തിരുവനന്തപരും: തെരഞ്ഞെടുപ്പ് ഫലം ഇനിയും പുറത്തുവരാനിരിക്കെ കോണ്ഗ്രസില് മുഖ്യമന്ത്രി സ്ഥാനവുമായി ബന്ധപ്പെട്ട് ഉയരുന്ന വിഴുപ്പലക്കലില് കര്ശന താക്കീതുമായി കെപിസിസി. പരസ്യപ്രസ്താവനകള് വേണ്ടെന്നും അങ്ങിനെ ചെയ്യുന്നത് കടുത്ത അച്ചടക്കലംഘനമായി കണക്കാക്കുമെന്നും കെപിസിസി അദ്ധ്യക്ഷന് സണ്ണിജോസഫ് വ്യക്തമാക്കി. എഐസിസിയുടെ നിര്ദേശപ്രകാരണമാണ് തീരുമാനമെന്നും പറഞ്ഞു.
മുഖ്യമന്ത്രിപദവുമായി ബന്ധപ്പെട്ട് ഇറക്കുന്ന പ്രസ്താവനകള്ക്ക് അച്ചടക്കലംഘനത്തിന് എടുക്കുന്ന നടപടികള് തന്നെയുണ്ടാകുമെന്നും പറഞ്ഞു. വോട്ടെടുപ്പിന് പിന്നാലെ പ്രതിപക്ഷ നേതാവ് വി.ഡി. സതീശന്, എഐസിസി ജനറല് സെക്രട്ടറി കെ.സി.വേണുഗോപാല്, മുതിര്ന്ന നേതാവ് രമേശ് ചെന്നിത്തല എന്നിവരെ അനുകൂലിച്ച് സാമൂഹ്യമാധ്യമങ്ങളില് വലിയ രീതിയില് പി.ആര്. വര്ക്കുകളാണ് നടക്കുന്നത്.
കോണ്ഗ്രസിലെ മുന്നിര നേതാക്കളായ കെ.സി. വേണുഗോപാല്, വി.ഡി. സതീശന്, രമേശ് ചെന്നിത്തല എന്നിവര്ക്ക് വേണ്ടിയാണ് പരസ്യമായും രഹസ്യമായും അണിയറയില് കളികള് പുരോഗമിക്കുന്നത്. യു.ഡി.എഫിന് ഭരിക്കാനുള്ള ഭൂരിപക്ഷം ലഭിച്ചാല് ഈ മൂന്ന് പേരില് ഒരാള് മുഖ്യമന്ത്രിയാകും എന്നാണ് രാഷ്ട്രീയ നിരീക്ഷണം. അതുകൊണ്ട് തന്നെ പിന്തുണ തേടിയുള്ള പ്രവര്ത്തനങ്ങളാണു നടത്തുന്നത്.
വി.ഡി. സതീശനെ അനുകൂലിച്ച് സംസ്ഥാനത്തിന്റെ പലയിടത്തും ബോര്ഡുകള് ഉയര്ന്നിരുന്നു. അതിനിടയില് മുതിര്ന്ന നേതാക്കളെ അധിക്ഷേപിച്ചുള്ള വാട്സ് ആപ്പ് ഗ്രൂപ്പിലെ ചാറ്റ് പുറത്തുവന്നതിന് പിന്നാലെ ഇതോടെ കെപിസിസി ഡിജിറ്റല് മീഡിയ സെല് ചുമതലയൊഴിയാന് ഹൈബി ഈഡന് എംപി സന്നദ്ധത അറിയിച്ചു. നിയമസഭാ തെരഞ്ഞെടുപ്പ് കഴിഞ്ഞ പശ്ചാത്തലത്തില് സ്ഥാനമൊഴിയുന്നുവെന്നാണ് കെപിസിസി പ്രസിഡന്റിന് നല്കിയ കത്തില് ഹൈബി ഈഡന് പറയുന്നത്.
പ്രതിപക്ഷ നേതാവ് വി.ഡി. സതീശനെ മുഖ്യമന്ത്രിയാക്കാന് പ്ളാന് ചെയ്തുകൊണ്ടുള്ള വാട്സ്ആപ്പ് ഗ്രൂപ്പ് ചര്ച്ചകള് പുറത്തായത്. കൊച്ചി കേന്ദ്രീകരിച്ച് ചില നേതാക്കളുടെ സാന്നിധ്യത്തില് പ്രവര്ത്തിക്കുന്ന 'ഇലക്ഷന് 2026 വി.ഡി.എസ്' എന്ന വാടസ് ആപ്പ് ഗ്രൂപ്പിലെ വിവരങ്ങളാണ് ചോര്ന്നത്. കെ.സി. വേണുഗോപാല്, കെ. സുധാകരന്, റോജി എം. ജോണ് തുടങ്ങിയ നേതാക്കളെ ലക്ഷ്യം വെച്ച് സൈബര് ആക്രമണം നടത്താന് ആഹ്വാനം ചെയ്യുന്ന സന്ദേശങ്ങളാണുള്ളത്. സംഘപരിവാര് ചായ്ള്ള ചാനലുകളുടെ യുട്യൂബ് സി.ഇ.ഒ പദവി വഹിച്ചിരുന്ന ആള്, മുതിര്ന്ന നേതാവിന്റെ സ്ര്ടാറ്റജിസ്റ്റ് ആയതിനെതിരേ നേരത്തെ തന്നെ പാര്ട്ടിക്കുള്ളില് അടക്കം പറച്ചിലുകള് ഉണ്ടായിരുന്നു.
മറ്റ് മുതിര്ന്ന നേതാക്കളെ മോശക്കാരായി ചിത്രീകരിച്ച് ഈ നേതാവിനെ മാത്രം ഉയര്ത്തിക്കാട്ടാനുള്ള ഇവരുടെ നീക്കങ്ങള് കടുത്ത വിമര്ശനങ്ങള്ക്ക് ഇടയാക്കുക മാത്രമല്ല, പാര്ട്ടിക്കു തന്നെ വന് തിരിച്ചടിയാകുകയും ചെയ്തു.ലീഗ് അടക്കമുള്ള ഘടക പാര്ട്ടികള് അതൃപ്തി പരസ്യമായി അറിയിച്ചിരുന്നു. എന്നാല് ദേശീയ നേതൃത്വം തന്നെ പോരിന് മുന്നില് നില്ക്കുന്നു എന്നാണ് പ്രവര്ത്തകര് പറയുന്നത്.
