വിദേശത്തെ ഉപരിപഠനകാലം സോഷ്യല് മീഡിയയില് കാണുന്നതുപോലെ അത്ര മനോഹരമല്ലെന്ന് തുറന്നുപറഞ്ഞ് പത്തൊന്പതുകാരനായ ഇന്ത്യന് വിദ്യാര്ത്ഥി കനവ്. അമേരിക്കയില് പഠിക്കുന്ന താന് നേരിടുന്ന പ്രായോഗികവും മാനസികവുമായ വെല്ലുവിളികള് പങ്കുവെച്ചുകൊണ്ട് ഇന്സ്റ്റാഗ്രാമില് കനവ് പോസ്റ്റ് ചെയ്ത വീഡിയോ ഇപ്പോള് ചര്ച്ചയാവുകയാണ്. വിദേശപഠനം പലരുടെയും സ്വപ്നമാണെങ്കിലും അതിനു പിന്നിലെ ഏകാന്തതയെയും കഠിനാധ്വാനത്തെയും കുറിച്ച് ആരും സംസാരിക്കാറില്ലെന്ന് കനവ് വീഡിയോയില് ചൂണ്ടിക്കാട്ടുന്നു.
ഭക്ഷണം പാകം ചെയ്യുന്നത് മുതല് നികുതി അടയ്ക്കുന്നതും സാമ്പത്തിക കാര്യങ്ങള് കൈകാര്യം ചെയ്യുന്നതും വരെ സ്വന്തമായി ചെയ്യേണ്ടി വരുന്ന ഉത്തരവാദിത്തങ്ങളെക്കുറിച്ച് യുവാവ് വിവരിക്കുന്നു. നാട്ടിലെ ആഘോഷങ്ങള്ക്കിടയില് കുടുംബത്തോടൊപ്പമുണ്ടാകാന് കഴിയാത്തതാണ് ഏറ്റവും വലിയ സങ്കടമെന്നും താരം പങ്കുവെക്കുന്നു. ആയിരക്കണക്കിന് മൈലുകള്ക്കപ്പുറം ഇരുന്നുകൊണ്ട് വീഡിയോ കോളിലൂടെ മാത്രം പ്രിയപ്പെട്ടവരുടെ സന്തോഷം നോക്കി നില്ക്കേണ്ടി വരുന്നത് മാനസികമായി തളര്ത്തുന്ന അനുഭവമാണെന്നും കനവ് പറയുന്നു.
എന്നാല് ഇത്തരം ബുദ്ധിമുട്ടുകള് മനുഷ്യനെ കൂടുതല് കരുത്തനാക്കി മാറ്റുമെന്നും കനവ് കൂട്ടിച്ചേര്ക്കുന്നു. 'ബില്ഡിംഗ് എ ലൈഫ്' എന്ന അടിക്കുറിപ്പോടെ പങ്കുവെച്ച ഈ വീഡിയോ ലക്ഷക്കണക്കിന് ആളുകളാണ് ഇതിനോടകം കണ്ടത്. വിദേശത്ത് ജോലി ചെയ്യുന്നവരും പഠിക്കുന്നവരുമായ നിരവധി പേര് കനവിന്റെ അനുഭവത്തോട് യോജിച്ച് പ്രതികരണങ്ങളുമായി രംഗത്തെത്തി. വിദേശരാജ്യങ്ങളിലെ ഭംഗി മാത്രം കാണുന്നവര് അതിനു പിന്നിലെ കഠിനാധ്വാനം തിരിച്ചറിയുന്നില്ലെന്നാണ് സോഷ്യല് മീഡിയയുടെ പൊതുവായ അഭിപ്രായം.
