ഡബ്ലിന്: ബാറ്റര്, വിക്കറ്റ് കീപ്പര്, ക്യാപ്റ്റന്, പരിശീലകന് എന്നീ നിലകളില് തിളങ്ങിയ മുന് ഇന്ത്യന് നായകന് രാഹുല് ദ്രാവിഡ് ഇപ്പോള് ക്രിക്കറ്റ് ലോകത്ത് പുതിയൊരു വേഷമണിയുന്നു. ക്രിക്കറ്റ് ക്ലബ്ബിന്റെ ഉടമയായിട്ടാണ് രാഹുല് രംഗപ്രവേശനം ചെയ്യുന്നത്. ഈ വര്ഷം ആരംഭിക്കാനിരിക്കുന്ന യൂറോപ്യന് ടി20 പ്രീമിയര് ലീഗിലെ ഡബ്ലിന് ഫ്രാഞ്ചൈസിയുടെ സഹ-ഉടമയായി ദ്രാവിഡിനെ പ്രഖ്യാപിച്ചു.
ഡബ്ലിന് ഗാര്ഡിയന്സ് എന്ന് പേരിട്ടിരിക്കുന്ന ടീമിനെ മുന് ഇന്ത്യന് താരം രവിചന്ദ്രന് അശ്വിന് നയിക്കും. ബിബിസി സ്പോര്ട്സ് ആണ് ഈ വിവരം റിപ്പോര്ട്ട് ചെയ്തത്. ഡബ്ലിന് ഗാര്ഡിയന്സ് ടീമിന്റെ ഉടമകളിലൊരാളായി ദ്രാവിഡ് പ്രവര്ത്തിക്കും. 2024 ഡിസംബറില് അന്താരാഷ്ട്ര ക്രിക്കറ്റില് നിന്നും 2025-ല് ഐപിഎല്ലില് നിന്നും വിരമിച്ച അശ്വിന്, ഈ ലീഗിലൂടെ കളിക്കളത്തിലേക്ക് തിരിച്ചെത്തും. നിലവില് 39 വയസ്സുള്ള അശ്വിന് അമേരിക്കയിലെ മേജര് ലീഗ് ക്രിക്കറ്റിലും കളിക്കുന്നുണ്ട്. ആറ് ടീമുകളാണ് ടൂര്ണമെന്റില് പങ്കെടുക്കുന്നത്. ബോളിവുഡ് താരം അഭിഷേക് ബച്ചനും ഇന്ത്യന് കമ്പനിയായ 'റൂള്സ് സ്പോര്ട്ട് ടെക്കും' ചേര്ന്നാണ് ഈ ലീഗ് നടത്തുന്നത്.
യൂറോപ്പിലെ ക്രിക്കറ്റ് വളര്ച്ചയ്ക്ക് സഹായിക്കുക എന്ന ലക്ഷ്യമാണ് തന്നെ ഈ നിക്ഷേപത്തിന് പ്രേരിപ്പിച്ചതെന്ന് ദ്രാവിഡ് പറഞ്ഞു. യൂറോപ്പിലെ ക്രിക്കറ്റിനെ താഴെത്തട്ടില് നിന്ന് വളര്ത്താനും വളര്ന്നുവരുന്ന പ്രതിഭകള്ക്ക് പുതിയ അവസരങ്ങള് ഒരുക്കാനുമുള്ള വലിയ കാഴ്ചപ്പാടാണ് എന്നെ ഇവിടേക്ക് ആകര്ഷിച്ചത്. ഡബ്ലിനില് ഇതിനോടകം തന്നെ വലിയൊരു ക്രിക്കറ്റ് ആരാധകക്കൂട്ടമുണ്ട്. അടുത്ത തലമുറയെ വളര്ത്തിയെടുക്കുക എന്നത് എപ്പോഴും എനിക്ക് പ്രിയപ്പെട്ട കാര്യമാണ്,' ദ്രാവിഡ് പ്രസ്താവനയില് വ്യക്തമാക്കി.
അഭിഷേക് ബച്ചന്റെ നേതൃത്വത്തിലുള്ള ഈ ലീഗില് രാഹുല് ദ്രാവിഡിന് പുറമെ സ്റ്റീവ് വോ, ഗ്ലെന് മാക്സ്വെല്, ജോണ്ടി റോഡ്സ്, ക്രിസ് ഗെയ്ല്, ഫാഫ് ഡു പ്ലെസിസ്, ഹെന്റിച്ച് ക്ലാസന് തുടങ്ങിയ അന്താരാഷ്ട്ര ക്രിക്കറ്റിലെ പ്രമുഖരും സഹകരിക്കുന്നുണ്ട്. യൂറോപ്പിനെ ക്രിക്കറ്റിന്റെ അടുത്ത വലിയ വിപണിയായി മാറ്റുക എന്നതാണ് ഈ ലീഗിലൂടെ ലക്ഷ്യമിടുന്നത്.
