലിയ മാറ്റങ്ങള് കൊണ്ടുവരും.
പ്രതിരോധമാണ് പ്രധാനം
പ്രശ്നങ്ങള് വന്നതിനുശേഷം ചികിത്സിക്കുന്നതിനേക്കാള് നല്ലത് അവ വരാതെ നോക്കുന്നതാണ്. അതിനായി താഴെ പറയുന്നവ ശീലമാക്കാം:
* സണ്സ്ക്രീന് : എല്ലാ ദിവസവും ഉപയോഗിക്കുക.
* റെറ്റിനോള് (Retinol) : ചര്മ്മത്തിന്റെ കോശങ്ങള് പുതുക്കാന് സഹായിക്കുന്നു.
* ആന്റിഓക്സിഡന്റുകള് (ഉദാഹരണത്തിന് വിറ്റാമിന് C) : പരിസ്ഥിതി ആഘാതങ്ങളില് നിന്ന് ചര്മ്മത്തെ സംരക്ഷിക്കുന്നു.
* ഏറ്റവും പ്രധാനം സ്ഥിരതയാണ്. ഇടയ്ക്കിടെ ഉല്പ്പന്നങ്ങള് മാറ്റിക്കൊണ്ടിരിക്കുന്നത് ഗുണം ചെയ്യില്ല.
ജീവിതശൈലിയുടെ പങ്ക്
*ഉറക്കം, മാനസിക സമ്മര്ദ്ദം, ആഹാരരീതി, വെള്ളം കുടിക്കുന്നത് എന്നിവ ചര്മ്മത്തിന്റെ ആരോഗ്യത്തില് വലിയ പങ്ക് വഹിക്കുന്നു. മോശം ജീവിതശൈലി നയിച്ചുകൊണ്ട് ചര്മ്മസംരക്ഷണ ഉല്പ്പന്നങ്ങള് മാത്രം ഉപയോഗിച്ചത് കൊണ്ട് കാര്യമില്ല. 30-കളിലും 40-കളിലും ചര്മ്മസംരക്ഷണം സങ്കീര്ണ്ണമാകേണ്ടതില്ല. പുതിയ ട്രെന്ഡുകള്ക്ക് പിന്നാലെ പോകാതെ, അടിസ്ഥാനപരമായ കാര്യങ്ങള് കൃത്യമായി പാലിക്കുന്നതാണ് ചര്മ്മത്തിന്റെ ദീര്ഘകാല ആരോഗ്യത്തിന് ഉത്തമം.
