ഇന്ത്യൻ പ്രീമിയർ ലീഗ് ക്രിക്കറ്റിൽ വൈഭവ് സൂര്യവംശിയെന്ന കൗമാരതാരം നടത്തുന്ന സിക്സർവേട്ട കണ്ട് അന്തം വിട്ടുനിൽക്കുകയാണ് ക്രിക്കറ്റ് പ്രേമികള്. ഐപിഎല് 2026-ലെ വിസ്മയമായി മാറിയ രാജസ്ഥാന് റോയല്സിന്റെ 15-കാരന് വൈഭവ് സൂര്യവംശി, കളിക്കളത്തിലെ മിന്നുന്ന പ്രകടനം കൊണ്ട് മാത്രമല്ല, തന്റെ വിനയവും കുസൃതിയും നിറഞ്ഞ പെരുമാറ്റം കൊണ്ടും ആരാധകരുടെ പ്രിയങ്കരനായിട്ടുണ്ട്. പലപ്പോഴും തനിക്ക് മുന്നിലെത്തുന്ന ആരാധകരോടുള്ള വൈഭവിന്റെ പെരുമാറ്റം ആരാധകരുടെ ഹൃദയം കീഴടക്കാറുണ്ട്.
ഇപ്പോഴിതാ വിമാനത്താവളത്തില് വെച്ച് സെല്ഫി ചോദിച്ചെത്തിയ രണ്ട് കൊച്ചു ആരാധകരെ വൈഭവ് രസകരമായി പറ്റിക്കുന്ന വീഡിയോയാണ് സോഷ്യല് മീഡിയയില് വൈറലാകുന്നത്. സെല്ഫി ആവശ്യപ്പെട്ട കുട്ടികളോട്, ഫോട്ടോ എടുക്കണമെങ്കില് തനിക്ക് 100 രൂപ വേണമെന്ന് വൈഭവ് വളരെ ഗൗരവത്തില് പറയുന്നത് ദൃശ്യങ്ങളില് കാണാം.
‘എന്റെ കൂടെ ഫോട്ടോയെടുക്കണമെങ്കില് എനിക്ക് പണം തരണം. സത്യമായിട്ടും ഞാന് പറയുകയാണ് ബ്രോ. എനിക്ക് ഓരോ ഫോട്ടോയ്ക്കും 100 രൂപ വേണം...’ എന്നാണ് വൈഭവ് പറയുന്നത്.
വൈഭവിന്റെ പെട്ടെന്നുള്ള ഈ അപ്രതീക്ഷിത പെരുമാറ്റവും സെല്ഫിക്കായി തങ്ങളുടെ പ്രിയ താരം പണം ആവശ്യപ്പെട്ടതും കണ്ട് കുട്ടികള് പകച്ചു പോയി. കുഞ്ഞ് ആരാധകര് ഇതുകേട്ട് തിരികെ പോയി 200 രൂപയുമായി മടങ്ങി വന്ന് വൈഭവിനു നല്കാന് ഒരുങ്ങുന്നുണ്ട്. പെട്ടെന്ന് പൊട്ടിച്ചിരിച്ചു കൊണ്ട് ഇതൊരു വെറും തമാശയാണെന്ന് വൈഭവ് പറഞ്ഞു. പിന്നീട് കുട്ടികളെ ചേര്ത്തു പിടിച്ച് സ്നേഹത്തോടെ സെല്ഫി എടുക്കുകയും ചെയ്തു. സിക്സറുകളുടെ പകിട്ടില് നില്ക്കുമ്പോഴും ബാറ്റിംഗില് റെക്കോര്ഡുകള് തകര്ക്കുമ്പോഴും താരജാഡകളില്ലാത്ത വൈഭവിന്റെ ഈ നിഷ്കളങ്കമായ ഇടപെടല് ക്രിക്കറ്റ് ലോകത്ത് വലിയ പ്രശംസ പിടിച്ചു പറ്റുന്നുണ്ട്. രാജസ്ഥാന് റോയല്സ് തന്നെയാണ് ഇതിന്റെ വിഡിയോ സോഷ്യല് മീഡിയയില് പങ്കിട്ടത്.
Baccha party always a step ahead 😂 pic.twitter.com/locrozR0Yh
— Rajasthan Royals (@rajasthanroyals) April 27, 2026
വണ്ടര് കിഡ് വൈഭവ് സൂര്യവംശി ഐപിഎല്ലില് കത്തും ഫോമിലാണ്. ജയ്പൂരിലെ സവായ് മാന്സിങ് സ്റ്റേഡിയത്തില് സണ്റൈസേഴ്സ് ഹൈദരാബാദിനെതിരെ വെറും 36 പന്തിലാണ് വൈഭവ് തന്റെ കരിയറിലെ രണ്ടാമത്തെ ഐപിഎല് സെഞ്ച്വറി പൂര്ത്തിയാക്കിയത്. 37 പന്തില് നിന്ന് 12 കൂറ്റന് സിക്സറുകളടക്കം 103 റണ്സാണ് ഈ പതിനഞ്ചുകാരന് അടിച്ചുകൂട്ടിയത്.
കഴിഞ്ഞ ദിവസമാണ് വൈഭവ് ഐപിഎല് ചരിത്രത്തിലെ ഏറ്റവും വേഗമേറിയ മൂന്നാമത്തെ സെഞ്ച്വറി തൂക്കിയത്. സണ്റൈസേഴ്സ് ഹൈദരാബാദിനെതിരായ പോരാട്ടത്തില് വെറും 36 പന്തിലാണ് താരം സെഞ്ച്വറിയടിച്ചത്. ഐപിഎല്ലിലെ താരത്തിന്റെ രണ്ടാം സെഞ്ച്വറി കൂടിയാണിത്.
ഐപിഎല്ലിലെ ഏറ്റവും പ്രായം കുറഞ്ഞ താരമായ വൈഭവ്, ഇതിനകം തന്നെ ഇന്ത്യന് അണ്ടര്-19 ടീമിലും തന്റെ പ്രതിഭ തെളിയിച്ചിട്ടുണ്ട്. ഐപിഎല് 2026 സീസണില് രാജസ്ഥാന് റോയല്സിനായി ഓപ്പണിംഗില് തകര്പ്പന് പ്രകടനം തുടരുന്ന വൈഭവ്, ഭാവി ഇന്ത്യന് ക്രിക്കറ്റിന്റെ വാഗ്ദാനമാണെന്ന് ഓരോ മത്സരത്തിലൂടെയും ഉറപ്പിക്കുന്നുണ്ട്.
