കൊല്ക്കത്ത: കൊല്ക്കത്തയില് നടന്ന തിരഞ്ഞെടുപ്പ് റാലിയില് വിപ്ലവനായകന് സുഭാഷ് ചന്ദ്രബോസിന്റെ വിഖ്യാത വചനങ്ങള് ആയുധമാക്കി പ്രധാനമന്ത്രി നരേന്ദ്ര മോദി. 'നിങ്ങള് എനിക്ക് രക്തം തരൂ, ഞാന് നിങ്ങള്ക്ക് സ്വാതന്ത്ര്യം നല്കാം' എന്ന നേതാജിയുടെ വാക്കുകള് കടമെടുത്ത പ്രധാനമന്ത്രി, തൃണമൂല് കോണ്ഗ്രസിന്റെ ഭരണത്തില് നിന്ന് ജനങ്ങളെ മോചിപ്പിക്കുമെന്ന് പ്രഖ്യാപിച്ചു.
ബംഗാളിലെ മതുവ വിഭാഗക്കാര്ക്കിടയില് വോട്ടഭ്യര്ത്ഥിക്കവേയാണ് അദ്ദേഹം ഈ പരാമര്ശം നടത്തിയത്. സംസ്ഥാനത്തെ നിലവിലെ അരാജകത്വത്തെ 'മഹാ ജംഗിള് രാജ്' എന്ന് വിശേഷിപ്പിച്ച മോദി, ഇതില് നിന്നും ബംഗാളിനെ സ്വതന്ത്രമാക്കാനുള്ള അവസരമാണ് ഈ തിരഞ്ഞെടുപ്പെന്ന് ഓര്മിപ്പിച്ചു. അഴിമതിയില് നിന്നും ഭയത്തില് നിന്നും ജനങ്ങള്ക്ക് മോചനം നല്കുമെന്നും സ്ത്രീ സുരക്ഷയും യുവജനങ്ങള്ക്ക് തൊഴിലും ഉറപ്പാക്കുമെന്നും നുഴഞ്ഞുകയറ്റവും കലാപങ്ങളും അടിച്ചമര്ത്തുമെന്നും പറഞ്ഞു.
പ്രചാരണത്തിന്റെ ഭാഗമായി താക്കൂറിനഗറിലെ മതുവ ക്ഷേത്രത്തില് പ്രധാനമന്ത്രി സന്ദര്ശനം നടത്തി. രണ്ടാം ഘട്ട തിരഞ്ഞെടുപ്പിന് മുന്നോടിയായുള്ള അവസാനവട്ട പ്രചാരണത്തില് ബി.ജെ.പിയുടെ ആത്മവിശ്വാസം ഉയര്ത്തുന്നതായിരുന്നു അദ്ദേഹത്തിന്റെ വാക്കുകള്. വോട്ട് നല്കി ജനാധിപത്യ പ്രക്രിയയില് പങ്കാളികളാകാന് അദ്ദേഹം ബംഗാള് ജനതയോട് അഭ്യര്ത്ഥിച്ചു.
