ബിസിനസുകാര്ക്ക് പ്രയോജനം നല്കുന്ന തരത്തിലുള്ള ഫീച്ചര് 'ബിസിനസ് എഐ' ഫീച്ചര് വാട്സ്ആപ്പില് മെറ്റ അവതരിപ്പിച്ചു. ഇന്ത്യയിലെ ചെറുകിട, ഇടത്തരം ബിസിനസുകള്ക്ക് ഉപഭോക്താക്കളുമായി എളുപ്പത്തില് ബന്ധപ്പെടാന് സഹായിക്കുന്ന ഫീച്ചറാണ് ഇത്. വാട്സ്ആപ്പ് ബിസിനസ് ആപ്പില് നേരിട്ട് ലഭ്യമാകുന്ന ഈ എഐ സംവിധാനം ഉപഭോക്തൃ ചോദ്യങ്ങള്ക്ക് 24 മണിക്കൂറും മറുപടി നല്കുക, ഉല്പ്പന്നങ്ങള് ശുപാര്ശ ചെയ്യുക, അപ്പോയിന്റ്മെന്റുകള് ബുക്ക് ചെയ്യുക, വില്പ്പന വര്ധിപ്പിക്കുക എന്നിവയ്ക്ക് സഹായകരമാകും.
'ഇന്ത്യയുടെ സമ്പദ്വ്യവസ്ഥയുടെ നട്ടെല്ലാണ് ചെറുകിട ബിസിനസുകള്. ഉപഭോക്താക്കളുമായി നടത്തുന്ന ഓരോ സംഭാഷണത്തിന്റെയും മൂല്യം ഞങ്ങള് ആഴത്തില് മനസ്സിലാക്കുന്നു. പരിമിതമായ വിഭവങ്ങളോടെ ഉയര്ന്ന അളവിലുള്ള ഉപഭോക്തൃ ചോദ്യങ്ങള് കൈകാര്യം ചെയ്യുന്നത് ചെറുകിട ബിസിനസുകള്ക്ക് ഏറ്റവും വലിയ വെല്ലുവിളികളില് ഒന്നാണെന്ന് വര്ഷങ്ങളായി ഞങ്ങള് സ്ഥിരമായി കേട്ടിട്ടുണ്ട്. ഇവിടെയാണ് എഐക്ക് അവര്ക്ക് ഒരു വലിയ മാറ്റം കൊണ്ടുവരാന് കഴിയുമെന്ന് ഞങ്ങള് വിശ്വസിക്കുന്നത്. വാട്സ്ആപ്പില് ബിസിനസ് എഐ അവതരിപ്പിക്കുന്നതിലൂടെ ഞങ്ങള് ഇപ്പോള് ആ ശക്തി നേരിട്ട് ചെറുകിട ബിസിനസുകളുടെ കൈകളിലേക്ക് എത്തിക്കുകയാണ് - ബിസിനസ്സ് സമയത്തിന് പുറത്തുള്ള ഉപഭോക്തൃ അന്വേഷണം അവര് ഒരിക്കലും നഷ്ടപ്പെടുത്തുകയോ പീക്ക് ഡിമാന്ഡ് സമയത്ത് തുടരാന് പാടുപെടുകയോ ചെയ്യുന്നില്ലെന്ന് ഉറപ്പാക്കുന്നു' - എന്നും മെറ്റ ഇന്ത്യ ബിസിനസ് മെസേജിംഗ് ഡയറക്ടര് രവി ഗാര്ഗ് പറഞ്ഞു.
ബിസിനസുകളുടെ വിവരങ്ങള് അടിസ്ഥാനമാക്കി എഐ പ്രവര്ത്തിക്കുന്നതിനാല് വില, ഓഫര്, ഷിപ്പിംഗ് തുടങ്ങിയ ചോദ്യങ്ങള്ക്ക് ഉടന് മറുപടി ലഭിക്കും. ആവശ്യമുണ്ടെങ്കില് ബിസിനസ് ഉടമകള്ക്ക് നേരിട്ടും ചാറ്റില് ഇടപെടാനാകും. ഭാവിയില് യുപിഐ വഴിയുള്ള പേയ്മെന്റുകളും നേരിട്ട് വാട്സ്ആപ്പില് നടത്താന് സൗകര്യമൊരുക്കുമെന്നും കമ്പനി അറിയിച്ചു. ഇന്ത്യയിലെ എല്ലാ വാട്സ്ആപ്പ് ബിസിനസ് അക്കൗണ്ടുകള്ക്കും വരും ആഴ്ചകളില് ഈ സൗകര്യം ലഭ്യമാകും. കാന്ററിന്റെ 2025 പഠനപ്രകാരം ഇന്ത്യയിലെ ഓണ്ലൈന് ഉപയോക്താക്കളില് 91 ശതമാനം പേര് ആഴ്ചതോറും ബിസിനസുകളുമായി ചാറ്റ് ചെയ്യുന്നതായി കണ്ടെത്തിയിട്ടുണ്ട്. ഇതോടെ ഉപഭോക്താക്കളുമായി ബന്ധപ്പെടാനുള്ള പ്രധാന പ്ലാറ്റ്ഫോമായി വാട്സ്ആപ്പ് മാറിയിരിക്കുകയാണെന്ന് മെറ്റ വ്യക്തമാക്കി.
